ESRA 1 - KA BAIBL

Ka jingpynbna u Seiros

¹ Te ha ka snem ka banyngkong jong u Seiros u syiem ka Persha, khnang ba yn pyndep ïa ka ktien U Trai da ka shyntur u Jeremaïah, U Trai u la pynkhih ïa ka mynsiem u Seiros u syiem ka Persha, kat ban pynlong ka jingpynbna ha ka hima jong u baroh kawei, bad ban buh ïa kata ha kaba thoh de, kaba ong,

² “Kumne u ong u Seiros u syiem ka Persha, ‘U Trai, U Blei ki bneng, U la ai ha nga ïa ki hima ka pyrthei baroh; bad U la hukum ïa nga ban tei ka ïing ïa U ha Jerusalem, kaba ha Judah.

³ Uno uno ruh uba hapdeng jong phi na ki briew jong U baroh, to U Blei jong u, Un long lem bad u, bad ai un leit kiew sha Jerusalem, kaba ha Judah, bad un tei ïa kata ka ïing U Trai, U Blei ki Israel, (Uta keiñ u long “U Blei”) kaba ha Jerusalem.

⁴ Bad jar ïa uba la pynsah, ha kano kano ka jaka ha kaba u la wan wir wanhap, ai ba kita ki trai-shnong ka jaka jong u kin ïarap ïa u da ka rupa, bad da ka ksiar, bad ki mar, bad ki jingri, nalor kata ka jingai sngewbha ïa ka ïing U Blei kaba ha Jerusalem.’ ”

Ka jingwan phai u paidbah sha Jerusalem

⁵ Ynda kumta, ki la ïeng ki rangbah ki ïing ki kpa jong ki Judah bad ki Benjamin, bad ki lyngdoh, bad ki Lebi, bad baroh kat kiba U Blei u la pynkhih ïa ka mynsiem jong ki ban leit kiew ban tei ïa ka ïing U Trai kaba ha Jerusalem.

⁶ Bad kita baroh kiba la don sawdong ïa ki, ki la kyrshan ïa ki kti jong ki da ki khiew ki pliang rupa, da ka ksiar, da ki mar, bad da ki jingri, bad da kiei kiei kiba kordor, nalor kata baroh ba la ai sngewbha.

⁷ Bad u syiem Seiros u la sei noh ïa ki khiew ki pliang jong ka ïing U Trai, ïa kiba u Nebukhadnessar u la lah kit noh na Jerusalem, bad ba u la lah buh ha ka ïing ki blei jong u;

⁸ ïa kita keiñ, u Seiros u syiem ka Persha u la sei noh da ka kti u Mithredath u nongsumar jingkynshew, bad u la kheiñ ïa ki ha u Sheshbassar, u rangbah ki Judah.

⁹ Bad kane ka long ka jingkheiñ jong ki: laiphew tylli ki pliang ksiar, shi hajar, ki pliang rupa; arphew khyndai, ki tari;

¹⁰ laiphew tylli ki khuri ksiar; ki khuri rupa kiba kham poh, sawspah shiphew; bad kiwei pat ki khiew ki pliang, shi hajar.

¹¹ Ki khiew ki pliang baroh bad ksiar bad rupa, ki la long san hajar bad sawspah tylli. Ïa kine baroh u Sheshbassar u la wallam artet, haba ïa kita kiba la ring mraw la ïalam artet na Babilon sha Jerusalem.