EKSODOS 5 - KA BAIBL

U Moses bad u Aaron ha khmat u Pharaoh

¹ Te hadien kata, u Moses bad u Aaron ki la ïaleit hapoh, bad ki la ïathuh ha u Pharaoh, “Kumne u ong U Trai uba U Blei jong ki Israel, ‘To pyllait noh ïa u paidbah jong nga, ba kin ïoh rakhe ïa Ka Jingkhawai Niam ïa nga ha ri khlaw.’ ”

² Bad u Pharaoh u la ong, “U Trai u long uei, ba ngan kohnguh ma nga ïa ka ktien jong u ïa ka ban pyllait noh ïa ki Israel? Ïa U Trai ngam ithuh, bad ïa ki Israel ngan ym pyllait noh keiñ.”

³ Ki te ki la ïathuh, “U Blei jong ki Hebru u la ïashem bad ngi: to shah ba ngin leit, ngi kyrpad ïa me, lai sngi lynti sha kata ka ri khlaw, ba ngin ïoh kñia ainguh ha U Trai uba U Blei jong ngi; ïoh ba un pynhap halor jong ngi da ka jingïapthem, lane da ka waitlam.”

⁴ Te uta u syiem ka ri Ijipt u la ong ha ki, “Na ka balei ma phi, u Moses bad u Aaron, phi pynpep ïa ki briew na ka jingtrei jong ki? khie leit phi sha la ki jingkit.”

⁵ U Pharaoh u la ong ruh, “Ha khmih, kine ki briew jong kane ka ri mynta ki la bun, bad phi la pynpep ïa ki na ki jingkit jong ki.”

⁶ Bad u Pharaoh u la hukum ha kajuh ka sngi ïa ki sordar jong kita ki briew, bad ïa ki rangbah jong ki, u da ong,

⁷ “Wat ai 'langïap shuh ha kine ki briew ban thaw maw-it kumba baroh shi katta: to kin leit ïalum 'langïap ïa lade.

⁸ Te ka jingkheiñ ki maw-it ïa kiba ki ju thaw mynno mynno ruh, phin buh halor jong ki; wat pynduna satia na kata: naba ki long jaipdeh; namar kata, ki ïapyrta, da kaba ong, ‘To shah ba ngin leit kñia ainguh ïa U Blei jong ngi.’

⁹ To nang pynban khia ïa ka jingtrei halor kine ki briew, ba kin ïatrei shitom ha ka; bad wat shah shuh ba kin ïasngap ïa ki ktien thala.”

¹⁰ Te kita ki sordar jong u paidbah ki la ïamih noh, bad ki rangbah jong ki, bad ki la kren ha u paidbah, ki da ong, “Kumne u ong u Pharaoh, ‘Ngan ym ai 'langïap shuh ïa phi.

¹¹ Khie leit phi, to wad 'langïap ïa lade kat shaba phin shem ïa u: pynban, yn ym pynduna satia na ka jingtrei jong phi.’ ”

¹² Kumta, uta u paidbah u la saphred kylleng ka ri Ijipt ban ïalum ïa u 'lang kba ha ka jaka u 'langïap.

¹³ Te kita ki sordar ki la pynkyrkieh ïa ki, da kaba ong, “To pyndep noh ïa ki jingtrei jong phi, ïa la ka bynta shi sngi shi sngi, kum mynba la don u 'langïap.”

¹⁴ Te la shoh ïa ki rangbah jong ki khun Israel, ïa kiba la buh ki sordar u Pharaoh halor jong ki, bad la kylli ïa ki ruh, “Na ka balei ba phim shym la pyndep noh ïa la ka bynta da kaba thaw maw-it mynhynnin bad mynta de, kumba mynno mynno ruh?”

¹⁵ Ynda kumta, ki rangbah ki khun Israel ki la ïawan kyrpad ha u Pharaoh, ki da ong, “Na ka balei me leh kumne bad la ki shakri?

¹⁶ Kim ai shuh ïa u 'langïap ïa ki shakri jong me, bad la ong ha ngi, ‘To thaw maw-it:’ te ha khmih, la shoh ïa ki shakri jong me; hynrei, ka palat ka long ka jong ki briew jong me hi.”

¹⁷ Hynrei, u la ong, “Phi jaipdeh, phi jaipdeh keiñ: namar kata, phi ong, ‘To shah ngin ïaleit kñia ainguh ïa U Trai.’

¹⁸ Namar kata, khie leit mynta, bad trei; naba yn ym ai 'langïap shuh ha phi, pynban, phin ai ïa kajuh ka jingkheiñ ki maw-it.”

¹⁹ Bad ki rangbah ki khun Israel ki la ïohi ba ki la long ha ka jingjynjar, haba la ong, “Phin ym pynduna satia ïa ki maw-it, kiba long ka bynta jong phi ha la ka sngi ka sngi.”

²⁰ Te ki la ïashem bad u Moses bad u Aaron, kiba la ïeng ha ka lynti, haba ki la ïawan mih noh na u Pharaoh:

²¹ bad ki la ong ha ki, “To U Trai un khmih ha phi, bad un bishar de; namar phi la pynlong ïa ngi ban iwkhong ha khmat u Pharaoh, bad ha khmat ki shakri jong u, ba phi la ai ka waitlam ha ka kti jong ki ban pynïap ïa ngi.”

Ka jingkyrpad u Moses

²² Te u Moses u la leit phai pat sha U Trai, bad u la ong, “A Trai, na ka balei ba me la pynsniew ïa une u paidbah? balei ba me la phah ïa nga?

²³ Namar naduh ba nga la wan ban kren ha u Pharaoh ha ka kyrteng jong me, u la pynsniew ïa une u paidbah; bad mem shym la pyllait noh satia ïa la ki briew.”