EKSODOS 10 - KA BAIBL

Ka jingshoh da ki puit

¹ Te U Trai u la ong ha u Moses, “To leit shapoh ha u Pharaoh: namar nga la pyneh ïa ka dohnud jong u, bad ïa ka dohnud ki shakri jong u, ba ngan ïoh pyni ïa kine ki dak phylla jong nga ha khmat jong u:

² bad ba me ruh men pynsngew ha la ki khun, bad ha u khun jong u khun jong me, ïa kiei kiei kat kiba nga la leh ha ka ri Ijipt, bad ïa ki dak phylla jong nga ïa kiba nga la trei hapdeng jong ki; khnang ba phin ïoh tip ba ma nga, nga long U Trai.”

³ Te u Moses bad u Aaron ki la ïawan ha u Pharaoh, bad ki la ong ha u, “Kumne u ong U Trai U Blei jong ki Hebru, ‘Slem katno ba men ym kohnguh ban pynrit ïa lade ha khmat jong nga? to pyllait noh ïa u paidbah jong nga, ba kin ïoh shakri ïa nga.

⁴ Namar lada men ym treh ban pyllait noh ïa u paidbah jong nga, ha khmih, lashai ngan sa wallam ïa ki puit sha ki phang jong me:

⁵ bad kin sa ïatyllup noh lin ïa ka khyndew, kat ban ym ïohi ïa ka khyndew: kin sa bam lut ruh ïa kaba la lait, kaba dang sah ha phi na uta u phria, bad kin sa bam lut ïa u dieng baroh uba mih ha phi ha ka lyngkha:

⁶ bad kin sa pyndap ïa ki ïing jong me, bad ïa ki ïing ki shakri jong me baroh, bad ïa ki ïing ki Ijipt baroh; kat kita lymne ki kpa jong me lymne ki kpa ki kpa jong me, kim shym la ïohi, naduh kata ka sngi ba ki la mih ha ka pyrthei haduh kane ka sngi.’ ” Te haba u la phai, u la mih noh na u Pharaoh.

⁷ Te ki shakri u Pharaoh ki la ïa-ong ha u, “Slem katno une u briew un long ka jingriam ïa ngi? To pyllait noh ïa kita ki briew, ba kin ïoh shakri ïa U Trai U Blei jong ki: balei mem pat tip ba la pynjot ïa ka ri Ijipt?”

⁸ Te la wallam pat ïa u Moses bad ïa u Aaron ha u Pharaoh: bad u la ong ha ki, “To khie noh, to shakri ïa U Trai U Blei jong phi: hynrei, kino ki ban leit?”

⁹ Te u Moses u la ïathuh, “Ngin ïaleit bad ki samla bad ki tymmen jong ngi, lem bad ki khun jong ngi ruh shynrang bad kynthei, lem bad ki langbrot bad ki masi jong ngi ruh de ngin leit; naba ngi donkam ban rakhe Ka Jingkhawai Niam ïa U Trai.”

¹⁰ Te u la ong ha ki, “Ai ba U Trai un long kumta lem bad phi, kumjuh kumba ngan pyllait noh ïa phi, lem bad ki khunlung jong phi: ha khmih, phi don ka jingpyrkhat basniew.

¹¹ Ym kumta: to khie leit tang ma phi kiba rangbah, bad to shakri ïa U Trai; naba ïa kata phi la lah kwah.” Te kumta, la beh noh ïa ki na khmat u Pharaoh.

¹² U Trai te u la ong ha u Moses, “To kner ïa la ka kti halor ka ri Ijipt ïa ka ban pynmih ïa ki puit, ba kin ïoh kiew halor ka ri Ijipt, bad ba kin ïoh bam duh ruh ïa u jhur jong kane ka ri baroh, ïa kaba sah baroh na kaba shoh u phria.”

¹³ Te u Moses u la kner ïa la u diengduh halor ka ri Ijipt, bad U Trai u la pynmih ïa ka lyer na mihngi halor ka khyndew ha kata baroh shi sngi, bad baroh shi miet; ynda la mynstep te, ka lyer na mihngi ka la wallam ïa ki puit.

¹⁴ Kita ki puit te ki la ïakiew halor ka ri Ijipt baroh kawei, bad ki la ïashong ruh ha ki phang baroh jong ka ri Ijipt: kiba jynjar eh; mynshuwa kita, ym pat ju don ki puit kat kita, lymne hadien jong ki yn ym long shuh kat kita.

¹⁵ Naba ki la ïatyllup noh lin ïa ka khyndew baroh, katba la pyndum ïa kata ka ri ruh; bad ki la ïabam lut ïa u jhur ka khyndew baroh, bad ïa ki soh na ki dieng baroh kiba la sah na kata kaba shoh phria: te ym shym la sah shuh ei ei ruh ka bajyrngam, ha ki dieng lane ha ki jhur ha ka lyngkha, ha ka ri Ijipt baroh kawei.

¹⁶ Ynda kumta, u Pharaoh u la khot ïa u Moses bad ïa u Aaron da kaba kyrkieh; bad u la ong, “Nga la leh pop ïa U Trai U Blei jong phi, bad ïa phi ruh.

¹⁷ Mynta te, nga kyrpad ïa me, to map ïa ka pop jong nga sa tang kane shi sien hi, bad to kyrpad ruh ïa U Trai U Blei jong phi, ba un shim noh na nga sa tang kane ka jingpynïap.”

¹⁸ Te ynda u la leit noh na u Pharaoh, u la kyrpad ha U Trai.

¹⁹ Bad U Trai u la pynphai da ka lyer bah na sepngi, kaba la shim noh ïa kita ki puit, bad la bred ïa ki ruh sha ka Duriaw Basaw; ym sah shuh iwei i puit ruh ha ki phang baroh ka ri Ijipt.

²⁰ Hynrei, U Trai u la pyneh ïa ka dohnud u Pharaoh, ba kumta un ym pyllait noh ïa ki khun Israel.

Ka jingdum tliw tliw

²¹ Te U Trai u la ong ha u Moses, “To rah ïa la ka kti sha bneng, ba ka jingdum kan long halor ka ri Ijipt, ka jingdum ruh kaba da lah ban tba.”

²² Bad u Moses u la rah ïa la ka kti sha bneng; te ka la long ka jingdum tliw tliw lai sngi ha ka ri Ijipt baroh;

²³ kim ïaïohi shuh paralok hi, lymne uno uno ruh um shym la ïeng na la ka jaka lai sngi: hynrei, ha ki khun Israel baroh la don ka jingshai ha ki jaka shong jong ki.

²⁴ U Pharaoh te u la khot ïa u Moses, bad u la ong ruh, “To khie leit phi, to shakri ïa U Trai; kin sah sa tang ki langbrot bad ki masi jong phi: to ai ba ki khynnah jong phi ruh kin leit lem bad phi.”

²⁵ Te u Moses u la ong, “Men ai ruh ha ngi ïa ki jingkñia bad ïa ki jingainguh thang, ba ngin ïoh kñia ainguh ha U Trai U Blei jong ngi.

²⁶ Ki jingri jong ngi ruh kin ïaleit lem bad ngi; yn ym iehnoh ïa kawei ka khnap hadien; naba na kita keiñ ngin ïashim ban ïamane ïa U Trai U Blei jong ngi; te ngim tip da ei ngi dei ban mane ïa U Trai, katba ngim pat poi hangta.”

²⁷ Hynrei, U Trai u la pyneh ïa ka dohnud u Pharaoh, te um treh ban pyllait noh ïa ki.

²⁸ Te u Pharaoh u la ong ha u, “Khie leit noh na nga, to sumar ïa lade, ba phin ym ïohi ïa ka khmat jong nga shuh; naba ha kata ka sngi ba men ïohi ïa ka khmat jong nga, men ïap.”

²⁹ U Moses te u la ong, “Me la kren kaba dei; ngan ym ïohi shuh ïa ka khmat jong me.”