HEBRU 8 - KA BAIBL

U Jisu u Rangbah Lyngdoh jong ngi

¹ Te shaphang kine kiei kiei ïa kiba ngi kren, kaba kongsan ka long kane: Ngi don U Rangbah lyngdoh kat uta, uba la shong sha ka kti kamon ka khet U Bakhraw Tam ha ki bneng;

² U Shakri ka jaka kyntang, bad kata Ka Tabernakl kaba shisha, ïa kaba U Trai u la pynïeng, ym u briew.

³ Namar la ju thung ïa u rangbah lyngdoh baroh ïa ka ban ainguh da ki jingainguh ruh bad ki jingkñia: namar kata, ka donkam ïa Une ruh ba un don ei ei ban ainguh.

⁴ Te lada u la don ha ka khyndew, un ym da long lyngdoh satia, haba ki don kita ki lyngdoh kiba ju ainguh ïa kita ki jingainguh katba kum ka hukum;

⁵ kiba shakri niam ïa ka dur bad ka syrngiew kita kiei kiei bakynja bneng, kumba la maham ïa u Moses da U Blei, haba un sa thaw ïa kata Ka Tabernakl: namar, “To sumar”, U ong, “ba men thaw ïa kiei kiei baroh katba kum kata ka nuksa ïa kaba la pyni ha me ha uta u lum.”

⁶ Hynrei, mynta, u la ïoh ïa ka kam lyngdoh kaba kham kor, katba kum ba u long ruh U Ksiang ka Jutang kaba kham bha, ïa kaba la pynlong ha ki jingkular kiba kham bha.

⁷ Namar lada kata ka jutang ka banyngkong ka la long ka bymduna, yn ym da la wad jaka ïa ka ba-ar.

⁸ Namar haba shem jingduna ha ki, u ong: “Ha khmih ki sngi ki wan,” ong U Trai, “ba ngan pynlong ka jutang bathymmai bad ka ïing Israel bad ka ïing Judah ruh;

⁹ ym katba kum kata ka jutang ïa kaba nga la pynlong bad ki kpa jong ki, ha kata ka sngi ba nga la btin na ka kti ïa ki ïa ka ban ïalam noh ïa ki na ka ri Ijipt; naba kim shym ïaineh ha kata ka jutang jong nga, nga te nga la leh lyndet ïa ki,” ong U Trai.

¹⁰ “Naba kane ka long kata ka jutang ïa kaba ngan pynlong bad ka ïing Israel hadien kita ki sngi,” ong U Trai: “Ngan buh ïa ki hukum jong nga ha ka jingmut jong ki, bad ha ki dohnud jong ki ngan thoh ïa ki; bad ngan long U Blei jong ki, bad ki, kin long u paidlang jong nga;

¹¹ bad uwei pa uwei baroh un ym hikai ïa la u paramarjan, bad uwei pa uwei baroh ïa la u para, da kaba ong, ‘To ithuh ïa U Trai:’ naba baroh keiñ, kin ithuh ïa nga, naduh i barit tam haduh u bakhraw tam na ki.

¹² Naba ngan isynei ïa ki jingleh bymman jong ki, bad ïa ki pop jong ki ngan ym kynmaw shuh.”

¹³ Da kaba u ong, “ka jutang bathymmai”, u la pynlong rim ïa kata ka banyngkong. Te kata kaba nang rim bad ba nang tymmen ka la jan duh noh.