EKSODOS 3 - KA BAIBL

Ka jingkhot ïa u Moses

¹ Te u Moses u la dang ap ïa ka kynhun u Jethro u kthaw kurim jong u, uba u lyngdoh ka ri Midian: bad u la ïalam ïa kata ka kynhun sha lyndet ka ri khlaw, bad u la wan sha u lum U Blei, sha Horeb keiñ.

² Bad u angel U Trai u la mihpaw ha u ha ka thylliej ding napdeng ka 'law lynnong: te u la khmih, bad ha khmih, kata ka 'law lynnong ka la ing da ka ding, hynrei, kata ka 'law lynnong kam ing duh noh.

³ Te u Moses u la ong, “Ngan phai kyrpang mynta ban khmih ïa kane ka jingipaw bakhraw, na ka balei ba ka 'law lynnong kam ing duh noh.”

⁴ Te mynba U Trai u la ïohi ba u la phai kyrpang ban jngoh, U Blei u la khot ïa u napdeng kata ka 'law lynnong, bad u da ong, “Ko Moses, Ko Moses.” U te u la ïathuh, “Ha khmih ma nga.”

⁵ Te u la ong, “Wat wan hajan shane: to da loit noh ïa ki juti jong me na la ki sla'jat, naba kata ka jaka ha kaba me ïeng ka long ka khyndew bakyntang.”

⁶ U la ong ruh, “Nga long ma nga U Blei u kpa jong me, U Blei u Abraham, U Blei u Isaak, bad U Blei u Jakob de.” Bad u Moses u la buhrieh ïa la ka khmat; naba u la sheptieng ban khmih ha U Blei.

⁷ U Trai u la ong ruh, “Nga la ïohi shisha ïa ka jingshitom ki briew jong nga kiba ha ka ri Ijipt, bad nga la ïohsngew ïa ka jinglynñiar jong ki namar ki sordar jong ki; naba nga la tip ïa ka jingsngewsih sat jong ki;

⁸ bad nga la wan hiar ma nga ban pyllait noh ïa ki na ka kti ki Ijipt, bad ban ïalam noh ïa ki na kata ka ri sha ka ri babha bad bakhraw, sha ka ri keiñ kaba tuid da ka dud bad ka ngap; sha ka jaka ki Kanaan, bad ki Hit, bad ki Amor, bad ki Peris, bad ki Hib, bad ki Jebus de.

⁹ Mynta te namar kata, ha khmih, ka jinglynñiar ki khun Israel ka la wan kiew sha nga: bad nga la ïohi ïa kata ka jingbanbeiñ da kaba kita ki Ijipt ki la ïabanbeiñ ïa ki.

¹⁰ Namar kata, ale mynta te, ngan phah ïa me sha u Pharaoh, ba men ïoh ïalam noh ïa ki briew jong nga ki khun Israel keiñ, na ka ri Ijipt.”

¹¹ Hynrei, u Moses u la ong ha U Blei, “Nga, nga long uei, ba ngan leit sha u Pharaoh, bad ba ngan ïalam noh ïa ki khun Israel na ka ri Ijipt?”

¹² U te u la ong, “Shisha ngan long lem bad me; bad kane kan long ka dak ïa me, ba ma nga hi nga la phah ïa me: ynda me la ïalam noh ïa ki briew jong nga na ka ri Ijipt, phin ïoh shakri ïa U Blei halor une u lum.”

¹³ Bad u Moses u la ïathuh ha U Blei, “Ha khmih, haba ngan wan sha ki khun Israel, bad ngan ong ha ki, ‘U Blei ki kpa jong phi u la phah ïa nga ha phi’; bad ba kin kylli ïa nga, ‘Kaei ka kyrteng jong u?’ ngan ong aïu ha ki?”

¹⁴ Bad U Blei u la ïathuh ha u Moses, “NGA long ba NGA long”: u la ong ruh, “Kumne men ong ha ki khun Israel, NGA long u la phah ïa nga ha phi.”

¹⁵ Nalor kane U Blei u la ong ruh ha u Moses, “Kumne men ong ha ki khun Israel, ‘U Trai uba U Blei ki kpa jong phi, U Blei u Abraham, U Blei u Isaak, bad U Blei u Jakob ruh, u la phah ïa nga ha phi’: kane ka long ka kyrteng jong nga ha la ka rta, bad kane ka long ka jingpynkynmaw ïa nga sha ki pateng bynriew baroh.

¹⁶ To leit, to ïalum lang ruh ïa ki tymmen basan jong ki Israel, bad to ong ruh ha ki, ‘U Trai uba U Blei ki kpa jong phi, U Blei u Abraham, u Isaak, bad u Jakob de, u la mihpaw ha nga, u da ong, “Shisha nga la wan jngoh ïa phi, bad nga la ïohi ïa kaba la leh ïa phi ha ka ri Ijipt;

¹⁷ nga la ong ruh, Ngan ïalam noh artet ïa phi na ka jingshitom ka ri Ijipt sha ka ri ki Kanaan, bad ki Hit, bad ki Amor, bad ki Peris, bad ki Hib, bad ki Jebus ruh de, sha ka ri kaba tuid da ka dud bad ka ngap.” ’

¹⁸ Ki te kin sngap ïa ka ktien jong me: bad men wan, ma me, bad ki tymmen basan jong ki Israel, sha u syiem ka ri Ijipt, bad phin ong ha u, ‘U Trai, uba U Blei jong ki Hebru, u la ïashem bad ngi: mynta te ngi kyrpad ïa me, to ai ba ngin ïaleit lai sngi lynti sha ri khlaw, ba ngin ïoh kñia ainguh ïa U Trai uba U Blei jong ngi.’

¹⁹ Te nga tip skhem ba u syiem ka ri Ijipt un ym shah ïa phi ban leit, lymda da ka kti badonbor.

²⁰ Namar kata, ngan kner ïa la ka kti, bad ngan shoh ïa ka ri Ijipt da ki kam phylla jong nga baroh ïa kiba ngan sa leh hapdeng jong ka: hadien kata te, un sa pyllait noh ïa phi.

²¹ Bad ngan ai ha une u paidbah ka jingsngewbha ha khmat ki Ijipt: kan sa jia ruh, ha kaba phin leit noh, phin ym leit noh suda,

²² hynrei, ka kynthei baroh kan pan na la ka paramarjan, bad na kata kaba shong basa ha ïing jong ka, ïa ki jingdeng rupa, bad ïa ki jingdeng ksiar, bad ïa ki jaiñkup jaiñsem: bad phin pynkup ïa ki ha ki khun shynrang jong phi bad ha ki khun kynthei jong phi; bad phin lute ïa ki Ijipt.”