JOSHUA 24 - KA BAIBL

Ki ktien khatduh u Joshua

¹ Bad u Joshua u la ïalum ïa ki jaid Israel baroh ha Shekhem, bad u la phah khot ïa ki tymmen basan ki Israel, bad ïa ki rangbah jong ki, bad ïa ki nongbishar jong ki, bad ïa ki nongkam jong ki; bad ki la ïeng ha khmat U Blei.

² Bad u Joshua u la ong ha u paidbah baroh, “Kumne u ong U Trai, U Blei ki Israel, ‘Ki kpa jong phi ki la shong mynhyndai sha shiliang kata ka Wah, u Terah keiñ, u kpa u Abraham, bad u kpa u Nahor: bad ki la shakri ïa kiwei pat ki blei.

³ Bad nga la shim ïa u Abraham u kpa jong phi na sha shiliang kata ka Wah, bad nga la ïalam ïa u lyngba ïa ka ri Kanaan baroh, bad nga la pynroi ïa u symbai jong u, bad nga la ai ïa u Isaak ha u.

⁴ Bad nga la ai ha u Isaak ïa u Jakob bad u Iso: bad nga la ai ïa u lum Seir ha u Iso, ban ïoh ïa ka; hynrei, u Jakob bad ki khun jong u ki la leit hiar sha Ijipt.

⁵ Te nga la phah ïa u Moses bad u Aaron, bad nga la pynshitom ïa ka Ijipt, katba kum kata ba nga la leh hapdeng jong ki: bad hadien kata, nga la wallam noh ïa phi.

⁶ Bad nga la wallam noh ïa ki kpa jong phi na Ijipt: bad phi la wan haduh ka duriaw; bad ki Ijipt ki la beh nadien ki kpa jong phi bad ki kali bad ki nongshong kulai haduh ka Duriaw Basaw.

⁷ Te haba ki la lynñiar ha U Trai, u la buh ka jingdum hapdeng jong phi bad ki Ijipt, bad u la wallam ïa ka duriaw halor jong ki, bad u la tyllep ïa ki; bad ki khmat jong phi ki la ïohi ïa kata kaba nga la leh ha Ijipt: bad phi la shong ha ka ri khlaw slem bah.

⁸ Bad nga la wallam ïa phi ha ka ri ki Amor, kiba shong sha shiliang ka Jordan; bad ki la ïaleh ïa phi: bad nga la ai ïa ki ha ka kti jong phi, bad phi la ïoh ïa ka ri jong ki; bad nga la pynduh ïa ki ha khmat jong phi.

⁹ Ynda kumta, u Balak u khun u Sippor, u syiem Moab, u la ïeng ïaleh thma ïa ki Israel; bad u la phah khot ïa u Balaam u khun u Beor ban tim ïa phi:

¹⁰ hynrei, ngam shym shahshkor ïa u Balaam; namar kata, u la kyrkhu ïa phi pynban: kumta, nga la pyllait noh ïa phi na ka kti jong u.

¹¹ Bad phi la leit sha shiliang ka Jordan, bad phi la wan ha Jerikho: te ki nong Jerikho ki la ïaleh ïa phi, ki Amor, bad ki Peris, bad ki Kanaan, bad ki Hit, bad ki Girgash, bad ki Hib, bad ki Jebus; bad nga la ai noh ïa ki ha ka kti jong phi.

¹² Bad nga la phah ïa u kyieng ha shuwa jong phi, uba la beh noh ïa ki na shuwa jong phi, ïa ki ar ngut ki syiem ki Amor keiñ: ym da ka waitlam jong me, lymne da ka ryntieh jong me.

¹³ Bad nga la ai ha phi ïa ka ri kaba phim shym la trei, bad ïa ki shnong kiba phim shym la tei, bad phi la shong ha ki; ïa ki brisoh Waiñ bad ïa ki brisoh Olib kiba phim shym la thung phi bam.’

¹⁴ “Mynta namar kata, to sheptieng ïa U Trai, bad to shakri ïa u ha ka jingjanai bad ha ka jingshisha: bad to iehnoh ïa kita ki blei kiba ki kpa jong phi ki la ïashakri sha shiliang kata ka Wah, bad ha Ijipt; bad to shakri phi ïa U Trai.

¹⁵ Bad lada kam idei ïa phi ban shakri ïa U Trai, to jied phi ha kane ka sngi ïano phin shakri; ïa kita kiba ki kpa jong phi ki la shakri kiba la don sha shiliang kata ka Wah, lane ïa kita ki blei ki Amor, kiba phi shong ha ka ri jong ki: hynrei, ma nga bad ka ïing jong nga ngin shakri ïa U Trai.”

¹⁶ Te u paidbah u la ïathuh u la ong ruh, “Kaba eh ïa ngi ba ngin iehnoh noh ïa U Trai, ïa ka ban shakri ïa kiwei pat ki blei;

¹⁷ namar U Trai U Blei jong ngi u long uta uba la wallam noh ïa ngi bad ïa ki kpa jong ngi na ka ri Ijipt, na ka ïing ka jinglongmraw, bad uba la leh ïa kita ki dak khyllah bakhraw ha khmat jong ngi, bad uba la ri pynim ïa ngi ha kata ka lynti baroh ba ngi la leit, bad hapdeng ki kynja bynriew baroh ba ngi la ïaid napdeng jong ki:

¹⁸ bad U Trai u la beh noh na khmat jong ngi ïa ki briew baroh, ïa ki Amor keiñ kiba shong ha kata ka ri: namar kata, ngi ruh ngin shakri ïa U Trai; namar u long U Blei jong ngi.”

¹⁹ Te u Joshua u la ong ha uta u paidbah, “Phi phim lah ban shakri ïa U Trai; namar u long U Blei u bakhuid; u long U Blei u bathut shen; un ym map ïa ki jingpalat lymne ïa ki pop jong phi.

²⁰ Lada phin iehnoh ïa U Trai, bad phin shakri ïa ki blei khyllah, ynda kumta, un phai bad un pynsniew ïa phi, bad un pynduh khoit ïa phi, hadien ba u la leh bha ïa phi.”

²¹ Te uta u paidbah u la ong ha u Joshua, “Em; hynrei, ngi ngin shakri ïa U Trai.”

²² Te u Joshua u la ong ha uta u paidbah, “Phi long ki sakhi pyrshah ïa lade ba phi la jied ha lade ïa U Trai, ban shakri ïa u.” Te ki la ong, “Ngi long ki sakhi.”

²³ “Mynta namar kata, to iehnoh,” u la ong, “ïa kita ki blei khyllah kiba hapdeng jong phi, bad to dem ïa la ki dohnud ha U Trai U Blei ki Israel.”

²⁴ Te uta u paidbah u la ong ha u Joshua, “Ïa U Trai U Blei jong ngi ngin shakri, bad ïa ka ktien jong u ngin kohnguh.”

²⁵ Kumta, u Joshua u la pynlong ka jutang bad uta u paidbah ha kata ka sngi, bad u la buh ha ki ka aiñ bad ka rukom ha Shekhem.

²⁶ Bad u Joshua u la thoh ïa kine ki ktien ha Ka Kitab Ka Hukum U Blei; bad u la shim ïa u maw bakhraw, bad u la pynïeng ïa u hangta hapoh u dieng Sning uba hajan ka jaka kyntang U Trai.

²⁷ Bad u Joshua u la ong ha uta u paidbah baroh, “Ha khmih, une u maw u long sakhi ïa ngi; namar u la ïohsngew ïa ki ktien U Trai baroh ïa kiba u la kren ha ngi: namar kata, un long u sakhi ïa phi, ïoh ba phin len ïa la U Blei.”

²⁸ Kumta, u Joshua u la pyllait ïa u paidbah uwei uwei baroh sha la ka ri kynti.

Ka jingïap u Joshua bad ka jong u Eleasar

²⁹ Ka la jia ruh hadien kine kiei kiei, ba u Joshua u khun u Nun, u shakri U Trai, u la ïap noh, haba u la shispah shiphew snem ka rta,

³⁰ bad ki la tep ïa u hapoh ka pud ka ri kynti jong u ha Timnath-serah, kaba ha ri lum Ephraim, shaphang shatei na u lum Gaash.

³¹ Bad ki Israel ki la shakri ïa U Trai baroh ki sngi u Joshua, bad baroh ki sngi ki tymmen basan kiba la im hadien u Joshua, bad kiba la tip ïa ki kam U Trai baroh, ïa kiba u la leh na ka bynta ki Israel.

³² Bad ïa ki shyieng u Joseph, kiba ki khun Israel ki la wallam noh na Ijipt, ki la tep ha Shekhem, ha kata ka bynta ka khyndew kaba u Jakob u la thied na ki khun u Hamor u kpa u Shekhem shispah ki sbai kesitah: bad ka la jia long ka bynta ki khun u Joseph.

³³ Bad u Eleasar u khun u Aaron u la ïap; bad ki la tep ïa u ha uta u lum u Phinehas u khun jong u, ïa uba la ai ha u ha ri lum Ephraim.