Biblia Todo Logo
Baibulo la pa intaneti

- Zotsatsa -

JONAH 4 - KA BAIBL


Ka jingsngewsih u Jonah namar ka jingleh isynei U Blei

1 Hynrei, u Jonah u la sngewsih sat, bad u la sngewbitar.

2 Bad u la duwai ha U Trai, bad u la ong, “Nga kyrpad ïa me, A Trai, kane kam shym long ka ktien jong nga, mynba nga dang don ha la ka ri? Namar kata, nga la pynkloi ban phet noh sha Tarshish: naba nga la tip keiñ ba me long U Blei uba aiei, bad uba dap ka jingisynei lem, uba tud ïa ka ban bitar, bad uba kynrei ha ka jingisynei, bad me kylla-ka-bamut namar ka jingsniew.

3 Namar kata te, A Trai, nga kyrpad ïa me, to shim noh na nga ïa ka jingim jong nga; naba ka kham bha ïa nga ban ïap ban ïa ka ban im.”

4 U Trai te u la ong, “Hato me leh bha ba me bitar?”

5 Ynda kumta, u Jonah u la mih noh na ka nongbah, bad u la shong shaphang mihngi jong ka nongbah, bad u la thaw dara ïa lade hangta, bad u la shong hapoh jong ka ha ka jingkah, tad ynda u la ïohi kaei ka ban sa jia ïa ka nongbah.

6 Te U Trai U Blei u la khreh ïa u Kikaïon, bad u la pynmih noh ïa u halor u Jonah, ba un long jingkah halor ka khlieh jong u, ïa ka ban pyllait ïa u na la ka jingkhuslai. Kumta, u Jonah u la kmen shibun namar uta u Kikaïon.

7 Hynrei, U Blei u la khreh ïa u khñiang haba la shai phyrngab kum lashai, uta te u la shoh ïa uta u Kikaïon, haduh ba u la ïapstai noh.

8 Bad haba la ïeng ka sngi, U Blei u la khreh ïa ka lyer mihngi kaba pyn-lhep; bad ka sngi ka la shoh ïa ka khlieh u Jonah, haduh ba u la ïapler, bad u la kyrpad ïa lade ba un ïap noh, bad u la ong, “Kham bha ba ngan ïap ban ïa ka ban im.”

9 U Blei te u la ong ha u Jonah, “Hato me leh bha ba me bitar namar uta u Kikaïon?” U te u la ong, “Nga leh bha keiñ ba nga bitar jin haduh ka jingïap.”

10 Te U Trai u la ong, “Me la isynei mo ïa uta u Kikaïon, ïa uba mem shym la minot, lymne mem shym pynsan ïa u; uba shi miet u la mih, bad shi miet u la ïap:

11 nga te ngam dei ban isynei ïa ka Ninebeh, kata ka nongbah kaba khraw; ha kaba don tam shispah arphew hajar ngut ki briew ki bymithuh ïa la ka kti kamon na la ka kti kadiang; bad shibun ki jingri ruh?”

The Bible Society of India

Bible Society of India
Titsatireni:



Zotsatsa