JOSHUA 6 - Khasi CL Bible (BSI)

Ka jingkyllon ka Jerikho

¹ Ïa ki khyrdop Jerikho la khang khop bad la ap phira ban ym ïohrung ki Israel. Ym don mano mano ba lah ban rung shapoh lane mih shabar ka nongbah.

² U Trai u ong ha u Joshua, “Nga buh ha ki kti jong me ïa ka Jerikho, lem bad u syiem jong ka bad ïa ki shipai bashlur jong u baroh.

³ Ma me lem bad ki shipai jong me men ïaid tawiar ïa ka nongbah shisien shi sngi haduh hynriew sngi.

⁴ Hynñiew ngut ki lyngdoh, uwei uwei uba rah ïa ka turoi, kin ïaid ha shuwa ka Synduk ka Jutang. Ha ka sngi kaba hynñiew, ma me lem bad ki shipai jong me, men ïaid tawiar hynñiew sien ïa ka nongbah katba ki lyngdoh ki dang put ïa ki turoi.

⁵ Nangta ki dei ban pynsawa ïa kawei ka sur kaba jlan. Tang mar shu ïohsngew ïa kata, ki briew baroh ki dei ban risa jam, bad ki kynroh jong ka nongbah kin khyllem. Nangta ka kynhun shipai baroh kawei kan leit beit beit shapoh ka nongbah.”

⁶ U Joshua u la khot ïa ki lyngdoh bad ong ha ki, “Shim ïa ka Synduk ka Jutang, bad hynñiew ngut na phi kin leit ha shuwa jong phi, da kaba kieng ïa ki turoi.”

⁷ Nangta u la hukum ïa la ki briew ban sdang ïaid tawiar ïa ka nongbah, lem bad ka kynhun shipai kaba ïaid ha khmat ka Synduk ka Jutang U Trai.

^8-9 Kumta, kumba u Joshua u la hukum, ka kynhun shipai ka la ïaid ha shuwa ki lyngdoh kiba put ïa ki turoi; hadien jong kine bud sa ki lyngdoh kiba bah ïa ka Synduk ka Jutang U Trai, kiba la bud pat da ka kynhun shipai na shadien. Ha ki por baroh la put ïa ki turoi.

¹⁰ Hynrei u Joshua u la hukum ïa ki briew ban ym risa, lane kren shikyntien ruh tad haduh ba un da ai hukum.

¹¹ Kumta u la phah ïa kane ka kynhun ki rangbah ban rah ïa ka Synduk ka Jutang sawdong ka nongbah shisien. Nangta ki wan phai pat sha ka jaka shong dara bad ki sahmiet hangta.

^12-13 U Joshua u la khie dang step phyrngab ha ka sngi kaba bud, bad ha ka sien kaba ar ki lyngdoh bad ki shipai ki la ïaid tawiar ïa ka nongbah ha kajuh ka rukom kumba ki la leh ha ka sngi kaba la dep: nyngkong, ka kynhun shipai na sha khmat; hadien kata, ki hynñiew ngut ki lyngdoh kiba put ïa ki hynñiew tylli ki turoi; nangta, ki lyngdoh kiba bah ïa ka Synduk ka Jutang U Trai; bad khatduh, ka kynhun shipai na shadien. Ha ki por baroh la put ïa ki turoi.

¹⁴ Ha kane ka sngi kaba ar, ki ïaid tawiar biang ïa ka nongbah shisien bad nangta ki leit phai sha ka jaka shong dara. Ki la leh kumne haduh hynriew sngi.

¹⁵ Ha ka sngi kaba hynñiew ki la khie dang step phyrngab bad ki ïaid tawiar hynñiew sien ïa ka nongbah ha kajuh ka rukom — dei tang ha kane ka sngi ba ki ïaid tawiar ïa ka hynñiew sien.

¹⁶ Ha ka sien ïaid tawiar kaba hynñiew, hamar ba ki lyngdoh kin put ïa ki turoi, u Joshua u hukum ïa u paidbah ban risa, bad u ong, “U Trai u la ai ha phi ïa ka nongbah!

¹⁷ Ïa ka nongbah bad baroh kiba don ha ka dei ban pynjot thiaw kum ka jingainguh ha U Trai. Tang ïa ka Rahab ka nuti bad ïa ka longïing longsem jong ka yn pyllait im, namar ka la pynrieh ïa ki nongsyntiat jong ngi.

¹⁸ Hynrei phim dei ban rah ïa kano kano kaba dei ïa ka ban pynjot; lada phi leh kumta, phin wanrah ka jingjynjar bad ka jingpynjot ïa ka jaka shong dara ki Israel.

¹⁹ Baroh kaba la shna da ka rupa, ka ksiar, ka rnong lane ka nar, la buh kyrpang na ka bynta U Trai. Dei ban buh ïa kata ha ka ïing jingkynshew U Trai.”

²⁰ Kumta ki lyngdoh ki put ïa ki turoi. Uta u paidbah, u tang shu ïohsngew ïa kata, u la risa jam, bad kita ki kynroh ki la khyllem. Te ki shipai baroh ki leit beit beit sha u lum sha kata ka nongbah bad ki kurup ïa ka.

²¹ Da ki waitlam jong ki, ki pynïap ïa uwei pa uwei hapoh ka nongbah, ki rangbah bad ki kynthei, ki samla bad ki tymmen. Ki la pynïap lut ruh ïa ki jingri, ki langbrot, bad ki kada.

²² Nangta u Joshua u ong ïa ki ar ngut ki rangbah kiba la shakri kum ki nongsyntiat, “Khie leit sha ka ïing jong ka nuti bad wan ïalam ïa ka bad ïa ka longïing longsem jong ka, kumba phi la kular ïa ka.”

²³ Kumta ki leit bad wan ïalam ïa ka Rahab, lem bad ïa u kpa bad ka kmie jong ka, ki hynmen ki para jong ka, bad ki ba-ha-ïing ha-sem jong ka kiba dang sah. Ki shim ïa ki baroh, ki longïing longsem bad ki mraw, sha ka jaka bashngain hajan ka jaka shong dara ki Israel.

²⁴ Nangta ki wiang ding ïa ka nongbah bad ki thang khoit ïa ka, lem bad baroh kiba don ha ka, lait noh kita kiei kiei kiba la shna da ka ksiar, ka rupa, ka rnong bad ka nar, ïa kaba ki la shim bad buh ha ka ïing jingkynshew U Trai.

²⁵ Hynrei u Joshua u la pyllait im ïa ka Rahab ka nuti bad ïa ki ba-ha-ïing ha-sem jong ka baroh, namar ba ka la pynrieh ïa ki ar ngut ki nongsyntiat kiba u la phah sha Jerikho. (Ki khun ki ksiew jong ka ki shong ki sah ha Israel haduh kane ka sngi.)

²⁶ Ha kata ka por, u Joshua u maham tyngeh, u da ong, “Uta uba pyrshang ban tei thymmai ïa ka nongbah Jerikho un long hapoh ka jingtim jong U Trai! “Uta uba seng ïa ka nongrim un duh noh ïa la u khun nyngkong; Uta uba tei ïa ki khyrdop un duh noh ïa la u khun khatduh!”

²⁷ Kumta U Trai u la don ryngkat lem bad u Joshua, bad ka nam jong u ka saphriang kylleng kata ka ri.