EKSODOS 2 - KA BAIBL

Ka jingkha ïa u Moses

¹ Te u la leit uwei u briew na ka ïing u Lebi, bad u la shongkurim ïa ka khun u Lebi.

² Bad kata ka kynthei ka la punkhun, bad ka la kha khun shynrang de; te haba ka la ïohi ba u long uba bhabriew, ka la buhrieh ïa u, lai bnai.

³ Te haba kam lah buhrieh shuh ïa u, ka la thaw ka shang ïa u da ki thungshut, bad ka la lape ïa ka da ka 'dewbyrtha bad da ka bsiang ruh; bad ka la buh ïa ita i khunlung hapoh ruh, bad ka la buh ïa ka hapdeng ki kor harud kata ka wah.

⁴ Te ka hynmen jong u ka la ïeng na sha jngai, ban ïoh tip aïu kan sa jia ïa u.

⁵ Te ka khun u Pharaoh ka la wan hiar ban sum ha kata ka wah; bad ki shakri kynthei jong ka ki la ïaid kai harud ka wah; te haba ka la ïohi ïa kata ka shang hapdeng ki kor, ka la phah shim ïa ka ha ka shakri jong ka.

⁶ Te ynda ka la plie ïa ka, ka la ïohi ïa ita i khunlung; te ha khmih, ita i khunlung i ïam. Bad ka la sngewsynei ïa u, ka la ong ruh, “Une u long uwei na ki khun Hebru.”

⁷ Ka hynmen jong u te ka la ong ha ka khun u Pharaoh, “Ngan leit khot ka nongbat khun ïa pha na ki kynthei Hebru, ba kan ïoh ri ïa ita i khunlung ïa pha?”

⁸ Bad ka khun u Pharaoh ka la ong ha ka, “Khie leit.” Te kata ka khynnah ka la leit, bad ka la khot ïa ka kmie jong ita i khunlung.

⁹ Ka khun u Pharaoh te ka la ong ha ka, “To shim noh ïa ine i khunlung, bad to ri ruh ïa i na ka bynta jong nga, bad ngan ai ïa ka bainong jong pha.” Kata ka briew te ka la shim ïa ita i khunlung, bad ka la ri ïa i.

¹⁰ Te mynba uta u khynnah u la san, ka la wallam ïa u ha ka khun u Pharaoh, bad u la long u khun jong ka. Bad ka la khot ka kyrteng jong u, “u Moses”: namar, ka la ong, “na ka um nga la sei ïa u.”

U Moses u phet ïap sha ka ri Midian

¹¹ Ka la jia ruh ha kita ki sngi, mynba u Moses u la rangbah, ba u la mih shabar sha ki para jong u, bad u la khmih ïa ki jingkit jong ki: bad u la ïohi ïa uwei u Ijipt ba u da shoh ïa u Hebru uba na ki para jong u.

¹² Bad u la khmih shane bad shawei, te haba u la ïohi bymdon mano mano, u la pynïap ïa uta u Ijipt, bad u la buhrieh ïa u ha u shyiap.

¹³ Te mynba u la leit pat ha ka sngi ka ba-ar, ha khmih, ar ngut kiba na ki Hebru ki la ïashoh: te u la ong ha uta uba la leh bymdei, “Na ka balei ba me shoh ïa la u para?”

¹⁴ U te u la ong, “Uei ba la pynlong syiem bad nongbishar ïa me halor jong ngi? Me mut ma me ban pynïap ïa nga, kumba me la pynïap ïa uta u Ijipt?” Te u Moses u la sheptieng, bad u la ong ruh, “Shisha ïa kane la bna.”

¹⁵ Te mynba u Pharaoh u la ïohsngew ïa kane, u la thew ban pynïap noh ïa u Moses. Hynrei, u Moses u la phet ïap noh na khmat u Pharaoh, bad u la shong sah ruh ha ka ri Midian: bad u la shong lyngngeit harud ka pukri.

¹⁶ Te u lyngdoh ka ri Midian u la don hynñiew ngut ki khun kynthei: bad kita ki la wan tong um, bad ki la pyndap ïa ki shyngoid ïa ka ban ai um ïa ki kynhun langbrot u kpa jong ki.

¹⁷ Hynrei, ki nongaplangbrot ki la wan bad ki la beh noh ïa ki: hynrei, u Moses u la ïeng joit bad u la ïarap ïa ki, u la ai um ruh ïa ki kynhun langbrot jong ki.

¹⁸ Te haba ki la ïawan ha u Reuel u kpa jong ki, u la kylli, “Kumno ba phi la ïawan shen katta katta mynta?”

¹⁹ Ki la ïathuh te, “U kynja Ijipt u la pyllait noh ïa ngi na ka kti kita ki nongaplangbrot, bad u la tong um ruh biang ïa ngi, bad u la ai um ïa ka kynhun langbrot.”

²⁰ Te u la kylli ïa la ki khun kynthei, “Shano te u don? balei phi la iehnoh ïa uta u rangbah? to khot ïa u ban bam jingbam.”

²¹ Bad u Moses u la sngewbha ban shong duh bad uta u briew: u te u la ai kurim ha u Moses ïa ka Sipporah ka khun jong u.

²² Ka te ka la kha khun shynrang, bad u la khot ka kyrteng jong u, “u Gershom”: naba u la ong, “nga la long u nongwei ha ka ri nongwei.”

²³ Ka la jia te hadien bun sngi, ba u la ïap noh uta u syiem ka ri Ijipt: te ki khun Israel ki la ïa-ud namar kata ka jinglongmraw, bad ki la ïalynñiar ruh, bad kata ka jinglynñiar jong ki ka la wan kiew sha U Blei namar kata ka jinglongmraw.

²⁴ Bad U Blei u la sngew ïa ka jingud jong ki, bad U Blei u la kynmaw ruh ïa ka jutang jong u bad u Abraham, bad u Isaak, bad u Jakob ruh.

²⁵ Te U Blei u la khmih isynei ruh ha ki khun Israel, bad U Blei u la ïit ithuh ïa ki.