EKSODOS 8 - KA BAIBL

¹ Te U Trai u la kren ha u Moses, “To leit ha u Pharaoh, to ong ruh ha u, ‘Kumne u ong U Trai, “To pyllait noh ïa u paidbah jong nga, ba kin ïoh ïashakri ïa nga.

² Te lada mem treh ban pyllait noh ïa ki, ha khmih, ngan shoh ïa ki phang jong me baroh da ki jakoid:

³ bad kata ka wah kan boi da ki jakoid, ki ban sa kiew, kin ïarung ruh shapoh ïing jong me, bad sha ka kamra thiah jong me, bad halor ka jingthiah jong me, bad shapoh ïing ki shakri jong me, bad halor ki briew jong me de, bad sha ki jaka shet kpu jong me, bad sha ki kpu im jong me ruh;

⁴ kita ki jakoid te kin ïarynsied halor jong me, bad halor ki briew jong me, bad halor ki shakri jong me baroh.” ’ ”

⁵ Bad U Trai u la kren ha u Moses, “To ong ha u Aaron, ‘To kner ïa la ka kti bad la u diengduh halor kita ki wah bah, bad halor kita ki wah duid, bad halor kita ki pung de, bad to pynmih ïa ki jakoid halor ka ri Ijipt.’ ”

⁶ Te u Aaron u la kner ïa la ka kti halor kita ki um ka Ijipt; bad ki jakoid ki la ïamih, bad ki la ïatyllup ïa ka ri Ijipt.

⁷ Kita ki nongleh byrtong ruh ki la leh kumjuh da ki jingleh myntor jong ki, bad ki la ïa-pynmih ïa ki jakoid halor ka ri Ijipt.

⁸ Ynda kumta, u Pharaoh u la khot ïa u Moses bad ïa u Aaron, bad u la ong, “To kyrpad ïa U Trai ba un shim noh ïa kine ki jakoid na nga, bad na ki briew jong nga; te ngan sa pyllait noh ïa uta u paidbah, ba kin ïoh kñia ha U Trai.”

⁹ Bad u Moses u la ong ha u Pharaoh, “To ïoh kane ka burom halor jong nga: hamar kano ka por ba ngan kyrpad na ka bynta jong me, bad na ka bynta ki shakri jong me, bad na ka bynta ki briew jong me, ïa ka ban pynduh noh ïa kine ki jakoid na me hi, bad na ki ïing jong me ruh, ba kin long sa tang ha kata ka wah?”

¹⁰ U te u la ong, “Lashai.” Bad u la ong, “To kan long katba kum ka ktien jong me: ba men ïoh tip ba ym don uno uno ruh uba kum U Trai U Blei jong ngi.

¹¹ Bad kita ki jakoid kin ïaleit noh na me, bad na ki ïing jong me, bad na ki shakri jong me, bad na ki briew jong me; kin long sa tang ha kata ka wah.”

¹² Te u Moses bad u Aaron ki la ïaleit noh na khmat u Pharaoh: bad u Moses u la kyrpad eh ha U Trai namar kita ki jakoid ïa kiba u la lah wallam halor u Pharaoh.

¹³ Bad U Trai u la leh katba kum ka ktien u Moses; kita ki jakoid te ki la ïap noh na ki ïing, na ki shnong ruh, bad na ki lyngkha de.

¹⁴ Te ki la ïa-pynlang ïa ki ha ki jaka jaka: kumta, kata ka ri ka la iwtung.

¹⁵ Hynrei, mynba u Pharaoh u la ïohi ba la ïohlait, u la pyneh ïa la ka dohnud, bad um shym la shahshkor ïa ki; kumba U Trai u la lah ong.

Kaba pynkylla jynreiñ ïa ka 'dewmet

¹⁶ Te U Trai u la ong ha u Moses, “To ong ha u Aaron, ‘To kner noh ïa la u diengduh, bad to shoh ïa ka 'dewmet jong kane ka ri ba kan kylla jynreiñ ha ka ri Ijipt kylleng baroh.’ ”

¹⁷ Bad ki la leh kumta; bad u Aaron u la rah ïa la ka kti bad la uta u diengduh, bad u la shoh ïa ka 'dewmet jong ka khyndew, te ka la kylla jynreiñ ha u briew bad ha u mrad; ka 'dewmet jong ka ri baroh keiñ ka la kylla jynreiñ ha ka ri Ijipt kylleng baroh.

¹⁸ Bad kita ki nongleh byrtong ruh, ki la leh kumta, ban pynmih jynreiñ da ki jingleh myntor jong ki, hynrei, kim lah: kumta, la don kita ki jynreiñ ha u briew, bad ha u mrad.

¹⁹ Ynda kumta, kita ki nongleh byrtong ki la ong ha u Pharaoh, “Kane ka long ka shynriah'ti ka jong U Blei:” te pynban, la pyneh ïa ka dohnud u Pharaoh, bad um shym la shahshkor ïa ki; kumba U Trai u la lah ong.

Kaba boi ki skain

²⁰ Te U Trai u la ong ha u Moses, “To khie la dang step lashai, to ïeng ruh ha khmat u Pharaoh; ha khmih, u wan mih sha kata ka um; to ong ruh ha u, ‘Kumne u ong U Trai, “To pyllait noh ïa u paidbah jong nga, ba kin ïoh shakri ïa nga.

²¹ Hynrei, lada men ym pyllait noh ïa u paidbah jong nga, ha khmih, ngan phah ïa ki bun jaid ki skain ha me, bad ha ki shakri jong me, bad ha ki briew jong me ruh, bad hapoh ki ïing jong me; bad ki ïing ki Ijipt kin dap da ki bun jaid ki skain, bad kata ka khyndew ruh ha kaba ki don.

²² Bad ngan pynkyrpang ha kata ka sngi ïa ka ri Goshen, ha kaba ki ïashong u paidbah jong nga, ba kita ki bun jaid ki skain kin ym don hangta; khnang ba men ïoh tip ba nga long U Trai hapdeng ka pyrthei.

²³ Bad ngan buh ïa ka jingïapher hapdeng ki briew jong nga bad ki jong me: te lashai keiñ kan long kane ka dak.” ’ ”

²⁴ Bad U Trai u la leh kumta; bad la boi bun jaid ki skain ba pynshitom eh ha ïing u Pharaoh, bad ha ki ïing ki shakri jong u; bad ha ka ri Ijipt baroh ïa ka ri te la pynsniew noh khoit da kita ki bun jaid ki skain.

²⁵ Te u Pharaoh u la khot ïa u Moses bad ïa u Aaron, bad u la ong, “To khie leit phi, to kñia ïa U Blei jong phi ha kane ka ri.”

²⁶ U Moses te u la ong, “Kam bit ban leh kumta; namar ngin kñia ïa ka jingisih ki Ijipt ha U Trai uba U Blei jong ngi: ha khmih, lada ngin ïakñia ïa ka jingisih ki Ijipt ha khmat jong ki, hato kin ym lynthem ïa ngi?

²⁷ Lai sngi lynti ngin ïaleit sha kata ka ri khlaw, ïa ka ban kñia ha U Trai U Blei jong ngi, katba un hukum ïa ngi.”

²⁸ Bad u Pharaoh u la ong, “Ngan shah ba phin ïaleit, ba phin kñia ha U Trai U Blei jong phi ha kata ka ri khlaw; hynrei, tang ba phin ym leit jngai eh: to duwai na ka bynta jong nga.”

²⁹ Te u Moses u la ong, “Ha khmih, ngan leit mih noh na me, bad ngan kyrpad ruh ha U Trai ba kine ki bun jaid ki skain kin kynriah noh lashai na u Pharaoh, bad na ki shakri jong u, bad na ki briew jong u ruh: hynrei, wat ai ba u Pharaoh un shukor shuh da kaba un ym pyllait noh ïa u paidbah ba kin ïoh kñia ha U Trai.”

³⁰ Haba u Moses u la mih noh na u Pharaoh, u la kyrpad ha U Trai.

³¹ Bad U Trai u la leh kat kum ka ktien u Moses, bad u la pynkynriah noh ïa kita ki bun jaid ki skain na u Pharaoh, na ki shakri jong u, bad na ki briew jong u ruh; ym shym sah shuh iwei ruh.

³² Te u Pharaoh u la pyneh ïa la ka dohnud ha kane ruh, bad um shym la pyllait noh ïa uta u paidbah.