JOSHUA 19 - Khasi CL Bible (BSI)

Ka jaka ba la ai ha ka jait Simeon

¹ Ka jingsam kaba ar ka long na ka bynta ki longïing na ka jait Simeon. Ka jaka jong ki ka ïar shaduh ka ri kaba la ai ha ka jait Judah.

² Ka kynthup ïa ka Beersheba, ka Sheba, ka Moladah,

³ ka Hasar Shual, ka Balah, ka Esem,

⁴ ka Eltolad, ka Bethul, ka Hormah,

⁵ ka Siklag, ka Beth Markaboth, ka Hasar Susah,

⁶ ka Beth Lebaoth, bad ka Sharuhen: khatlai tylli ki nongbah, lem bad ki nongrit sawdong jong ki.

⁷ La don ruh ka Ain, ka Rimmon, ka Ether, bad ka Ashan: saw tylli ki nongbah, lem bad ki nongrit sawdong jong ki.

⁸ Kane ka kynthup ïa baroh ki nongrit sawdong kine ki nongbah haduh ka Baalath Beer (lane ka Ramah), ha ka phang bashathie. Kane ka dei ka ri kaba ki longïing na ka jait Simeon ki la ïohpdiang kum ka jingïohkynti jong ki.

⁹ Namar ka bynta jong ka Judah ka kham heh ban ïa kaba ka donkam, shi bynta na ka jaka jong ka la ai ha ka jait Simeon.

Ka jaka ba la ai ha ka jait Sebulun

¹⁰ Ka jingsam kaba lai la ai ha ki longïing na ka jait Sebulun. Ka jaka kaba ki la ïohpdiang ka kot haduh Sarid.

¹¹ Nangta u pud jong ka u suh beit shaphang sepngi shaduh Mareal, da kaba ktah ïa ka Dabbesheth bad ïa ka wahduid kaba sha mihngi jong ka Jokneam.

¹² Na kawei pat ka liang jong ka Sarid, u pud u suh shaphang mihngi sha u pud jong ka Khisloth Tabor, nangta sha Daberath bad artet haduh Japhia.

¹³ U bteng nangta sha ka phang mihngi haduh Gath Hepher bad Ethkasin, da kaba phai ha ka liang jong ka Neah ha ka lynti sha Rimmon.

¹⁴ Ha ka phang bashatei u pud u phai shaphang ka Hannathon, bad u kut ha ka Them Iphtahel.

¹⁵ Ka kynthup ïa ka Kattath, ka Nahalal, ka Shimron, ka Idalah, bad ka Bethlehem: khat-ar tylli ki nongbah, lem bad ki nongrit sawdong jong ki.

¹⁶ Kine ki nongbah bad ki nongrit jong ki, ki don ha ka jaka kaba ki longïing na ka jait Sebulun ki la ïohpdiang kum ka jingïohkynti jong ki.

Ka jaka ba la ai ha ka jait Issakhar

¹⁷ Ka jingsam kaba saw la ai ha ki longïing na ka jait Issakhar.

¹⁸ Ka jaka jong ka, ka kynthup ïa ka Jesreel, ka Khesulloth, ka Shunem,

¹⁹ ka Hapharaim, ka Shion, ka Anaharath,

²⁰ ka Rabbith, ka Kishion, ka Ebes,

²¹ ka Remeth, ka Engannim, ka Enhaddah, bad ka Bethpasses.

²² U pud u kynjoh ruh ïa ka Tabor, ka Shahasumah, bad ka Beth Shemesh, u da kut noh ha ka Jordan. Ka kynthup khathynriew tylli ki nongbah lem bad ki nongrit sawdong jong ki.

²³ Kine ki nongbah bad ki nongrit jong ki, ki don ha ka jaka kaba ki longïing na ka jait Issakhar ki la ïohpdiang kum ka jingïohkynti jong ki.

Ka jaka ba la ai ha ka jait Asher

²⁴ Ka jingsam kaba san la ai ha ki longïing na ka jait Asher.

²⁵ Ka jaka jong ka, ka kynthup ïa ka Helkath, ka Hali, ka Beten, ka Akhshaph,

²⁶ ka Allam Melekh, ka Amad, bad ka Mishal. Ha ka phang sepngi ka kynjoh ïa ka Karmel bad Shihor Libnath.

²⁷ Haba ka phai sha mihngi, u pud u suh sha Bethdagon, u da kynjoh ïa ka Sebulun bad ka Them Iphtahel ha ka lynti shaphang shatei sha Bethemek bad Neiel. U bteng shaphang shatei sha ka Kabul,

²⁸ ka Ebron, ka Rehob, ka Hammon, bad ka Kanah, shaduh Sidon.

²⁹ Nangta u pud u khun sha Ramah, u da poi ha Tyros, ka nongbah ba la ker kynroh, nangta u khun sha Hosah bad u kut ha ka Duriaw Mediterranian. Ka kynthup ïa ka Mahalab, ka Akhsib,

³⁰ ka Ummah, ka Aphek, bad ka Rehob: arphew ar tylli ki nongbah, lem bad ki nongrit sawdong jong ki.

³¹ Kine ki nongbah bad ki nongrit jong ki, ki don ha ka jaka kaba ki longïing na ka jait Asher ki la ïohpdiang kum ka jingïohkynti jong ki.

Ka jaka ba la ai ha ka jait Naphtali

³² Ka jingsam kaba hynriew la ai ha ki longïing na ka jait Naphtali.

³³ U pud jong ka, u suh na Heleph sha u dieng Sning ha Saanannim, nangta beit beit sha Adaminekeb bad sha Jamnia, haduh Lakkum, bad u kut ha ka Jordan.

³⁴ Hangta u pud u khun sha sepngi shaduh Asnoth Tabor, bad nangta sha Hukkok, da kaba kynjoh ïa ka Sebulun shaphang shathie, ka Asher shaphang sepngi, bad ïa ka Jordan shaphang mihngi.

³⁵ Ki nongbah ba la ker da ki kynroh ki long ka Siddim, ka Ser, ka Hammath, ka Rakkath, ka Khinnereth,

³⁶ ka Adamah, ka Ramah, ka Hasor,

³⁷ ka Kedesh, ka Edrei, ka Enhasor,

³⁸ ka Yiron, ka Migdalel, ka Horem, ka Bethanath, bad ka Beth Shemesh: khatkhyndai tylli ki nongbah, lem bad ki nongrit sawdong jong ki.

³⁹ Kine ki nongbah bad ki nongrit jong ki, ki don ha ka jaka kaba ki longïing na ka jait Naphtali ki la ïohpdiang kum ka jingïohkynti jong ki.

Ka jaka ba la ai ha ka jait Dan

⁴⁰ Ka jingsam kaba hynñiew la ai ha ki longïing na ka jait Dan.

⁴¹ Ka jaka jong ka, ka kynthup ïa ka Sorah, ka Eshtaol, ka Irshemesh,

⁴² ka Shaalbim, ka Aijalon, ka Ithlah,

⁴³ ka Elon, ka Timnah, ka Ekron,

⁴⁴ ka Eltekeh, ka Gibbethon, ka Baalath,

⁴⁵ ka Jehud, ka Beneberak, ka Gathrimmon,

⁴⁶ ka Mejarkon, bad ka Rakkon, kumjuh ruh ka jaka sawdong ka Joppa.

⁴⁷ Haba ki paidbah na ka jait Dan ki la duh noh ïa la ka jaka, ki la leit sha Laish bad tur ïaleh ïa ka. Ki jop ïa ka, ki pynïap ïa ki briew hangta, bad ki kam kynti ïa ka na ka bynta ïa lade. Ki shong ki sah hangta bad ki pynkylla ïa ka kyrteng jong ka nongbah na ka Laish sha ka Dan, da kaba kyrteng ïa ka ha ka kyrteng u Dan u kpa tymmen jong ki.

⁴⁸ Kine ki nongbah bad ki nongrit jong ki, ki don ha ka ri kaba ki longïing na ka jait Dan ki la ïohpdiang kum ka jingïohkynti jong ki.

Ka jingai bakhatduh na kata ka ri

⁴⁹ Haba ki paid Israel ki la dep bynta ïa ka ri, ki la ai ha u Joshua u khun jong u Nun shi bynta jong ka ri kum ka jingïohkynti jong u.

⁵⁰ Kumba U Trai u la hukum, ki ai ha u ïa ka nongbah kaba u la pan: ka Timnath Serah, kaba ha ri lum Ephraim. U la tei thymmai ïa ka nongbah, bad u shongduh hangta.

⁵¹ U Eleasar u lyngdoh, u Joshua u khun jong u Nun, bad ki nongïalam jong ki jait Israel ki la ai ïa kine ki bynta jong ka ri da kaba kynting sbai ban ïakren ïa U Trai ha Shiloh, ha ka jaka rung sha ka Ïingjaiñ ka jingdon Ryngkat U Trai. Ha kane ka rukom ki la pyndep ka jingpynbynta ïa ka ri.