PROBERB 17 - Khasi CL Bible (BSI)

¹ Ka kham bha ban bam ïa u kpu ba la tyrkhong lem bad ka jingsuk mynsiem ban ïa kaba bam khawai ha ka ïing kaba dap da ki jingjynjar.

² U shakri uba sian un ïoh long khlieh halor u khun bymlarkam jong u kynrad bad ïohpdiang shi bynta na ka jingïohpateng.

³ Ïa ka ksiar bad ïa ka rupa la phrang ha ka ding, bad ïa ka dohnud jong u briew la phrang da U Trai.

⁴ Ki briew kiba sniew ki sngap ïa ki jingmut kiba sniew, bad ki nongshukor ki sngap ïa ki jingshukor.

⁵ Lada phi rkhiebeiñ ïa ki briew kiba duk, phi ñiewbeiñ ïa U Blei uba la thaw ïa ki. Phin shah pynshitom lada phi leh sngewbha ha ka apot jongno jongno.

⁶ Ki riewtymmen ki sngewsarong ïa la ki jong ki ksiew, kumba ki khynnah ki sngewsarong ïa la ki jong ki kpa.

⁷ Ki briew kiba donburom kim ju kren ïa kaba lamler, bad kiba bieit kim don ei ei kaba dondor ban ong.

⁸ Don ki briew kiba pyrkhat ba kaba pynbam sap ka treikam kum ka myntor; ki ngeit ba ka lah ban leh lut ïa kiei kiei.

⁹ Lada phi kwah ba ki briew kin sngewtynnat ïa phi, to map ïa ki haba ki kum leh bakla ïa phi. To kynmaw ba ki jingbakla ki lah ban pynpra ïa ka jingïadei paralok.

¹⁰ U briew uba shemphang u ïoh jinghikai kham bun na kawei ka jingsneng ban kaba uba bieit u ïoh jinghikai na kaba shah sympat shispah sien.

¹¹ Ka jingïap kan wan kum u nonglamktien barunar ïa ki riewbymman kiba pynkhih jingkulmar borabor.

¹² Ka kham bha ban ïakynduh ïa ka dngiem kaba la duh noh ïa la ki khun ban ïa kaba ïakynduh ïa uno uno uba bieit uba bunkam ha ka kam mutlop.

¹³ Lada phi siew kylliang ïa kaba bha da kaba sniew, da lei lei phin ym lah ban beh ïa kaba sniew na ka ïing jong phi.

¹⁴ Ka jingsdang ïa ka jingïakajia ka long kum ka jingbthei banyngkong jong ka den-um; pynsangeh ïa ka ha shuwa ba kan ïaid sha khmat.

¹⁵ Kaba pynrem ïa kiba lui lui lane kaba pynksan ïa ki bymman — baroh ar ki long ka jingijli ha U Trai.

¹⁶ Kam wanrah ei ei kaba bha lada pynlut pisa ha ka jingpynnang pynstad ïa uba bieit, namar um don jingshemphang satia.

¹⁷ Ki paralok borabor ki pynpaw ïa ka jingieit jong ki. Ki hynmen ki para ki dei na ka bynta kaei lada kim ïarap lem ha por jingjynjar?

¹⁸ Tang u briew u bym don jingsngewthuh un kular ban kitkhlieh ïa ki ram jong uwei pat.

¹⁹ Ban sngewtynnat ïa ka pop ka long ban sngewtynnat ban thaw jingkulmar. Lada phi kob man ka por, phi pan kwah ïa ka jingjynjar.

²⁰ Uno uno uba pyrkhat bad kren ïa kaba sniew u lah ban khmih lynti ban ym shem ei ei kaba bha — tang ka jingpynjot.

²¹ Ym don ei ei ïa u kpa hynrei ka jingsngewsih bad jingkthang haba u khun jong u leh ïa ki kam bieit.

²² Kaba dap da ka jingkmen ka pynlong ïa phi ban shait ban khlaiñ. Ban sngewdiaw man ka por ka long ka jingïap suki pa suki.

²³ Ki nongbishar kiba bamsap ki pdiang ïa ki jingai ha kaba rieh, bad nangta kam don ka jingbishar hok.

²⁴ U briew uba shemphang u thew ban leh ïa ka kam bastad, hynrei uba bieit u sdang shisien sdang na ki liang baroh.

²⁵ U khun uba bieit u pynsngewsih ïa la u kpa bad u pynbabe da ki jingkthang ïa la ka kmie.

²⁶ Kam long kaba dei ban pynlong ïa u briew balui lui ban siew ïa ka kuna; ka pynkylla khongpong ïa ka jingbishar bahok haba ki briew kiba bha ki shah pynshitom.

²⁷ Uba sngewskhem ha lade um kren ha ki por baroh. Ki briew kiba long jai jai ki don ka jingïohi jngai da shisha.

²⁸ Nalor baroh, wat ïa uba bieit la pyrkhat ba u long uba stad bad shemphang lada u shu shong jar jar bad set ïa la ka shyntur.