HEBRU 1 - KA BAIBL

U Blei u kren ha ngi ha U Khun jong U

¹ U Blei, haba u la lah kren mynhyndai ha ki kpa tymmen da ki bun bynta bad ha ki bun rukom ha ki nongïathuhlypa, ha kine ki sngi ki bakhatduh u la kren ha ngi ha U Khun;

² ïa uba u la thung ban long u nongïoh pateng ïa kiei kiei baroh, da u ruh, la thaw ïa ki pyrthei;

³ uba haba u long ka jingtyngshaiñ ka burom jong u, bad ka dur hi ka jinglong tynrai jong u, bad uba kyrshan ïa kiei kiei baroh da ka ktien ka bor jong u, haba u la lah pynlong ka jingpynkhuid ïa ki pop, u la shong ha ka kti kamon jong U Bakhraw Tam sha jrong;

⁴ haba u la jia long uba kham bha katta ban ïa ki angel, naba u la ïoh pateng ka kyrteng kaba kham donburom ban ïa ki.

Uba long kham khraw ïa ki angel

⁵ Namar hano na kita ki angel u la ong mynno mynno, “Me, me long U Khun jong nga, ha kane ka sngi nga la pynkha ïa me?” Pat ruh, “Nga ngan long kpa ïa u, u ruh un long Khun ïa nga?”

⁶ Bad mynba u wallam ïa uba la kha nyngkong sha ka pyrthei, u ong: “Bad to ai ba ki angel U Blei baroh kin ïamane ïa u.”

⁷ Bad shaphang kita ki angel, u ong: “Uba pynlong ïa ki angel jong u ki lyer, bad ïa ki shakri jong u, u thylliej ka ding.”

⁸ Hynrei, shaphang uta U Khun, u ong: “Ka khet jong me, A Blei, ka long sha ki bymjukut ki bymjukut; bad u dieng synshar ka hima jong me u long u dieng synshar ka jinglehhok.

⁹ Me la ieit ïa ka hok, bad me la isih ïa ka bymhok; namar kata, U Blei, U Blei jong me keiñ, u la pynsleh ïa me da ka umphniang ka jingkmen tam ïa ki paralok jong me.”

¹⁰ Bad: “Me ha kaba mynnyngkong, A Trai, me la pynshong nongrim ïa ka khyndew; bad ki bneng ki long ki kam ki kti jong me;

¹¹ kita kin jot noh; hynrei, me, me ïaisah: bad kita baroh kum ka jaiñ kin rim noh;

¹² bad kum ka barandi men khylliap ïa ki, kum ka jaiñkup keiñ, bad yn pynpli ïa ki; hynrei, me, me long ujuh, bad ki snem jong me kin ym kut.”

¹³ Hynrei, hano na kita ki angel u la ong mynno mynno, “To shong ha ka kti kamon jong nga, tad ynda ngan pynlong ïa ki nongshun ïa me ka jingïuh hapoh ki kjat jong me”?

¹⁴ Hato kita baroh kim long ki mynsiem bashakri, ïa kiba la phah noh ïa ka ban shakri na ka bynta kita ki ban sa ïoh ïa ka jingpynim?