HEBRU 13 - KA BAIBL

Ka jingshakri kaba pynsngewbha ïa U Blei

¹ To kan ïaineh ka jingïa-ieit parabangeit.

² Wat klet ban pyni ka jingieit ïa ki nongwei: namar da kata la don kiba la pdiang sngewbha ïa ki angel khlem tip.

³ To phin kynmaw ïa ki nongsah byndi, kum kiba la khum lem bad ki; bad ïa kita ïa kiba la leh beiñ, kum kiba long ïa lade hi ruh ha ka met.

⁴ To ka jingshongkurim kan long kaba donburom hapdeng baroh, bad ka jingthiah ka bym da bit-tngit: naba ïa kiba awria bad ïa kiba klim U Blei un bishar.

⁵ To long kiba lait na kaba ieit sbai, da kaba sngewhun bad kita kiei kiei ba phi don; namar u hi u la ong: “Ngan ym iehnoh noh ïa me da lei lei, lymne ngan ym leh lyndet noh ïa me da lei lei.”

⁶ Ba kumta, da ka jingsngewshlur bha ngi ong, “U Trai u long u nongïarap jong nga, ngan ym sheptieng: u briew un leh aïu ïa nga?”

⁷ To kynmaw ïa kita kiba la synshar halor jong phi, kiba la kren ha phi ïa ka ktien U Blei; da kaba pyrkhat ruh ïa ka bakut ka jingim jong ki, to phin ïapyrthuh bud ïa ka jingngeit jong ki.

⁸ U Jisu Khrist u long ujuh mynhynnin, bad mynta, bad sha bymjukut.

⁹ Wat shah ban rong noh ïa phi da ki jinghikai bapher bad bakhyllah; namar ka long kaba myntoi ban pynskhem ïa ka dohnud da ka jingaiei, ym da ki jingbam, ha kiba kita kiba la ïaid ha ki kim shym myntoi.

¹⁰ Ngi don ka duwan na kaba kita kiba shakri ïa kata Ka Tabernakl kim don hok ban bam.

¹¹ Namar ïa ki met jong kita ki mrad ïa kiba ka snam jong ki u rangbah lyngdoh u la wallam namar ka pop sha kata ka Jaka kyntang, la ju thang shabar ka jaka shong dara.

¹² Naba kumta, U Jisu ruh, khnang ba un ïoh pynkyntang ïa u paidbah da ka snam jong u hi, u la shah shabar kata ka khyrdop.

¹³ Namar kata, to ngin ïaleit mih noh sha u shabar kata ka jaka shong dara, da kaba bah ïa ka jingkrenbeiñ jong u.

¹⁴ Namar ngim don hangne ka nongbah kaba ïaineh, hynrei, ngi ïawad ïa kata ka ban sa wan.

¹⁵ Da u, namar kata, to ngin ïa-ai ka jingkñia ka jingïaroh ïa U Blei khlem da pud, kata ka long, u soh ki rmiang shyntur ki baphla ïa ka kyrteng jong u.

¹⁶ Hynrei, ïa kaba leh bha bad kaba ïasam isynei to wat klet phi: namar da kiba kum kita ki jingkñia, yn pynsngewbha eh ïa U Blei.

¹⁷ To kohnguh ïa kita ki nongïalam jong phi, bad to pynhapoh ïa lade ha ki; namar kita ki sharai na ka bynta ki mynsiem jong phi, kum ki ban sa ai ka jingkheiñ; ba kin ïoh leh ïa kane da ka jingkmen bad ym da ka jingsngewsih: namar kane ka bymmyntoi ïa phi.

¹⁸ To ïaduwai na ka bynta jong ngi, namar ngi ngeit ba ngi don ka jingïatiplem babha; ba ngi da kwah ban im hok ha kiei kiei baroh.

¹⁹ Bad kham tam eh nga kyntu ïa phi ban leh ïa kane, ba yn ïoh ai ïa nga pat ha phi kham shen.

Ka jingkyrkhu pynwai

²⁰ Te U Blei ka jingsuk uba la wallam pat na ki baïap ïa U Nongap u bakhraw ki langbrot, da ka snam ka jutang bymjukut, ïa U Jisu U Trai jong ngi keiñ,

²¹ un pynjanai ïa phi ha ka jingleh babha baroh, ïa ka ban leh ïa ka mon jong u, da kaba trei ha phi ïa kata kaba pynsngewbha eh ha khmat jong u, da U Jisu Khrist; ha uba to long ka burom sha ki bymjukut ki bymjukut: Amen.

²² Hynrei, nga kyrpad ïa phi, ko parabangeit, to ïashahshkor ïa kane ka ktien ka jingkyntu: namar da kiba khyndiat ki ktien nga la thoh ha phi.

²³ To phin ïatip ba la pyllait noh ïa u Timothi u parabangeit jong ngi; lem bad u, lada un wan kham shen, ngan wan khmih ïa phi.

²⁴ To phin ïakhublei ïa kita ki nongïalam jong phi baroh, bad ïa ki riewkhuid baroh. Kita kiba na Itali ki ïakhublei ïa phi.

²⁵ To long ka jingaiei lem bad phi baroh: Amen.