HEBRU 10 - KA BAIBL

¹ Namar kata ka hukum haba ka don tang ka syrngiew kita kiei kiei ki babha ki ban sa wan, ym ka dur hi jong kita kiei kiei, kam lah lano lano ruh ban pynjanai ïa kita kiba wan hajan da kita ki jingkñia kijuh ha la ka snem ka snem, ïa kiba ki ainguh ha la ka sngi;

² lymda kumta, kin ym da la wai noh ban ainguh ïa ki; naba kita kiba mane, haba la pynkhuid ïa ki shi sien, kim don shuh ka jingïatiplem ïa ki pop.

³ Hynrei, ha kita ki jingkñia, don ka jingpynkynmaw ïa ki pop ha la ka snem ka snem.

⁴ Namar ka bym lah ïa ka snam ki masi kyrtong bad ki blang ban kit noh ïa ki pop.

⁵ Naba kumta, haba u wan sha kane ka pyrthei, u ong: “Ïa ka jingkñia bad ïa ka jingainguh mem shym la mon, hynrei, ïa ka met me la khreh ïa nga;

⁶ ïa ki jingainguh thang bad ïa ki jingkñia namar ka pop mem shym la sngewbha.

⁷ Ynda kumta, nga la ong: ‘Ha khmih, nga la wan (ha ka jingkhylliap ka kitab la thoh shaphang jong nga) ïa ka ban leh, A Blei, ïa ka mon jong me.’ ”

⁸ Haba u ong haneng, “Ïa ki jingkñia bad ïa ki jingainguh bad ïa ki jingainguh thang bad ïa ki jingkñia namar ka pop mem shym la mon, lymne mem shym la sngewbha” (ïa kiba la ainguh katba kum kata ka hukum),

⁹ ynda kumta, u la ong, “Ha khmih, nga la wan ïa ka ban leh ïa kata ka mon jong me.” U pyndam noh ïa kata ka banyngkong khnang ba un ïoh pynneh ïa kata ka ba-ar.

¹⁰ Da kata ka mon, la pynkhuid ïa ngi da kata kaba ainguh ïa ka met U Jisu Khrist tang shi sien ai.

¹¹ Te shisha u lyngdoh baroh u ïeng ha la ka sngi u da shakri bad u da ainguh bunsien ïa kita ki jingkñia kijuh, ki bym lah lano lano ruh ban kit noh ïa ki pop;

¹² hynrei, Une, haba u la lah ainguh tang kawei ka jingkñia namar ki pop junom, u la shong ha ka kti kamon U Blei;

¹³ naduh mynta u da khmih lynti tad ynda yn ïoh buh ïa ki nongshun jong u ka jingïuh kjat ïa ki kjat jong u.

¹⁴ Namar da kawei ka jingainguh u la pynjanai ha la ka rta ïa kita ïa kiba la pynkhuid.

¹⁵ Te U Mynsiem Bakhuid ruh u phla ha ngi: namar hadien ba u la ong,

¹⁶ “Kane ka long kata ka jutang ïa kaba ngan thaw bad ki hadien kita ki sngi,” ong U Trai; “ngan buh ïa ki hukum jong nga ha ki dohnud jong ki, bad ha ki jingmut jong ki ruh ngan thoh ïa ki;”

¹⁷ bad “ïa ki pop jong ki bad ïa ki jingpalat jong ki ngan ym kynmaw shuh.”

¹⁸ Te ha kaba don ka jingmap ïa kine, ym don shuh ka jingainguh namar ka pop.

To ngin ïawan hajan ïa U Blei

¹⁹ Namar kata, ko parabangeit, haba ngi don ka jingshlur ïa ka ban leit sha kata ka Jaka kyntang da kata ka snam U Jisu,

²⁰ kata, da ka lynti ïa kaba u la pynkyntang na ka bynta jong ngi, ka lynti bathymmai bad ba-im, lyngba kata ka jingkah, kata ka long, ka met jong u;

²¹ bad haba ngi don U Lyngdoh Bakhraw halor kata ka ïing U Blei,

²² to ngin ïawan hajan da ka dohnud bashisha ha ka jingsngewskhem bha ka jingngeit, ba la synreit ïa ki dohnud jong ngi na ka jingïatiplem basniew, bad ba la sait ïa ki met jong ngi da ka um bakhuid:

²³ to ngin ïabat skhem ïa kata ka jingphla ka jingkyrmen jong ngi ba kan ym khih shuh (namar ïa uba lah ban shaniah keiñ, long uta uba la kular);

²⁴ bad to ngin ïapyrkhat ban ïapynkhih paralok ïa ka jingïa-ieit bad ïa ka jingleh babha;

²⁵ khlem da iehnoh ïa ka jingïaseng lang jong ngi hi, kumba long ka rukom kiwei, hynrei, da ïakyntu paralok hi; bad kata kham tam, katba phi ïohi ïa kata ka sngi ba ka nang jan.

²⁶ Namar lada ngi leh pop da la ka mon hi ynda ngi la ïoh pdiang ïa ka jingtip ïa ka jingshisha, kam sah shuh ka jingkñia namar ki pop,

²⁷ hynrei, ka jingkhmih lynti ba-itieng ïa ka jingbishar, bad ka jingklang ka ding ka ban sa bam duh ïa kita ki nongleh pyrshah.

²⁸ U briew uba la ibeiñ ïa ka hukum u Moses, u ïap noh khlem ka jingisynei da ka ktien ar ngut ne lai ngut ki sakhi:

²⁹ ka jingpynshitom ba kham jur katno, phi tharai, kan dei ïa uta uba la ïuh hapoh ki kjat ïa U Khun U Blei, bad ba la ñiew bymkhuid ïa ka snam ka jutang, da kaba la pynkhuid ïa u, bad ba la lehbeiñ ïa U Mynsiem ka jingaiei?

³⁰ Namar ngi ithuh ïa uta uba la ong: “Ka jingpynhiar kput ka long ka jong nga, ngan leh kylliang ma nga.” Pat ruh: “U Trai un bishar ïa la u paidlang.”

³¹ Ka long kaba itieng ïa ka ban hap ha ki kti U Blei ba-im.

³² Hynrei, to ïakynmaw ïa kita ki sngi ki bamynshuwa, ha kiba, ynda la pynshai ïa phi, phi la shah ïa ka jingïaleh bakhraw ki jingshitom;

³³ ha kawei, haba la pynlong ïa phi ka jingthadrong da ki jingkrenbeiñ ruh bad da ki jingshah jynjar; bad ha kawei pat, haba phi la jia long ki nongïoh bynta lem bad kita kiba la shah lehbeiñ kumta.

³⁴ Namar phi la sngewlem bad kita kiba shah ha ki jingkhum, bad phi la ïashah da kaba kmen ïa ka ban lute ïa kita kiei kiei kiba phi don, da kaba tip skhem ba phi hi, phi don ka bynta kaba kham bha, bad kaba neh.

³⁵ Namar kata, wat bred noh phi ïa kata ka jingshlur jong phi, kaba don ka nong ka bakhraw.

³⁶ Namar phi donkam ïa ka jingïaishah, ba haba phi la ïoh leh ïa ka mon U Blei, phin ïoh pdiang ïa kata ka jingkular.

³⁷ Namar sa tang shibit eh, “Uta uba wan un wan, bad un ym pyntud.

³⁸ Hynrei, uta u bahok jong nga un ïai-im da ka jingngeit; hynrei, lada un kynran da dien, ka mynsiem jong nga kam sngewbha shuh ïa u.”

³⁹ Hynrei, ngi ngim long na kita kiba kynran da dien ïa ka ban jot noh; hynrei, na kita kiba don ka jingngeit ïa ka ban pynim ïa ka mynsiem.