OBADAÏAH 1 - Khasi CL Bible (BSI)

¹ Kane ka dei ka jingïathuhlypa jong u Obadaïah — kaei kaba U Trai Nongsynshar u la ong shaphang ka jaitbynriew Edom. U Trai u la phah ïa u nonglamktien ha ki jaitbynriew, bad ngi la ïohsngew ïa ka khubor jong u: “To pynkhreh! Ïa ngin leit ïaleh thma pyrshah ïa ka Edom!”

U Trai un pynshitom ïa ka Edom

² U Trai u ong ïa ka Edom, “Ngan pynlong ïa pha kaba tlot bor; baroh kin ibeiñ ïa pha.

³ Ka jingsarong jong pha ka la shukor ïa pha. Ka nongbah jong pha ka long ka kut mawsiang baskhem; ka ïing jong pha ka don ha kliar ki lumbah, bad kumta phi ong ha lade, ‘Uei uba lah ban pynhiar ïa nga sha tbian?’

⁴ Wat la pha pynlong ïa la ka ïing shajrong kat ka skum pukni, khnang ba yn i kumba ka don hapdeng ki khlur, pynban ngan pynhiar ïa pha sha tbian.

⁵ “Haba ki nongtuh ki wan mynmiet, ki rah tang ïa kaei kaba ki kwah. Haba ki briew ki lum ïa ki sohwaiñ, borabor ki pynsah khyrdong khyndiat. Hynrei ki nongshun jong pha ki la pyndam noh khoit ïa pha.

⁶ Ko ki khun ki ksiew u Iso, ïa ki jingkynshew bakordor jong phi la lute.

⁷ Kiba ïateh lok bad phi ki la shukor ïa phi; ki la beh noh ïa phi na la ka ri. Ki briew kiba ïasuk bad phi, mynta ki la jop ïa phi. Kito ki paralok kiba ju ïabam lang bad phi, ki la pynap jingriam ïa phi; ki ong shaphang jong phi, ‘Shano kato ka jingstad-buit baroh ba u don?’

⁸ “Ha ka sngi ba nga pynshitom ïa ki Edom, ngan pynduh noh ïa ki rangbah basian buit jong ki bad pynjah noh ïa ka jingstad jong ki baroh.

⁹ Ki rangbah nongïaleh jong ka Teman kin kyiuh, bad ïa uwei pa uwei u shipai ha Edom yn pynïap.”

Ki daw na ka bynta ka jingpynshitom ïa ka Edom

¹⁰ “Namar ba pha lute bad pynïap ïa la ki hynmen ki para shynrang, ki khun ki ksiew u Jakob, ïa pha yn pynjot bad pynjahburom junom.

¹¹ Pha ïeng sharud ha kata ka sngi haba ki nongshun ki pynpra ïa ki khyrdop jong ki. Pha la long kaba sniew kum kito ki nongwei kiba rah noh ïa ka spah jong ka Jerusalem bad pynbynta ïa ka hapdeng jong ki hi.

¹² Pha la dei ban ym risa beiñ halor ka jingshem jynjar jong ki hynmen ki para jong pha ha Judah. Pha la dei ban ym lehkmen ha ka sngi ka jingpynjot ïa ki. Pha la dei ban ym rkhie ïa ki ha ka jingjynjar jong ki.

¹³ Pha la dei ban ym rung shapoh ka nongbah jong ki briew jong nga ban risa beiñ halor ki jingshah shitom jong ki bad ban kurup ïa ka spah jong ki ha ka sngi ka jingjot jong ki.

¹⁴ Pha la dei ban ym ïeng ha ka jaka ba ïashem ki lad ban kem ïa kito kiba pyrshang ban lait im. Pha la dei ban ym aiti ïa ki sha ki nongshun ha ka sngi jong ka jingshipa jong ki.”

U Blei un bishar ïa ki jaitbynriew

¹⁵ “Ka sngi ka la jan ha kaba ma nga, U Trai, “ngan bishar ïa ki jaitbynriew baroh. Ko Edom, ïa kaei kaba pha la leh yn sa leh ha pha. Phan sa ïoh pat ïa kaei kaba pha la ai.

¹⁶ Ki briew jong nga ki la dih ïa ka khuri bakthang jong ka jingpynshitom ha u lum bakyntang jong nga. Hynrei ki jaitbynriew ha baroh sawdong kin dih ïa ka khuri kaba kham kthang jong ka jingpynshitom; kin dih ïa ka baroh bad kin jah syndon.”

Ka jingjop jong ki Israel

¹⁷ “Hynrei ha u lum Seïon kin don ki ban lait im, bad kan long ka jaka bakyntang. Ki briew jong u Jakob kin ïohkynti ïa ka ri kaba dei hok ka jong ki.

¹⁸ “Ki briew jong u Jakob bad jong u Joseph kin long kum ka ding; kin pynjot ïa ki briew u Iso kumba ka ding ka thang ïa u phlangïap. Yn ym don uba hiarpateng na u Iso u ban lait im. Ma nga, U Trai, nga la kren.

¹⁹ “Ki briew na ka Judah bashathie kin ïoh ïa ka Edom; kito kiba na ki kjat lum shaphang sepngi kin knieh ïa ka Philistia; ki Israel kin ïoh ïa ka ri Ephraim bad Samaria; ki briew jong ka Benjamin kin shim ïa ka Gilead.

²⁰ Ka kynhun kiba shah ringmraw na ka Israel bashatei kan wan phai bad jop ïa ka Phoenisia jngai bah shaphang shatei haduh ka Sarephath. Kiba shah ringmraw na Jerusalem kiba don ha Sardis kin kurup ïa ki shnong jong ka Judah bashathie.

²¹ Ki rangbah nongjop jong ka Jerusalem kin tur ïaleh ïa ka Edom bad kin synshar halor jong ka. Bad U Trai da lade hi un long u Syiem.”