JOSHUA 17 - Khasi CL Bible (BSI)

Ka bynta ba la ai ha ki Manasseh ba sha sepngi

¹ Shi bynta jong ka ri ha ka phang sepngi jong ka Jordan la ai ha ki katto katne ki longïing kiba hiarpateng na u Manasseh, u khun nyngkong jong u Joseph. U Makhir, u kpa jong u Gilead, u dei u khun nyngkong jong u Manasseh bad u khla-ka-wait uba pawnam; kumta ïa ka Gilead bad ka Bashan, ha ka phang mihngi ka Jordan, la ai ha u.

² Ïa ka jaka ha ka phang sepngi jong ka Jordan la ai ïa ki longïing kiba sah na ka jait Manasseh: u Abieser, u Helek, u Asriel, u Shekhem, u Hepher, bad u Shemida. Kine ki long ki khun ki ksiew shynrang jong u Manasseh, u khun jong u Joseph bad ki long ki khlieh jong ki longïing.

³ U Selophehad u khun jong u Hepher, u khun jong u Gilead, u khun jong u Makhir, u khun jong u Manasseh, um don khun shynrang; hynrei tang ki khun kynthei. Ki kyrteng jong ki, ki long ka Mahlah, ka Noah, ka Hoglah, ka Milkah, bad ka Tirsah.

⁴ Ki la leit sha u Eleasar u lyngdoh bad sha u Joshua u khun jong u Nun bad sha ki nongïalam, bad ki ong, “U Trai u la hukum ïa u Moses ban ai ïa ngi, kumjuh ruh ïa ki ba-ha-ïing shynrang jong ngi, shi bynta jong ka ri ban ïohkynti.” Kumta, kumba U Trai u la hukum, la ai jaka ha ki lem bad ha ki ba-ha-ïing shynrang jong ki.

⁵ Dei namar kata ba u Manasseh u ïoh shiphew bynta nalor ka Gilead bad ka Bashan ha ka phang mihngi jong ka Jordan,

⁶ namar ba ki khun ki ksiew kynthei jong u bad ki khun ki ksiew shynrang jong u ki la ïoh jaka. Ïa ka ri Gilead la ai ha kiba sah jong ki khun ki ksiew u Manasseh.

⁷ Ka jaka jong ki Manasseh ka ïar naduh Asher haduh Mikhmethath, ha ka phang mihngi jong ka Shekhem. Nangta u pud u hiar arsut shaphang shathie ban kynthup ïa ki briew jong ka Entappuah.

⁸ Ka jaka sawdong jong ka Tappuah ka dei jong ka jait Manasseh, hynrei ka shnong Tappuah, ha khappud, ka dei ka jong ki khun ki ksiew u Ephraim.

⁹ Nangta u pud u hiar arsut sha ka wahduid Kanah. Ki nongbah kiba shathie jong ka wahduid ki dei jong ki jait Ephraim, wat la ki hap hapoh ka ri Manasseh. U pud ka Manasseh u suh ter ter na ka phud bashatei jong ka wahduid bad u kut ha ka Duriaw Mediterranian.

¹⁰ Ka ri Ephraim ka don shaphang shathie, bad ka ri Manasseh ka don shaphang shatei, bad ka Duriaw Mediterranian pat ka long u pud jong ki ha ka phang sepngi. Ka ri Asher ka don shaphang shatei lam sepngi, bad ka ri Issakhar shaphang shatei-lam-mihngi.

¹¹ Hapoh ka ri Issakhar bad Asher, ki Manasseh ki ïohkynti ïa ka Beth Shan bad ka Ibleam, lem bad ki nongrit kiba sawdong jong ki, kumjuh ruh ïa ka Dor (kata kaba harud duriaw), ka Endor, ka Taanakh, ka Megiddo, bad ki nongrit kiba sawdong jong ki.

¹² Pynban ki paid Manasseh kim shym lah ban beh noh ïa ki briew kiba shong basah ha kito ki nongbah, kumta ki Kanaan ki dang ïaishong hangta.

¹³ Wat haba ki Israel ki la kham khlaiñ, kim shym la beh noh ïa ki Kanaan baroh, hynrei ki la pynbor ïa ki ban trei na ka bynta jong ki.

Ki Ephraim bad ki Manasseh ba sha sepngi ki pan jaka shuh shuh

¹⁴ Ki khun ki ksiew jong u Joseph ki ong ha u Joshua, “Balei phi ai ïa ngi tang shi bynta jong ka ri ba ngin kam kynti kum la ka jong? Ngi ïadon bun ngut namar U Trai u la kyrkhu ïa ngi.”

¹⁵ U Joshua u jubab, “Lada phi ïabun paid haduh katta katta bad ba ka ri lum Ephraim ka rit than ïa phi, te khie leit sha ki khlaw bad prat na ka bynta ïa lade ha ka ri ki Peris bad ki Rephaim.”

¹⁶ Ki jubab, “Ka ri lum kam biang ïa ngi; hynrei ki Kanaan ha ki ri thor ki don ki kali ïapom da ka nar, na ka bynta kito kiba shong ha Beth Shan bad ïa ki nongrit kiba sawdong jong ka bad na ka bynta kito kiba shong ha ka Them Jesreel.”

¹⁷ U Joshua u ong ha ki jait Ephraim bad Manasseh ba sha Sepngi, “Da shisha phi ïabun paid, bad phi long kiba khlaiñbor. Phi ïoh shuh shuh nalor ka shi bynta.

¹⁸ Ka ri lum kan long ka jong phi. Wat la ka dei ka khlaw, phin prat pynkhuid bad shim kynti ïa ka na kawei ka tduh sha kawei pat ka tduh. Shaphang ki Kanaan, phin beh noh ïa ki, wat la ki don ki kali ïapom da ka nar bad ba ki long ki briew kiba khlaiñ.”