EKLESIASTIS 1 - KA BAIBL

Baroh ka long kaba thala

¹ Ki ktien u Nongïathuhkhana, u khun u Dabid, u syiem ha Jerusalem.

² “Ka jingthala jong ki jingthala,” ong u Nongïathuhkhana; “ka jingthala jong ki jingthala, baroh ka long kaba thala.”

³ Ka jingmyntoi aïu u briew u don na ka jingtrei jong u baroh kaba u trei hapoh ka sngi?

⁴ Kawei ka pateng bynriew ka leit noh, bad kawei pat ka wan; te ka khyndew ka neh ha la ka rta.

⁵ Ka sngi ruh ka mih, bad ka sngi ka sep, bad ka leit kyrkieh sha la ka jaka na kaba ka mih.

⁶ Ka lyer ka leit shaphang shathie, bad ka tawiar sawdong shaphang shatei; ka tawiar sawdong borabor ha la ka lynti, bad ka lyer ka phai pat ha la ki lynti.

⁷ Ki wah baroh ki tuid sha ka duriaw, pynban, ka duriaw kam dap; ha kata ka jaka sha kaba ki wah ki tuid, shata ki tuid pat.

⁸ Kiei kiei baroh ki la dap da ka jingsngewbtai; u briew um lah ïathuh shuh: ka khmat kam hun da kaba ïohi, lymne ka shkor kam dap da kaba ïohsngew.

⁹ Kata kaba la lah long, long kata ka ban sa long; bad kata kaba la lah leh, long kata ka ban sa leh: te ym don ei ei ka bathymmai hapoh ka sngi.

¹⁰ Don ei ei kaba ki briew ki ong, “Ha khmih, kane ka long ka bathymmai?” Ka la lah long lypa keiñ ha ki rta kiba la long shuwa ïa ngi.

¹¹ Ym don jingkynmaw ei ei ïa ki pateng bynriew kiba mynshuwa; lymne kan ym long ka jingkynmaw ei ei ïa ki pateng bynriew kiba hadien ki ban sa wan, hapdeng kita ki ban wan hadien.

Ka jingshem u Nongïathuhkhana

¹² Nga, u Nongïathuhkhana, nga la long u syiem halor ki Israel ha Jerusalem.

¹³ Bad nga la buh la ka dohnud ban wad bad ban ïit da ka jingstad shaphang kiei kiei baroh ba ju leh hapoh ka bneng: ka long ka jingshitom sat kaba U Blei u la ai ïa ki khun bynriew ba kin dup mlien da kata.

¹⁴ Nga la ïohi ïa ki kam baroh ba ju leh hapoh ka sngi; bad ha khmih, baroh ka long kaba thala bad kaba beh ïa ka lyer.

¹⁵ Ïa kata kaba la 'dor ym lah ban pynbeit: bad ïa kata kaba duna ym lah ban kheiñ.

¹⁶ Nga la ïasyllok bad la ka dohnud, nga da ong, “Ha khmih, nga la ïoh ha lade ïa ka jingstad bakhraw tam ïa kita baroh kiba la long mynshuwa jong nga ha Jerusalem: shisha keiñ, ka dohnud jong nga ka la ïoh mad shibun na ka jingstad bad ka jingtip.”

¹⁷ Bad nga la buh la ka dohnud ban tip ïa ka jingstad, bad ban tip ïa ka jinglamwir bad ïa ka jingbieit; nga la shemphang ba kane ruh, ka la long kaba beh ïa ka lyer.

¹⁸ Namar haba bun ka jingstad don bun ka jingsngewsih: bad uta uba pynroi ïa ka jingtip u pynroi ïa ka jingsngewsih.