DANIEL 3 - KA BAIBL

Ka jingpyllait na ka lawar ding

¹ U Nebukhadnessar syiem u la thaw ka durblei da ka ksiar, ka jingjrong jong ka, ka la long hynriewphew pruh, bad ka pyngkiang jong ka hynriew pruh: u la pynïeng ïa ka ha ka pyntha Dura, ha ka shnat ka Babilon.

² Ynda kumta, u Nebukhadnessar syiem u la phah ban ïalum lang ïa ki lyngskor, ki deputi, bad ki nongsynshar, ki nongbishar, ki khajanshi, ki riewsaid, ki najir, bad ki nongsynshar baroh jong ki shnat, ban wan sha ka jingpynkyntang jong kata ka durblei kaba u Nebukhadnessar syiem u la lah pynïeng.

³ Ynda kumta, ki lyngskor, ki deputi, bad ki nongsynshar, ki nongbishar, ki khajanshi, ki riewsaid, ki najir, bad ki nongsynshar baroh jong ki shnat, ki la ïawan lang sha ka jingpynkyntang jong kata ka durblei kaba u Nebukhadnessar syiem u la lah pynïeng; bad ki la ïeng ha khmat kata ka durblei kaba u Nebukhadnessar u la lah pynïeng.

⁴ Ynda kumta, u nongpyrta u la pyrta jam, “La hukum ïa phi, ko ki kynja bynriew, ki jaid bynriew, bad ki ktien,

⁵ ba hamar ka por ba phi ïohsngew ïa ka jingsawa ka jingput, ka sharati, ka bajna, ka tangmuri, ka nebel, ka dulsimar, bad ki kynja jingtem baroh, phin dem phin mane ruh ïa ka durblei ksiar ïa kaba u Nebukhadnessar syiem u la pynïeng:

⁶ bad uno uno u bym dem bym mane yn sa bred ïa u ha kata kajuh ka por hapdeng ka lawar ding ba la thang rhem.”

⁷ Namar kata, ha kata ka por, haba kita ki kynja bynriew baroh ki la ïohsngew ïa ka jingsawa jong kata ka jingput, ka sharati, ka bajna, ka tangmuri, ka nebel, bad ki kynja jingtem baroh, kita ki kynja bynriew baroh, ki jaid bynriew, bad ki ktien, ki la dem ki la mane ruh ïa kata ka durblei ksiar kaba u Nebukhadnessar syiem u la lah pynïeng.

⁸ Te ha kata ka por, don ki Khaldi kiba la ïawan, bad ki la mudui ïa ki Jiw.

⁹ Ki la ïathuh bad ki la ong ha u Nebukhadnessar syiem, “Ko syiem, to im ha la ka rta.

¹⁰ Me, ko syiem, me la buh ka hukum, ba uno uno u briew uba ïohsngew ïa ka jingsawa jong kata ka jingput, ka sharati, ka bajna, ka tangmuri, ka nebel, ka dulsimar, bad ka kynja jingtem baroh, un dem un mane ïa kata ka durblei ksiar:

¹¹ bad ba uno uno u bym dem bym mane, yn bred noh ïa u hapdeng ka lawar ding ba la thang rhem.

¹² Don ki Jiw ïa kiba me la buh halor ki kam ka shnat jong ka Babilon: u Shadrak, u Meshak, bad u Abednego; kine ki briew, ko syiem, kim shym suidñiew ïa me: kim shakri ïa ki blei jong me, lymne mane ïa kata ka durblei ksiar kaba me la pynïeng.”

¹³ Ynda kumta, u Nebukhadnessar ha la ka jingbitar bad ka jingotshla u la hukum ban wallam ïa u Shadrak, ïa u Meshak, bad ïa u Abednego. Ynda kumta, ki la wallam ïa kine ki briew ha khmat u syiem.

¹⁴ U Nebukhadnessar u la ïathuh bad u la ong ha ki, “Ka long kaba shisha, ko Shadrak, Meshak bad Abednego, ba phim shakri ïa u blei jong nga, lymne mane ïa kata ka durblei ksiar kaba nga la pynïeng?

¹⁵ Mynta, lada phi la khreh hamar ba phi ïohsngew ïa ka jingsawa jong kata ka jingput, ka sharati, ka bajna, ka tangmuri, ka nebel, ka dulsimar, bad ki kynja jingtem baroh, ban dem ban mane ïa kata ka durblei ïa kaba nga la thaw, bha: hynrei, lada phim mane, yn sa bred noh ïa phi ha kata kajuh ka por hapdeng ka lawar ding ba la thang rhem; bad uei uta U Blei uba lah ban pyllait ïa phi na ki kti jong nga?”

¹⁶ U Shadrak, u Meshak, bad u Abednego, ki la ïathuh bad ki la ong ha u syiem, “Ko Nebukhadnessar, ngim donkam ban jubab ïa me ha kane.

¹⁷ Lada ka long kumta, U Blei jong ngi ïa uba ngi shakri u lah ban pyllait ïa ngi na ka lawar ding ba la thang rhem; bad un pyllait ïa ngi ruh na ka kti jong me, ko syiem.

¹⁸ Hynrei, lada ym kumta, to tip me, ko syiem, ba ngin ym shakri ïa ki blei jong me, lymne mane ïa kata ka durblei ïa kaba me la pynïeng.”

¹⁹ Ynda kumta, la pyndap ïa u Nebukhadnessar da ka jingbitar lep, bad ka dur ka khmat jong u ka la kylla pyrshah ïa u Shadrak, ïa u Meshak, bad ïa u Abednego: namar kata, u la kren bad u la hukum ba kin kham pynshit ïa kata ka lawar ding hynñiew shah ban ïa kaba la ju pynshit.

²⁰ Bad u la hukum ïa ki briew kiba khlaiñ kiba don ha ki shipai jong u ban khum ïa u Shadrak, ïa u Meshak, bad ïa u Abednego, bad ban bred noh ïa ki hapoh kata ka lawar ding ba la thang rhem.

²¹ Ynda kumta, la khum ïa kine ki briew lem bad ki patlun jong ki, ki jingspong jong ki, ki jaiñkup jong ki, bad kiwei kiwei pat ki jingphong jong ki, bad la bred noh ïa ki hapdeng kata ka lawar ding ba la thang rhem.

²² Namar kata, namar ba ka hukum u syiem ka la long kaba kyrkieh eh, bad ba ka lawar ding ka la rhem eh, ka thylliej jong kata ka ding ka la pynïap ïa kita ki briew kiba la bred ïa u Shadrak, ïa u Meshak, bad ïa u Abednego.

²³ Te kine lai ngut ki briew, u Shadrak, u Meshak, bad u Abednego, ki la hap ba la khum hapdeng kata ka lawar ding ba la thang rhem.

²⁴ Ynda kumta, u Nebukhadnessar syiem u la lyngngoh, bad u la ïeng joit shisyndon: u la kren bad u la ong ha ki riewsaid jong u, “Ym shym dei lai ngut ki briew kiba ngi la bred ba la khum hapdeng kata ka ding?” Ki la ïathuh bad ki la ong ha u syiem, “Shisha, ko syiem.”

²⁵ U la ïathuh bad u la ong, “Ha khmih, nga ïohi saw ngut ki briew kiba laitluid, ki da ïaid kai hapdeng ka ding, bad kim don jingmynsaw ei ei ruh em; te ka dur uba saw ka long kum u khun ki blei.”

²⁶ Ynda kumta, u Nebukhadnessar u la wan hajan ka jingkhang jong kata ka lawar ding ba la thang rhem: u la kren bad u la ong, “Ko Shadrak, Meshak, bad Abednego, phi ki shakri jong U Blei U Bahakhlieh Tam Eh, to ïamih noh, to ale shane.” Ynda kumta, u Shadrak, u Meshak, bad u Abednego, ki la ïamih noh napdeng ka ding.

²⁷ Te ki lyngskor, ki deputi, bad ki nongsynshar, bad ki riewsaid jong u syiem, haba ki la ïawan lang, ki la ïohi ïa kine ki briew, ba ka ding kam shym don bor ei ei halor ki met jong ki, lymne bym shym la ing u 'ñiuh khlieh jong ki, lymne ym shym la kylla ki jaiñ jong ki, lymne ym shym don ka jingiw ding ha ki.

²⁸ Ynda kumta, u Nebukhadnessar u la kren bad u la ong, “Long ba la kyrkhu ïa U Blei jong u Shadrak, u Meshak, bad u Abednego, uba la phah ïa u angel jong u, bad uba la pyllait ïa ki shakri jong u kiba la shaniah ha u, kiba la pynkylla ïa ka hukum u syiem, bad kiba la aiti noh ïa la ki met, ba kin ym shakri lymne mane ïa uno uno u blei, hynrei, tang ïa U Blei jong ki hi.

²⁹ Namar kata, nga buh ïa ka hukum, ba kino kino ki kynja bynriew, ki jaid bynriew, bad ki ktien, ki ban kren ei ei ka bymdei ïa U Blei jong u Shadrak, u Meshak, bad u Abednego, yn ot lyngkhot lyngkhai ïa ki, bad yn pynlong synrum ïa ki ïing jong ki: namar ym don uwei pat U Blei uba lah ban pyllait kum ha kane ka rukom.”

³⁰ Ynda kumta, u syiem u la kyntiew nam ïa u Shadrak, ïa u Meshak, bad ïa u Abednego, ha ka shnat jong ka Babilon.