EKSODOS 31 - Khasi CL Bible (BSI)

Ki nongshna ïa Ka Ïingjaiñ Ka Jingdon Ryngkat U Trai

¹ U Trai u ong ha u Moses,

² “Nga la jied ïa u Besalel, u khun jong u Uri bad u ksiew jong u Hur, na ka jait Judah,

³ bad nga la pyndap ïa u da ka bor jong nga. Nga la ai ha u ka jingshemphang, ka jingtbit bad ka jingnang ban trei ïa ki jait kam baroh —

⁴ ban pruid dur ba-itynnat bad ban saiñ ïa ki ha ka ksiar, ha ka rupa, bad ha ka rnong;

⁵ ban ot ïa ki mawlynnai bad ban pyndait ïa ki, ban oh-shrong ïa ki dieng, bad ban trei ïa kano kano ka jait jingtrei kaba da ki dur pynitynnat.

⁶ Nga la jied ruh ïa u Oholiab u khun jong u Ahisamakh, na ka jait Dan, ban ïatrei lem bad u. Nga la ai ruh ïa ka jinglah kaba bakhraw ha kiwei pat ki misteri kiba tbit, khnang ba ki lah ban shna ïa kiei kiei baroh kiba nga la hukum ba dei ban shna:

⁷ ïa ka Ïingjaiñ ka Jingdon Ryngkat jong nga, ïa ka Synduk ka Jutang bad ïa ka jingtap jong ka, ïa ki jingpynriam baroh jong ka Ïingjaiñ,

⁸ ïa ka miej bad ki tiar ki tar jong ka, ïa u diengpynïeng sharak ksiar bad ki tiar ki tar jong u baroh, ïa ka duwan ban thang jingiwbih,

⁹ ïa ka duwan ka jingainguh thang bad ki tiar ki tar jong ka baroh, ïa ka dabor bad ka jingpynshong jong ka,

¹⁰ ïa ki jaiñphong lyngdoh na ka bynta u Aaron bad ki khun shynrang jong u ba kin pyndonkam haba ki shakri kum ki lyngdoh,

¹¹ ïa ka umphniang pynsleh, bad ïa ka jingiwbih basma sngewtynnat na ka bynta Ka Jaka Kyntang. Ha kaba shna ïa kine baroh, ki dei ban leh thik kat kumba nga la hukum ïa me.”

Ka sngi sabbaton, ka sngi shongthait

¹² U Trai u hukum ïa u Moses ban ong ha ki Israel,

¹³ “Rakhe ïa ka sngi Sabbaton, ka sngi shongthait jong nga namar ka long ka dak hapdeng jong nga bad phi pateng la pateng, ba phin ïoh tip ba nga U Trai nga la pynlong ïa phi ki briew jong nga hi.

¹⁴ Phin sumar ïa ka sngi shongthait namar ka long kaba kyntang. Uno uno u bym sumar ïa ka un shah pynïap.

¹⁵ Phi ïoh hynriew sngi ban trei, hynrei ka sngi kaba hynñiew, ka long ka sngi shongthait ïa kaba la pynkyntang sha nga. Uno uno uba trei ïa kano kano ka kam ha kata ka sngi un shah pynïap.

¹⁶ Ki paid Israel ki dei ban sumar ïa kane ka sngi kum ka dak jong ka jutang.

¹⁷ Ka long ka dak kaba neh junom hapdeng jong nga bad ki Israel, ba ma nga, U Trai, nga la thaw ïa ka bneng bad ïa ka pyrthei ha ki hynriew sngi, bad ha ka sngi kaba hynñiew nga la sangeh ban trei bad shongthait.”

¹⁸ Haba U Blei u la dep kren ha u Moses ha u Lum Sinai, u ai ha u ïa ki ar tylli ki mawlyngkniap ha kiba U Blei da lade hi u la thoh ïa ki hukum.