JOSHUA 16 - KA BAIBL

Ka bynta u Ephraim bad u Manasseh

¹ Bad ka bynta ïa ki khun u Joseph ka la suh naduh ka Jordan hajan ka Jerikho, ha ki um Jerikho shaphang mihngi, kata ka ri khlaw, ka da kiew artet na Jerikho lyngba ka ri lum sha Bethel;

² bad ka la suh na Bethel sha Lus, bad ka la pom haduh ki pud ki Arkhi sha Ataroth;

³ bad ka la hiar shaphang sepngi sha ki phang ki Japhlet sha khap ka Beth-horon kaba harum, bad haduh ka Geser; bad ki bakut jong ka ki la don ha ka duriaw.

⁴ Kumta, ki khun u Joseph, u Manasseh bad u Ephraim, ki la shim ïa la ka ri kynti.

⁵ Bad ka pud ki khun u Ephraim kat kum ka ïing jong ki ka la long kumne: ka pud ka ri kynti jong ki shaphang mihngi ka la long ka Ataroth-addar, haduh Beth-horon kaba shaneng;

⁶ bad ka pud ka la leit shaphang ka duriaw sha Mikhmethah shaphang shatei; bad kata ka pud ka la phai tawiar shaphang mihngi sha Taanath-sheiloh, bad ka la leit lait shaphang mihngi jong ka Janoah;

⁷ bad ka la hiar na Janoah sha Ataroth, bad sha Naarah, bad ka la poi sha Jerikho, bad ka la leit mih ha Jordan.

⁸ Na Tappuah ka pud ka la leit shaphang sepngi haduh ka wah Kanah; bad ki bakut jong ka ki la don ha ka duriaw. Kane ka long ka ri kynti ka jaid ki khun u Ephraim kat kum ki ïing jong ki;

⁹ lem bad kita ki nongbah ba la pynkyrpang ïa ki khun u Ephraim hapdeng ka ri kynti ki khun u Manasseh, ki nongbah baroh bad ki nongrit jong ki de.

¹⁰ Te kim shym beh noh ïa ki Kanaan kiba shong ha Geser: hynrei, ki Kanaan ki shong hapdeng ki Ephraim, haduh kane ka sngi, bad ki la long shakri ba ai khajna.