EKSODOS 25 - Khasi CL Bible (BSI)

Ki jingainguh na ka bynta ka Ïingjaiñ kaba Kyntang

¹ U Trai u la ong ha u Moses,

² “Ong ha ki Israel ba kin wallam ha nga ïa ki jingainguh. Pdiang ïa kino kino ki jingainguh kat kiba uno uno u mon ban ai.

³ Kine ki long ki jingainguh: ka ksiar, ka rupa, bad ka rnong;

⁴ ka linen kaba ni; u 'saiwul uba jngum, uba sawbthuh, bad uba rong saw; ka jaiñ ba la suh da u shñiuh blang;

⁵ ka snieh 'langsohmoh ba la wieh rong saw, ka snieh kaba bha, bad ka dieng akasia;

⁶ ka umphniang ïa ki sharak, ki musla na ka bynta ka umphniang pynsleh bad na ka bynta ka jingthang iwbih;

⁷ ki mawkordor Karnelian, bad kiwei pat ki mawlynnai ban buh ha ka ephod jong u Rangbah Lyngdoh bad ha ka jingdeng shadem jong u.

⁸ Ki dei ruh ban shna ka Ïingjaiñ kaba kyntang na ka bynta jong nga, khnang ba ngan ïoh shong hapdeng jong ki.

⁹ Shna ïa ka bad ïa ki jingbuh jingsat jong ka baroh kat kum ka dur kaba ngan pyn-i ha me.

Ka Synduk ka Jutang

¹⁰ “Thaw ïa ka synduk da ka dieng akasia, kaba shispah shiphew sentimitar ka lynter, hynriewphew hynriew sentimitar ka pyngkiang, bad hynriewphew hynriew sentimitar ka jingjrong.

¹¹ Suit ïa ka da ka ksiar nylla na shapoh bad shabar, bad pynpur da ka ksiar ha ka rmiang jong ka baroh sawdong.

¹² Thaw saw tylli ki kyrwoh ksiar bad pyndait ïa ki ha ki kjat jong ka baroh saw tylli, ar ar tylli ki kyrwoh ha kawei kawei ka liang.

¹³ Thaw ïa ki dieng jingbah da ka dieng akasia, bad suit ïa ki ruh da ka ksiar.

¹⁴ Bsuh ïa kita ki dieng jingbah lyngba ki kyrwoh ha baroh arliang kata ka synduk, ba yn ïoh bah ïa ka da ki.

¹⁵ Ki dieng jingbah ki dei ban sah hapoh kita ki kyrwoh, bad ym bit ban sei ïa ki nangta.

¹⁶ Nangta thep hapoh ka synduk ïa ki ar tylli ki mawlyngkniap kiba ngan ai ha me, ha kiba la thoh ïa ki hukum jong nga.

¹⁷ “Thaw ïa ka jingtap da ka ksiar nylla, kaba shispah shiphew sentimitar ka lynter bad hynriewphew hynriew sentimitar ka pyngkiang.

¹⁸ Thaw ar tylli ki kherub da ka ksiar kaba la shoh tylli,

¹⁹ uwei ha kawei ka tduh bad uwei ha kawei pat ka tduh jong ka jingtap, bad pynlong ïa ki ba kin i kumba ki ïadait lang bad kata ka jingtap.

²⁰ Kita ki kherub kin ïaphai markhmat, na shiliang sha shiliang ka jingtap bad ki thapniang ba-pyiar jong ki, ki kah ïa kata ka jingtap.

²¹ Buh ïa ki mawlyngkniap hapoh ka synduk, bad ïa ka jingtap halor jong ka.

²² Ngan sa ïakynduh ïa me hangta, bad najrong jong ka jingtap kaba hapdeng kita ki kherub ar tylli, ngan ai ha me ïa ki hukum jong nga baroh na ka bynta ki Israel.

Ka miej na ka bynta u kpu ba la ainguh ha U Blei

²³ “Thaw ïa ka miej da ka dieng akasia, kaba phraphew phra sentimitar ka lynter, sawphew saw sentimitar ka pyngkiang, bad hynriewphew hynriew sentimitar ka jingjrong.

²⁴ Suit ïa ka da ka ksiar nylla, bad pynpur da ka ksiar baroh sawdong jong ka.

²⁵ Thaw ka rmiang kaba hynñiewphew san milimitar baroh sawdong bad pynpur da ka ksiar sawdong kata ka rmiang.

²⁶ Thaw saw tylli ki kyrwoh ksiar bad pyndait ïa ki ha ki saw tylli ki dong ha kiba don ki kjat jong ka.

²⁷ Ki kyrwoh ban bsuh ïa ki dieng jingbah ïa ka miej ki dei ban don hajan ka rmiang.

²⁸ Thaw ïa ki dieng jingbah da ka dieng akasia, bad suit ïa ki da ka ksiar.

²⁹ Thaw ïa ki pliang, ki khiew bad ki khuri ban pyndonkam ha ka jingainguh dih. Ïa kine baroh dei ban thaw da ka ksiar nylla.

³⁰ Ïa ka miej dei ban buh ha khmat ka Synduk ka Jutang, bad u kpu ainguh uba kyntang u dei ban don halor jong ka borabor.

U diengpynïeng sharak

³¹ “Thaw ïa uwei u diengpynïeng sharak da ka ksiar nylla. Shna ïa ka trai bad ka met jong u da ka ksiar ba la shu shoh. Ki syntiew ba la oh-shrong jong u kiba kynthup ïa ki shylluit bad ki sla syntiew jong ki, kin ïasoh lang kawei bad u.

³² Dei ban don hynriew tylli ki tnat kiba mih na baroh arliang jong u, lai tylli na kawei kawei ka liang.

³³ Lai tylli ki khuri kiba kum ki syntiew almond lem bad ki shylluit bad ki dop-syntiew ba la oh-shrong itynnat ki dei ban don ha kawei kawei ka tnat.

³⁴ Ha ka met jong u diengpynïeng sharak hi yn don saw tylli ki khuri kiba kum ki syntiew almond lem bad ki shylluit bad ki dop-syntiew ba la oh-shrong itynnat.

³⁵ Dei ban don uwei u shylluit syntiew hapoh, ha trai jong ki lai jur ki tnat.

³⁶ Ki shylluit, ki tnat, bad u diengpynïeng sharak ki dei ban long kiba ïadait lang kawei bad kiba la shu shoh da ka ksiar nylla.

³⁷ Thaw hynñiew tylli ki sharak na ka bynta u diengpynïeng sharak, bad buh ïa ki ba kin ai jingshai ïa ka jaka kaba ha khmat jong u.

³⁸ Thaw ïa ki nap bad ki pliang jong u da ka ksiar nylla.

³⁹ Pyndonkam laiphew san kilo ka ksiar nylla ban thaw ïa uta u diengpynïeng sharak bad ki tiar baroh kiba ïadei bad u.

⁴⁰ Da kitkhia ba men thaw ïa ki kat kum ka dur ba nga la pyn-i ha me ha une u lum.