JOSHUA 16 - Khasi CL Bible (BSI)

Ka jaka ba la ai ha ka jait Ephraim bad ka jait Manasseh ba sha sepngi

¹ Ïa u pud bashaphang shathie jong ka ri la ai ha ki khun ki ksiew jong u Joseph; u sdang na ka Jordan hajan ka Jerikho, ha ka bynta kaba sha mihngi jong ki umpohliew ka Jerikho, bad u suh sha ka ri shyiap. U suh na ka Jerikho artet sha ka ri lum haduh ka Bethel.

² Na Bethel u suh sha Lus, da kaba ïaid ter ter sha Ataroth Addar, ha kaba shong ki Arkhit.

³ Nangta u suh shaphang sepngi sha ka jaka jong ki Japhlet haduh ka jaka jong ka Beth Haron kaba Sharum. Nangta u suh sha Geser bad u kut ha ka Duriaw Mediterranian.

⁴ Ki khun ki ksiew jong u Joseph, ka jait Ephraim bad ka jait Manasseh ba sha Sepngi, ki la ïohpdiang ïa kane ka ri kum ka jingïohkynti jong ki.

Ka bynta ba la ai ha ka jait Ephraim

⁵ Kane ka long ka ri jong ki longïing ka jait Ephraim: u pud jong ki u sdang na Ataroth Addar ha ka phang mihngi haduh Beth Horon kaba Shaneng,

⁶ bad nangta sha ka Duriaw Mediterranian. Ka Mikhmethath ka don ha ka bynta bashatei jong ki. Shaphang mihngi jong kata, u pud u khun sha Taanath Shiloh bad u ïaid lyngba jong ka ha ka phang mihngi shaduh Janoah.

⁷ Nangta u hiar arsut na Janoah sha Ataroth bad Naarah, u poi haduh ka Jerikho bad kut ha ka Jordan.

⁸ U pud u suh sha sepngi na Tappuah sha ka wahduid Kanah bad u kut ha ka Duriaw Mediterranian. Kane ka long ka jaka ba la ai ha ki longïing jong ka jait Ephraim kum ka jingïohkynti jong ki,

⁹ lem bad katto katne ki nongbah bad ki nongrit kiba don hapoh ki pud sawdong jong ka Manasseh, hynrei kiba la ai ha ki Ephraim.

¹⁰ Hynrei kim shym beh noh ïa ki Kanaan kiba shong ha Geser; kumta ki Kanaan ki la shong la sah hapdeng ki Ephraim haduh kane ka sngi, hynrei la pynbor ïa ki ban trei kum ki mraw.