LEBITIKOS 1 - KA BAIBL

Ki jingkñia

¹ Bad U Trai u la khot ïa u Moses, bad U la kren ha u na Ka Tabernakl ka jingïaseng, u da ong,

² “To kren ha ki khun Israel, bad to ong ha ki, Haba uno uno u briew na phi u wallam ïa ka jingkñia ainguh ha U Trai da u mrad, phin wallam keiñ ïa ka jingkñia jong phi na ki masi bad na ki langbrot.

Ka Jingainguh Thang

³ “Lada ka jingkñia jong u kan long ka jingkñia ainguh thang da u masi dab, to ai ba un kñia ainguh da u shynrang bajanai: bad to ai ba un wallam ïa u da la ka mon sngewbha hi sha ka jingkhang Ka Tabernakl ka jingïaseng ha khmat U Trai;

⁴ bad to ai un buh ïa la ka kti halor ka khlieh jong kata ka jingkñia ainguh thang; te yn sa pdiang hun ïa kata na u ïa ka ban pynlong ka jingpynïasuk na ka bynta jong u.

⁵ To ai ruh ba un pynïap ïa uta u masi dab ha khmat U Trai; bad to ai ba ki khun shynrang u Aaron, ki lyngdoh keiñ, kin shim ïa ka snam, bad kin synreit ïa kata ka snam baroh sawdong halor ka duwan kaba hajan ka jingkhang Ka Tabernakl ka jingïaseng.

⁶ Bad un khoh ïa ka snieh jong kata ka jingkñia ainguh, bad un ot ïa ka ha la ki dkhot ki dkhot;

⁷ bad ki khun shynrang u Aaron lyngdoh kin pynmeh ïa ka ding halor ka duwan, bad kin buh ryntih biang ïa ki dieng halor kata ka ding;

⁸ bad kita ki lyngdoh, ki khun shynrang u Aaron, kin buh ryntih ïa ki dkhot, ïa ka khlieh, bad ïa ka khleiñ, halor kita ki dieng kiba halor ka ding kaba halor ka duwan;

⁹ hynrei, ïa ki snier bad ïa ki kjat jong u, un sait ha ka um: bad u lyngdoh un thang ïa kata baroh halor ka duwan, ïa ka ban long ka jingkñia ainguh thang, kaba long ka jingkñia da ka ding jong ka jingiw baiwbih ha U Trai.

¹⁰ “Te lada ka jingkñia ainguh thang jong u kan long na ki kynhun, na ki langbrot, lane na ki blang; to un ainguh ïa ka da u shynrang uba janai bha;

¹¹ bad un pynïap ïa uta ha khmat U Trai ha kaba shaphang shatei kata ka duwan: bad ki lyngdoh, ki khun shynrang u Aaron, kin synreit ïa ka snam jong u baroh sawdong halor ka duwan.

¹² Bad un ot ïa u ha la ki dkhot ki dkhot, ïa ka khlieh ruh bad ka khleiñ jong u: bad u lyngdoh un buh ryntih ïa ki halor ki dieng kiba halor ka ding kaba halor ka duwan;

¹³ hynrei, un sait ïa ki snier bad ïa ki kjat ha ka um: bad u lyngdoh un ainguh ïa ki baroh, bad un thang ïa ki halor kata ka duwan: kane keiñ ka long ka jingkñia ainguh thang, ka jingkñia da ka ding, jong ka jingiw baiwbih ha U Trai.

¹⁴ “Te lada ka jingkñia ainguh jong u ïa U Trai kan long ka jingkñia ainguh thang da ki sim, ynda kumta, to ai ba un wallam ïa la ka jingainguh da ki sohlyngngem, lane da ki khun lyngdkhur.

¹⁵ Bad u lyngdoh un wallam ïa ka sha ka duwan, bad un khyrwait noh ïa ka khlieh jong ka, bad un thang ïa ka halor ka duwan; bad to ai ban khem noh ïa ka snam jong ka ha syndah ka duwan.

¹⁶ Bad ka dei ba un khlaw noh ïa u khu jong ka bad phut noh ïa ki sner jong ka, bad un bred noh ïa ki hajan ka duwan, shaphang mihngi sha ka jaka theh dpei;

¹⁷ bad un phiah ar liang ïa ka lem bad ki thapniang jong ka, khlem da pyndkut: bad un thang u lyngdoh ïa ka halor ka duwan, halor ki dieng kiba halor ka ding: kane keiñ ka long ka jingkñia ainguh thang, ka jingainguh keiñ da ka ding, jong ka jingiw baiwbih ha U Trai.