LEBITIKOS 11 - KA BAIBL

Ki mrad ki bakhuid bad ki bymkhuid

¹ Bad U Trai u la kren ha u Moses bad ha u Aaron, u da ong ha ki,

² “To kren ha ki khun Israel, da ong, ‘Kine ki long ki mrad ïa kiba phi lah ban bam na ki mrad baroh kiba ha ka pyrthei.

³ Uba pait khnap, bad uba phiah ar liang ki khnap, bad uba ktha ar sien ka jingbam na ki kynja mrad ba saw kjat baroh, ïa uta keiñ phin bam.

⁴ Hynrei, ïa kine phin ym bam na kita kiba ktha ar sien ka jingbam, lane na kita kiba pait khnap: ka ut, la ka ktha ar sien ka jingbam, namar ba kam pait khnap, ka long bymkhuid ïa phi.

⁵ Bad ïa u heiraks, naba u ktha ar sien khlem da pait khnap, u long bymkhuid ïa phi.

⁶ Bad ïa ka arnabeth, namar ba ka ktha ar sien, hynrei, khlem da pait khnap, ka long bymkhuid ïa phi.

⁷ Bad ïa u sniang, namar ba u pait khnap bad ba u phiah ar liang, hynrei, khlem da ktha ar sien ïa ka jingbam; u long bymkhuid ïa phi.

⁸ Wat bam na ka doh jong ki, bad wat ktah ïa ka metïap jong ki ruh; ki long bymkhuid ïa phi.

⁹ “ ‘Ïa kine phin bam na kita baroh kiba ha ki um: na ka jaid baroh ba don ki shnet bad ki snep ha ki um, ha ki duriaw, bad ha ki wah; ïa kita phin bam.

¹⁰ Bad kita baroh ki bymdon ki shnet bad ki snep, ha ki duriaw, bad ha ki wah, na ki kynja bakhih baroh ha ki um, bad na ki kynja ba-im baroh ha ki um, ki long ba-ijli ïa phi.

¹¹ Kin long keiñ ka jingijli ïa phi; wat bam na ki doh jong ki, bad to isih ïa ki metïap jong ki.

¹² Baroh kat ki bymdon ki shnet bad ki snep hapoh ki um, kin long ka jingijli ïa phi.

¹³ “ ‘Na ki kynja sim, kine ki long kiba phin ijli ïa ki; wat bam ïa ki, ki long ka jingijli ïa phi: u pukni, ka khlieng duriaw, bad ki 'lieng ïong,

¹⁴ bad ka khlieng bad u kbeit ha la ka kynja;

¹⁵ ka tyngab baroh ha la ka kynja;

¹⁶ bad ka dkhoh lieh, bad u kbeit miet, bad ka khapsnem, bad ka kwang ruh ha la ka kynja;

¹⁷ bad ka khwak, bad ka tyngab duriaw, bad ka dkhoh;

¹⁸ bad ka thring, bad ka pelikan, bad u proh jyndem;

¹⁹ bad ka lak-lak, bad ka saro ha la ka kynja, bad u sim tyngwieng, bad u lymbit ruh de.

²⁰ “ ‘U kynja baher baroh u bapar bad u baïaid saw kjat u long ka jingijli ïa phi.

²¹ Te na kine phi lah ban bam, na u kynja baher baroh u bapar bad u baïaid saw kjat, hynrei, uba don ki kjat halor ki sla'jat jong u, ïa ka ban rynsied da kita na ka khyndew;

²² na kita, phi lah ban bam ïa kine: u puit bah ha la ka jaid, bad ïa u puit suhwah ha la ka jaid, bad ïa u puit tangkuli ha la ka jaid, bad ïa u puit sla ha la ka jaid.

²³ Te u kynja baher bapar baroh uba don saw kjat, u long ka jingijli ïa phi.

²⁴ “ ‘Bad namar kine, phin long bymkhuid: bad jar uba ktah ïa ka metïap jong ki un sah bymkhuid haduh la janmiet,

²⁵ bad jar uba rah ei ei na ka metïap jong ki, ka dei ba un sait ïa la ki jaiñ, bad un sah bymkhuid haduh la janmiet.

²⁶ Ki metïap ki mrad baroh kiba pait khnap, khlem phiah ar liang ïa u, bad ki bymktha ar sien, ki long bymkhuid ïa phi: bad jar uba ktah ïa ki un long bymkhuid.

²⁷ Ki mrad baroh bapar bad ki kti, na kita kiba ïaid saw kjat, ki long bymkhuid ïa phi: bad jar uba ktah ïa ki metïap jong ki un long bymkhuid haduh la janmiet.

²⁸ Bad jar uba rah ïa ka metïap jong ki un sait ïa la ki jaiñ, bad un sah bymkhuid haduh la janmiet: ki long bymkhuid ïa phi.

²⁹ “ ‘Bad kine ruh, ki long bymkhuid ïa phi na ki kynja bapar halor ka khyndew; ka sharyntin, bad ka khnai, bad u jakoid ha la ka kynja,

³⁰ bad ka ñiangbshiah, bad ka ñiangbliar, bad ka tyrpud, bad ka mattah, bad u kyndad.

³¹ Na ki kynja bapar baroh, kine ki long bymkhuid ïa phi: bad jar uba ktah ïa ki haba ki la ïap, un long bymkhuid haduh la janmiet.

³² Bad kine haba ki la ïap, ba kin hap halor kaei kaei, kata kan long bymkhuid; ki kynja khiew dieng baroh, lane ka jaiñ, lane ka snieh, lane ka byrni, la ka long kaei kaei ruh ba ju trei da ka, ka dei ban buh ha um, bad kan long bymkhuid haduh la janmiet; kumta, kan wan long khuid pat.

³³ Bad u khiew khyndew baroh, ba jia hap uei re uei na kine hapoh jong u, kaei kaei ruh kaba don hapoh kan long bymkhuid bad ïa uta phin pynpait.

³⁴ Ka jingbam baroh ba phin bam, haba kata ka um kan dei ïa ka, kan long bymkhuid: bad ka jingdih baroh ba phin dih na u khiew bymkhuid kan long ruh ka bymkhuid.

³⁵ Bad kaei kaei ruh kaba hap na ka metïap jong kita halor jong ka, kan long bymkhuid; la ka dpei, lane ka 'liang dpei ruh, ïa kata yn pynpait: ki long bymkhuid keiñ, bad kin long bymkhuid ïa phi ruh.

³⁶ Pynban, ka pukri bad ka thliew tong um ba don bun ka um kin long bakhuid: hynrei kaei kaei ba ktah ïa ka metïap jong ki kan long bymkhuid.

³⁷ Bad lada kan hap ruh na kata ka metïap jong ki halor u symbai bet u ban sa bet, uta un long bakhuid.

³⁸ Hynrei, lada yn buh um halor uta u symbai, bad ba hap kaei kaei ruh na ka metïap jong ki halor jong u, un long bymkhuid ïa phi.

³⁹ “ ‘Bad lada ïap u mrad uba long jingbam ïa phi; jar uba ktah ïa ka metïap jong u, un long bymkhuid haduh la janmiet.

⁴⁰ Bad jar uba bam na ka metïap jong u, ka dei ba un sait ïa la ki jaiñ, bad un long bymkhuid haduh la janmiet: bad uta uba bah ïa ka metïap jong u, un sait ïa la ki jaiñ, bad un long bymkhuid haduh la janmiet.

⁴¹ “ ‘Kumta, u kynja bapar baroh u bapar halor ka khyndew un long ka jingijli; wat bam ïa uta.

⁴² U kynja bapar da ka kpoh baroh, bad u kynja baïaid saw kjat baroh, bad u kynja baroh ba don shibun ki kti na ki kynja bapar baroh, wat bam ïa kita; naba ki long ka jingijli.

⁴³ Wat pynijli ïa la ki mynsiem namar kaei kaei ka kynja bapar, bad wat pynlong bymkhuid ïa lade namar jong ki, da kaba phin da long tngit.

⁴⁴ Naba nga long U Trai U Blei jong phi: namar kata, to pynkyntang ïa lade, bad phin long ki bakhuid; naba nga long u bakhuid: bad wat pyntngit ïa lade da kaei kaei bapar halor ka khyndew.

⁴⁵ Naba nga long U Trai uba la ïalam noh ïa phi na ka ri Ijipt, ïa ka ban long U Blei ïa phi: kumta, to long ki bakhuid, naba nga long u bakhuid.’ ”

⁴⁶ Kane ka long ka hukum shaphang ki mrad, bad ki kynja baher, bad ki kynja ba-im baroh ba khih hapoh ki um, bad shaphang ki kynja bapar baroh halor ka khyndew,

⁴⁷ ïa ka ban pynlong ka jingïapher hapdeng ki bymkhuid bad ki bakhuid, bad hapdeng u mrad ïa uba dei ban bam bad ïa u bymdei ban bam.