1 TIMOTHI 2 - KA BAIBL

Ka jingkyntu bad ka jingpyni ban duwai

¹ Te nga kyntu nyngkong eh namar kata, ban pynlong ki jingkyrpad, ki jingduwai, ki jingïasaid, ki jingainguh, na ka bynta ki briew baroh;

² na ka bynta ki syiem bad ki bakhraw batri baroh; ba ngin ïoh im ka jingim kaba suk bad ba jar jar ha ka jingriewblei bad jingshida baroh.

³ Kane ka long ka babha bad kaba pdiang hun ha khmat U Blei U Nongpynim jong ngi;

⁴ uba mon ba ki briew baroh kin ïohlait im, bad ba kin poi sha ka jingtip ïa ka jingshisha.

⁵ Namar don uwei U Blei, bad uwei u ksiang ruh hapdeng U Blei bad ki briew, U Khrist Jisu, uba u hi ruh u briew;

⁶ uba la aiti ïa lade ban long ka jingsiewspah ïa baroh, ïa ka ban phla ha ki por kiba dei hi.

⁷ Sha kaba la thung ïa nga u nongïalap bad u apostol (nga ong ïa kaba shisha ha U Khrist, ngam lamler keiñ), u nonghikai ïa ki Jentil ha ka jingngeit bad ka jingshisha.

⁸ Nga kwah, namar kata, ïa ki rangbah ban duwai ha ka jaka baroh, da kaba rah ïa ki kti bakhuid khlem ka jingbitar bad ka jingïasaid.

⁹ Kumjuh ruh, ba ki kynthei kin pynitynnad ïa lade ha ka jaiñkup ba don akor, lem bad ka jingshida bad ka jingsngew-adkar; ym da ka jingthain shñiuh, lane da ka ksiar, lane da ki paila, lane da ka jaiñkup bakordor;

¹⁰ hynrei, (kaba dei keiñ ïa ki kynthei kiba pynpaw ïa ka jinglong riewblei) da ki jingleh babha.

¹¹ To ai ba ka kynthei kan nang ha kaba sngap jar da ka jingkohnguh baroh.

¹² Hynrei, ngam shah ïa ka kynthei ban hikai, lymne ban ïoh synshar halor u rangbah, hynrei, ban long ha kaba sngap jar.

¹³ Namar ïa u Adam la thaw nyngkong, hadien kata, ïa ka Im.

¹⁴ Bad ym shym la shukor ïa u Adam, hynrei, kata ka kynthei haba ka la shah shukor, ka la kyllon ha ka jingpalat.

¹⁵ Hynrei, yn pynim ïa ka ha kaba kha khun, lada kin ïaineh ha ka jingngeit bad ka jingieit bad ka jingpynkhuid lem bad ka jingsngew-adkar.