HEBRU 11 - KA BAIBL

Shaphang ka Jingngeit

¹ Te ka jingngeit ka long kata ka jingsngewskhem ïa kita kiei kiei ïa kiba ngi kyrmen, kata ka jingtynjuh ïa kita kiei kiei ki bymïohi.

² Namar ha ka, la phla babha ïa kita ki kpa tymmen.

³ Da ka jingngeit, ngi sngewthuh ba la thaw ïa ki pyrthei da ka ktien U Blei, ba kumta, ym shym thaw ïa kita kiei kiei ba ïohi na kita kiei kiei bapaw.

⁴ Da ka jingngeit, u Abel u la ainguh ha U Blei ïa ka jingkñia ba kham kor ban ïa u Kain, da kaba la phla ïa u ba u long u bahok, U Blei u da phla babha shaphang kita ki jingai jong u; bad da ka, haba u la ïap, u dang kren.

⁵ Da ka jingngeit, la pynkynriah noh ïa u Enokh ba un ym ïohi ïa ka jingïap; bad ym shym la shem ïa u, naba U Blei u la lah pynkynriah noh ïa u: namar mynshuwa kata ka jingpynkynriah ïa u, la phla ïa u ba u la pynsngewbha ïa U Blei:

⁶ hynrei, khlem ka jingngeit, ym lah ban pynsngewbha ïa u: namar ka dei ïa uta uba wan hajan U Blei ban ngeit ba u don, bad ba u long uba ai nong ïa kita kiba wad ïa u.

⁷ Da ka jingngeit, u Noah haba la maham ïa u da U Blei shaphang kita kiei kiei ïa ki bym pat shym la ïohi, haba la pynkhih ïa u da ka jingtieng riewblei, u la thaw ka ïinglieng ban pynim ïa ka ïing jong u; da kaba u la pynrem ïa ka pyrthei, bad u la jia long u nongïoh pateng ïa kata ka hok kaba katba kum ka jingngeit.

⁸ Da ka jingngeit, u Abraham haba la khot ïa u, u la kohnguh ban leit noh sha kata ka jaka ïa kaba un sa pdiang ïa ka ban long ka bynta; te u la leit noh, um da tip shaei u leit.

⁹ Da ka jingngeit, u la shong basa ha kata ka ri ka jingkular, kumba ha ka ri ka bymdei la ka jong, u da shong ha ki ïingtrep lem bad u Isaak bad u Jakob, ki nongïaïoh pateng lem ïa kata kajuh ka jingkular:

¹⁰ namar u la ju khmih lynti ïa kata ka nongbah kaba don ki nongrim, kaba u nongtei bad u nongthaw jong ka, long U Blei.

¹¹ Da ka jingngeit, wat ka Sara hi ka la ïoh bor ïa ka ban punkhun haba ka la palat aïom, naba ka la ñiew uba lah ban shaniah ïa uta uba la kular.

¹² Naba kumta ruh, na uwei, bad uta ruh uba la kylla sdot noh, la mih u paid kat ki khlur bneng ha ka jingbun, bad kum u shyiap uba harud duriaw, bym lah ñiew shuh.

¹³ Kine baroh ki la ïap noh ha ka jingngeit, ha bym pat pdiang ïa kita ki jingkular, hynrei, ba la ïohi ïa ki, bad la khublei ïa ki na jngai, ba la ïaphla ba ki la long ki nongwei bad ki sohshnong ha kane ka pyrthei.

¹⁴ Namar kita kiba ong ïa kiei kiei ruh kat kita, ki ïa-pyni shynna ba ki ïawad ïa ka ri la ka jong hi.

¹⁵ Bad shisha lada ki la ju kynmaw ïa kata ka ri na kaba ki la ïamih noh, kin da la ïoh ka por ba bit ban leit phai pat.

¹⁶ Hynrei, mynta, ki ïakwah ïa ka ri ba kham bha, kata ka long kaba kynja bneng; naba kumta, U Blei um sngewlehrain ïa ki, ba yn khot ïa u, “U Blei jong ki”; namar u la khreh ka nongbah ïa ki.

¹⁷ Da ka jingngeit, u Abraham ba la tynjuh ïa u, u la kñia ainguh ïa u Isaak; ho-oid, uta hi uba la lah pdiang da kaba kmen ïa kita ki jingkular, u la kñia ainguh ïa la u khun ba la kha marwei;

¹⁸ ha uba la ong: “Ha u Isaak yn khot ‘u symbai jong me’:”

¹⁹ u da kheiñ ba U Blei u lah ban pynmih pat wat na ki baïap; nangta ruh u la ïoh pdiang pat ïa u ha ka jingsyriem.

²⁰ Da ka jingngeit, u Isaak u la kyrkhu ïa u Jakob bad u Iso, shaphang kiei kiei ki ban sa wan.

²¹ Da ka jingngeit, u Jakob haba un sa ïap, u la kyrkhu ïa uwei pa uwei na ki khun shynrang u Joseph; bad u la mane dem, u da shan ha ka khlieh u diengduh jong u.

²² Da ka jingngeit, u Joseph haba ka bakut jong u ka la jan, u la pynkynmaw shaphang ka jingleit noh ki khun Israel; bad u la ai hukum shaphang ki shyieng jong u.

²³ Da ka jingngeit, ïa u Moses haba la kha ïa u, la buhrieh da ki kmie ki kpa jong u lai bnai, naba ki la ïohi ba u long u khunlung babha lymphuin; bad kim shym sheptieng ïa ka hukum u syiem.

²⁴ Da ka jingngeit, u Moses haba u la rangbah, um treh ban khot ïa u, “u khun ka khun u Pharaoh”;

²⁵ u da jied pynban ban shah shitom lem bad u paidlang U Blei, ban ïa ka ban ïoh ki jingsngewbha ka pop tang shi por;

²⁶ u da ñiew ïa ka jingkrenbeiñ ïa U Khrist ka spah ba kham khraw ban ïa ki jingkynshew ka Ijipt; namar u la khmih keiñ sha kata ka jingïoh bainong.

²⁷ Da ka jingngeit, u la iehnoh ïa ka Ijipt, um da sheptieng ïa ka jingbitar uta u syiem; namar u la ïaineh, kum uba ïohi ïa uta ïa u bym lah ïohi.

²⁸ Da ka jingngeit, u la pynlong ïa kata Ka Niam Ka Jinglait, bad ïa kata kaba synreit ïa ka snam, khnang ba uta uba pynjot ïa kiba kha nyngkong un ym ïoh ktah ïa ki.

²⁹ Da ka jingngeit, ki la ïaleit lyngba ïa kata ka Duriaw Basaw kumba na ryngkew; ïa kaba haba kita ki nong Ijipt ki la pyrshang ban beh ki la ïap jyllop.

³⁰ Da ka jingngeit, ki kynroh ka Jerikho ki la kyllon kram, ynda la ïaid tawiar ïa ki, hynñiew sngi.

³¹ Da ka jingngeit, ym shym la pynjot noh ïa ka Rahab ka nuti lem bad kita ki bymkohnguh, haba ka la pdiang ïa kita ki nongsyntiat da ka jingsuk.

³² Te ïa kaei ngan dang ong shuh? namar kan ym dap ka por ïa nga lada ïathuh shaphang u Gideon, u Barak, u Samson, u Jepthah; shaphang u Dabid ruh bad u Samuel bad kita ki nongïathuhlypa;

³³ kiba, da ka jingngeit, ki la jop noh ïa ki hima, ki la leh ïa ka hok, ki la ïoh ïa ki jingkular, ki la set ïa ka shyntur ki sing,

³⁴ ki la pynlip ïa ka bor ka ding, ki la lait na ka syrti waitlam, ha ka jingtlot la ai bor ïa ki, ki la nang ïoh bor ha ki jingïaleh thma, ki la pynphet ïap ïa ki paidïapom jong ki nongwei.

³⁵ Ki kynthei ki la ïoh pdiang ïa ki baïap jong ki da ka jingpynmihpat; hynrei, ïa kiwei la pynshitom eh, ba kim treh pdiang ïa ka jingpyllait; khnang ba kin ïoh ïa ka jingpynmihpat ba kham bha:

³⁶ hynrei, kiwei pat ki la ïoh ka jingtynjuh da ki jingrkhiebeiñ sat bad ki jingsympat, shisha nalor kata, da ki jingkhum bad ka jingset byndi:

³⁷ la lynthem maw ïa ki, la ot ar liang da ka kurat ïa ki, la pynshoi ïa ki, la pynïap ïa ki da ka waitlam; ki la ïaid kylleng ha ki snieh langbrot, bad ha ki snieh blang; ba kyrduh, ïa kiba la pynshitom sat, ïa kiba la lehbeiñ,

³⁸ (ïa kiba ka pyrthei kam bit ban ïoh), ki da ïaid sakma ha ki ri khlaw bad ki lum, bad ki krem bad ki thliew ka khyndew.

³⁹ Te kine baroh, haba la phla ïa ki da ka jingngeit jong ki, kim shym ïoh pdiang ïa kata ka jingkular:

⁴⁰ ba U Blei u la khreh lypa shaphang jong ngi ïa kaei kaei ruh ba kham bha, khnang ba khlem ma ngi, yn ym ïoh pynjanai ïa ki.