LEBITIKOS 10 - KA BAIBL

Ka jingleh palat u Nadab bad u Abihu

¹ Ynda kumta, u Nadab bad u Abihu, ki khun u Aaron, ki la ïashim ïa la ki khiew thang jingiwbih, bad ki la buh ding ha ki, bad ki la buh halor kata ïa ka jingiwbih thang, bad ki la ïakñia ainguh ha khmat U Trai da ka ding khyllah, ïa kaba um shym la hukum ïa ki.

² Bad ka ding ka la mih noh na khmat U Trai, bad ka la thang ïa ki, bad ki la ïap ha khmat U Trai.

³ Te u Moses u la ong ha u Aaron, “Kane ïa kaba U Trai u la kren, u da ong, ‘Yn pynkyntang ïa nga ha kita kiba wan hajan jong nga, bad yn pyndonburom ïa nga ha khmat u paidlang baroh.’ ” U Aaron te u la sngap.

⁴ Bad u Moses u la khot ïa u Mishael bad u Elsaphan, ki khun u Ussiel, u kpanah u Aaron, bad u la ong ha ki, “To ïawan hajan, to bah noh ïa la ki para na khmat ka jaka kyntang shabar ka jaka shong dara.”

⁵ Ki te ki la ïawan hajan, bad ki la ïabah noh ïa ki, syndah jingphong, shabar ka jaka shong dara; kumba u Moses u la lah kren.

Ka kamram ki lyngdoh

⁶ Ynda kumta, u Moses u la ong ha u Aaron, bad ha u Eleasar bad ha u Ithamar, ki khun jong u, “Wat ieh rangei ïa la ki khlieh, lymne wat kad ïa la ki jaiñ; ba ïoh phi ïap noh, bad ba ïoh ngat ka jingbitar U Trai ha u paidlang baroh: hynrei, to ai kin ïam ki para jong phi baroh, ka ïing Israel baroh kawei keiñ, namar kane ka jinging ïa kaba u la thang U Trai.

⁷ Bad wat mih noh phi na ka jingkhang Ka Tabernakl ka jingïaseng, ba ïoh phi ïap noh: namar ka umphniang ka jingpynsleh jong U Trai ka long halor jong phi.” Ki ruh ki la leh kumba u la ong u Moses.

⁸ U Trai u la kren ruh ha u Aaron, u da ong,

⁹ “Me, ïa ka Waiñ bad ïa ka kyiad wat dih, bad ki khun shynrang jong me ruh, haba phi rung sha Ka Tabernakl ka jingïaseng, ba phin ym ïap noh: kane kan long ka hukum ba-neh junom ïa phi pateng la pateng:

¹⁰ bad kata kan long khnang ïa ka ban pynïapher hapdeng ka bakyntang bad ka bymkyntang, hapdeng ka bymkhuid bad ka bakhuid;

¹¹ bad ïa ka ban hikai ha ki khun Israel ïa ki hukum baroh ba U Trai u la pynbna ha ki da ka kti u Moses.”

¹² Bad u Moses u la kren ha u Aaron, bad ha u Eleasar bad ha u Ithamar, kiba dang sah na ki khun shynrang jong u, “To ïashim ïa ka jingainguh bam kaba sah na ki jingkñia da ka ding jong U Trai, bad to ïabam khlem thiat ïa ka hajan ka duwan: naba ka long ka bakyntang tam eh;

¹³ bad to ïabam ïa ka ha ka jaka kyntang, naba ka bynta jong me ka long, bad ka bynta ki khun shynrang jong me ruh, na ki jingkñia da ka ding jong U Trai: naba kumta hi, la hukum ïa nga.

¹⁴ Bad ïa ka shadem ba la kaweh ruh lem bad ka kti ba la kyntiew phin bam ha ka jaka bakhuid; ma me, bad ki khun shynrang jong me, bad ki khun kynthei jong me ruh de: naba la ai ïa ki, ïa ka ban long ka bynta jong me, bad ka jong ki khun shynrang jong me, na ki jingkñia bapynïasuk ki khun Israel.

¹⁵ Ïa ka kti kyntiew bad ïa ka shadem ba yn kaweh, kin ïawallam lem bad ïa ka jingkñia da ka ding na ka khleiñ, ïa ka ban pynkaweh ïa ka jingainguh kaweh ha khmat U Trai: bad kan long ka bynta jong me, bad ka jong ki khun shynrang jong me ruh de, da ka hukum ba-neh junom; kumba la hukum U Trai.”

¹⁶ Te u Moses u la wad minot ïa u 'lang sohmoh jong ka jingkñia namar ka pop, te ha khmih, la thang ïa u: bad u la sngewbitar ïa u Eleasar bad u Ithamar, kiba dang sah na ki khun shynrang u Aaron, u da ong,

¹⁷ “Balei ba phim shym la bam ïa ka jingkñia namar ka pop ha ka jaka bakhuid? Naba ka long ka bakyntang tam, bad U Blei u la ai ïa ka ha phi ïa ka ban kit ïa ka pop ka jong u paidlang, ïa ka ban pynlong ka jingpynïasuk na ka bynta jong ki ha khmat U Trai.

¹⁸ Ha khmih, ym shym la wallam ïa ka snam jong ka hapoh ka jaka kyntang: ka la dei ïa phi ban bam ïa ka hapoh ka jaka kyntang, kumba nga la hukum.”

¹⁹ Te u Aaron u la ïathuh ha u Moses, “Ha khmih, mynta ka sngi ki la ïakñia ïa la ka jingkñia namar ka pop, bad ïa ka jingkñia ainguh thang jong ki ruh ha khmat U Trai; te ka la jia kum kane ïa nga: te lada nga la bam ïa ka jingkñia namar ka pop ha kane ka sngi, kan long kaba sngewbha ma ha khmat U Trai?”

²⁰ Te haba u Moses u la ïohsngew ïa kata, u la hun.