ESTHER 1 - KA BAIBL

Ka Phasti syiem ka beiñ ïa ka hukum u syiem Ahasueros

¹ Te ha ki sngi u Ahasueros, (une u long uta u Ahasueros, uba la synshar naduh ri India haduh Ethiopia, halor ki shispah arphew hynñiew ki shnat:)

² ha kita ki sngi, mynba u Ahasueros syiem u la shong halor ka khet ka hima jong u, kaba la don ha Shushan kata ka ïingsyiem,

³ ha ka balai snem ka jingsynshar jong u, u la thaw ka jingkhawai ïa ki rangbah bad ki shakri jong u baroh; ka bor ka ri Persha bad Media, ki bakhraw batri bad ki rangbah jong ki shnat, ki ïadon ha khmat jong u:

⁴ haba u la pyni ïa ka spah ka hima ba-donnam jong u bad ka burom ka jinglong syiem babha eh jong u bun sngi, jin shispah phraphew sngi keiñ.

⁵ Bad haba la pyndep ïa kita ki sngi, u syiem u la thaw ka jingkhawai ïa ki briew baroh kiba la don ha Shushan kata ka ïingsyiem, ïa ki bakhraw bad barit, hynñiew sngi, ha ka phyllaw ka kper ka ïing u syiem;

⁶ ki la don ki pyrda ki balieh, ki bajyrngam, bad ki babyrïong, ba la teh da ki ksai linen bani bad basaw bthuh ha ki kyrwoh rupa bad ki païa mawleiñ; ki jingthiah ki la long da ka ksiar bad ka rupa, halor ka tbian ba la siang da u mawleiñ basaw, bad balieh, bad bastem, bad baïong.

⁷ Bad ki la ai jingdih ïa ki ha ki khuri ksiar, (ki khuri kiba ïapher ha la ka jong ka jong,) bad ka Waiñ ïingsyiem kyrhai, katba kum ka jingai kylluid u syiem.

⁸ Bad kaba dih ka la long katba kum ka rukom; ym shym don ba pynbor: namar kumta u syiem u la lah hukum ïa ki nongkam ka ïing jong u baroh ba kin leh katba uwei uwei baroh u sngewbha.

⁹ Ka Phasti syiem ruh ka la thaw jingkhawai ïa ki kynthei ha ka ïingsyiem jong u Ahasueros syiem.

¹⁰ Ha ka sngi ka bahynñiew, haba ka dohnud u syiem ka la kmen da ka Waiñ, u la hukum ïa u Mehuman, u Bistha, u Harbona, u Bigtha, bad ïa u Abagtha, u Sether, bad ïa u Karkas, ki hynñiew ngut ki ïunukh kiba la ju shakri ha khmat u Ahasueros syiem,

¹¹ ban wallam ïa ka Phasti syiem ha khmat u syiem da kaba phong ïa ka pansngiat syiem, ban pyni ha kita ki briew bad ki rangbah ïa ka jingitynnad jong ka, naba ka la long kaba ibhabriew ban khmih ïa ka.

¹² Hynrei, ka Phasti syiem kam treh ban wan ha ka hukum u syiem da kita ki ïunukh: namar kata, u syiem u la bitar lep, bad ka jingbitar jong u ka la meh hapoh jong u.

¹³ Ynda kumta, u syiem u la ong ïa kita ki riewstad, kiba la tip ïa ki por, (naba kumta ka la long ka rukom u syiem ïa kita baroh kiba la tip aiñ bad jingbishar;

¹⁴ bad kiba kham jan ïa u, ki la long u Karsena, u Sether, u Admatha, u Tarsis, u Meres, u Marsena, bad u Memukan, kine hynñiew ngut ki rangbah ka Persha bad ka Media, kiba la ju ïohi ïa ka khmat u syiem, bad kiba shong ha khlieh ha kata ka hima:)

¹⁵ “Ngin leh kumno ïa ka Phasti syiem katba kum ka aiñ, namar ba kam shym leh ïa ka hukum u Ahasueros syiem da ki ïunukh?”

¹⁶ Te u Memukan u la phai ktien ha khmat u syiem bad ki rangbah, “Ka Phasti syiem kam shym leh sniew tang ïa u syiem hi, hynrei, ïa ki rangbah baroh ruh, bad ïa ki jaid bynriew baroh kiba ha ki shnat baroh ki jong u Ahasueros syiem.

¹⁷ Namar kane ka jingleh jong ka syiem kan sa phriang sha ki kynthei baroh, ban pynlong kiba ibeiñ ïa ki tnga jong ki ha ki khmat jong ki, haba yn pynbna ba u Ahasueros syiem u la hukum ban wallam ïa ka Phasti syiem ha khmat jong u, bad ka kam shym wan.

¹⁸ Bad ha kane ka sngi, ki kynthei bakhraw batri jong ka ri Persha bad Media kiba la ïohsngew shaphang ka jingleh jong ka syiem, kin ong kumjuh ha ki rangbah baroh ki jong u syiem. Kumta, kan mih ka jingibeiñ bad ka jingbitar bakhraw.

¹⁹ Lada u syiem u ibit, ai ba yn mih noh ka hukum syiem na u, bad ai ba yn thoh ïa ka hapdeng ki aiñ jong ki nong Persha bad ki nong Mid, ba yn ym pynkylla shuh ïa ka, ba ka Phasti kan ym wan shuh ha khmat u Ahasueros syiem; bad ai ba u syiem un ai ïa ka jinglong syiem jong ka ha kawei pat kaba kham bha ïa ka.

²⁰ Bad haba yn pynbna ïa ka hukum u syiem kaba yn thaw kylleng ka hima jong u baroh, (naba ka long kaba khraw,) ki kynthei baroh kin ai burom ïa ki tnga jong ki, ïa ki bakhraw bad ïa ki barit ruh.”

²¹ Te kata ka jingong, ka la pynsngewbha ïa u syiem bad ïa kita ki rangbah; bad u syiem u la leh katba kum ka ktien jong u Memukan:

²² Namar u la phah ïa ki shithi sha ki shnat jong u syiem baroh, sha kawei pa kawei ka shnat katba kum ka jingthoh jong ka, bad sha kawei pa kawei ka kynja bynriew katba kum ka ktien jong ka, ba uwei uwei u briew baroh u dei ban synshar ha la ka jong ka ïing, bad ba u dei ban pynbna ïa kata katba kum ka ktien ki briew jong u.