JOSHUA 9 - Khasi CL Bible (BSI)

Ki Gibeon ki shukor ïa u Joshua

¹ Ïa ki jingjop jong ki Israel la bna ha baroh ki syiem kiba shaphang sepngi jong ka Jordan — ha ki lumrit, ha trai ki lum, bad ha ka pyntha rud duriaw jong ka Duriaw Mediterranian haduh ka Lebanon ha ka phang bashatei; kine ki dei ki syiem jong ki Hit, ki Amor, ki Kanaan, ki Peris, ki Hib, bad ki Jebus.

² Ki la ïakynduh lang baroh bad ki la ïasnohkti lang ban ïaleh pyrshah ïa u Joshua bad ki Israel.

³ Hynrei ki paidbah jong ka Gibeon, kiba dei ki Hib, ki la ïohsngew ïa kaei kaba u Joshua u la leh ïa ka Jerikho bad ïa ka Ai,

⁴ bad ki la ïa-rai ban shukor ïa u. Ki la leit bad rah katto katne ka jingbam bad ki pynkit ha ki kada jong ki da ki byrni jot bad ki pla snieh waiñ kiba la syrdep.

⁵ Ki phong da ki jaiñjot bad ki slipar snieh ba la jot kiba la dep syrdep. U kpu ba ki rah u long uba tyrkhong bad uba bthuh.

⁶ Nangta ki la leit sha ka jaka shong dara ha Gilgal, bad ki ong ha u Joshua bad ha ki Israel, “Ngi la wan na ka ri kaba jngai. Ngi kwah ïa phi ban ïateh lok bad ngi.”

⁷ Hynrei ki Israel ki ong, “Balei ngin pynlong ka jingïateh lok bad phi? Ka lah ban long pynban ba phi shong phi sah hajan.”

⁸ Ki ong ha u Joshua, “Ngi kloi ban shakri ïa phi.” U Joshua u kylli ïa ki, “Phi dei mano? Nangno phi ïawan?”

⁹ Nangta ki ïathuh ha u ïa kane ka khana: “Bah, ngi la wan na ka ri kaba jngai, namar ngi la ïohsngew shaphang U Trai U Blei jong phi. Ngi la ïohsngew ïa kaei kaei baroh kaba u la leh ha Ijipt

¹⁰ bad kaei kaba u la leh ïa ki ar ngut ki syiem Amor kiba ha ka phang mihngi jong ka Jordan: u Sihon u syiem ka Heshbon bad u Og u syiem ka Bashan, uba shong ba sah ha Ashtaroth.

¹¹ Ki nongïalam jong ngi bad ki briew baroh kiba shong ha ka ri jong ngi ki ong ïa ngi ban khreh katto katne ka jingbam na ka bynta ka jingleit bad ban leit ïakynduh ïa phi. La ong ba ngi dei ban buh ïa lade ban shakri ïa phi bad ban kyrpad ïa phi ban ïateh lok bad ngi.

¹² Khmih ïa u kpu jong ngi. Mynba ngi mihnoh na ïing bad u bad wan ban ïakynduh ïa phi, u dang syiad. Hynrei ha khmih! Mynta u la tyrkhong bad la bthuh.

¹³ Haba ngi pyndap ïa kine ki pla snieh waiñ, ki dang thymmai, hynrei ha khmih! Ki la jot. Ki jaiñ bad ki juti jong ngi ki la jot namar ka jingïaid lynti kaba jngai.”

¹⁴ Ki Israel ki la pdiang katto katne ka jingbam na ki, hynrei kim shym kynjoh ktien na U Trai shaphang kata.

¹⁵ U Joshua u pynlong ka jingïateh lok bad ki briew jong ka Gibeon bad u la shah ïa ki ba kin im. Ki nongïalam jong ka kynhun ki Israel ki ai ka jingkular skhem ba kin bat ïa kata ka jingïateh lok.

¹⁶ Lai sngi hadien kata ka jingïateh lok, ki Israel ki sa tip ba kine ki briew ki dei shisha kiba shong basah hajan.

¹⁷ Kumta ki paid Israel ki la mihnoh, bad hadien lai sngi ki la poi ha ki nongbah ha kaba kine ki briew ki shong: Ka Gibeon, ka Shephirah, ka Beeroth bad ka Kiriath Jearim.

¹⁸ Hynrei ki Israel kim lah ban pynïap ïa ki, namar ba ki nongïalam jong ki, ki la pynlong ka jingkular bakyntang ha ka kyrteng U Trai, U Blei ki Israel. U paidbah baroh u la ujor ha ki nongïalam shaphang kane,

¹⁹ hynrei ki jubab, “Ngi la pynlong ka jingkular bakyntang jong ngi ha ki ha ka kyrteng U Trai U Blei ki Israel. Mynta ngim lah ban pynmynsaw ïa ki.

²⁰ Ngin hap ban shah ïa ki ba kin im namar ka jingkular jong ngi; lada ngim leh kumta, U Blei un pynshitom ïa ngi.

²¹ To ai kin im, hynrei kin dei ban long ki nongthoh dieng bad ki nongtong um na ka bynta jong ngi.” Kane ka long kaei kaba ki nongïalam ki la ai jingmut.

²² U Joshua u hukum ba yn wallam ha u ïa ki briew jong ka Gibeon, bad u kylli ïa ki, “Balei phi shukor ïa ngi bad ïathuh ha ngi ba phi dei kiba na sha jngai, haba phi shong phi sah hangne?

²³ Namar ba phi leh kumne, U Blei u la pynrem ïa phi. Ki briew jong phi kin ïailong ki mraw, kiba thoh dieng bad kiba kit um ïa ka jaka kyntang U Blei jong nga.”

²⁴ Ki la jubab, “Bah, ngi la leh ïa ka namar ngi la tip shisha ba U Trai U Blei jong phi u la hukum ïa u Moses u shakri jong u ban ai ha phi ïa ka ri baroh kawei, bad ban pynïap ïa ki briew baroh kiba shong ha ka katba phi nang ïaid sha khmat. Ngi la leh ïa ka namar ba ngi la sngewsheptieng ïa phi; ngi don ha ka jingsyier ïa la ka jingim.

²⁵ Mynta ngi don hapoh ka bor jong phi, leh ha ngi ïa kaei kaba phi pyrkhat ba ka long kaba dei.”

²⁶ Kumta kane ka dei kaba u Joshua u la leh: u ïada ïa ki bad um shym la shah ïa ki Israel ban pynïap ïa ki.

²⁷ Hynrei ha kajuh ka por u la pynlong mraw ïa ki ban thoh dieng bad kit um ïa ki paid Israel bad ïa ka duwan U Trai. Haduh kane ka sngi ki la ïai bteng ïa kane ka kam ha ka jaka kaba u Trai u la jied ban mane ïa u.