EKSODOS 17 - Khasi CL Bible (BSI)

Ka umdih na u mawsiang

¹ Ka kynhun Israel baroh ka la mihnoh na ka ri shyiap Sin, da kaba ïaid na kawei ka jaka sha kawei pat ka jaka kat kum ka hukum U Trai. Ki la sher dara ha Rephidim, hynrei ym don umdih hangta.

² Ki la khñium ha u Moses, bad ki la ong, “Ai um ïa ngi ban dih.” U Moses u ong ha ki, “Balei keiñ phi ïakhñium ïa nga? Balei phi tynjuh ïa U Trai?”

³ Hynrei ki briew ki la thynrang palat bad ki la ïai khñium ha u Moses. Ki la ong, “Balei keiñ ba phi wan ïalam noh ïa ngi na ka ri Ijipt? Hato phi mut ban pynïap da ka jingsliang ïa ngi bad ïa ki khun ki kti jong ngi, bad ïa ki jingri jong ngi?”

⁴ U Moses u la duwai jur ha U Trai, bad u ong, “Aïu nga lah ban leh bad kine ki briew? Mynta ki khreh sa ban lynthem maw ïa nga!”

⁵ U Trai u ong ha u Moses, “Ïalam bad me katto katne ngut ki nongïalam jong ki Israel, bad leit sha shuwa jong u paidbah. Rah ruh ïa u diengduh da uba me la shoh ïa ka wah Nile.

⁶ Nga ngan ïeng ha khmat jong me ha u mawsiang ha u Lum Sinai. Tied ïa u mawsiang; te ka um kan sa mih na u ba u paidbah un ïoh dih.” U Moses u leh kumta ha ka jingdon ryngkat ki nongïalam jong ki Israel.

⁷ Ïa kata ka jaka la khot ka Massah bad ka Meribah, namar ba ki Israel ki la ïakhñium bad tynjuh ïa U Trai haba ki ïakylli, “Hato U Trai u don ne em bad ngi?”

Ka thma bad ki Amalek

⁸ Ki Amalek ki la wan bad tur ïaleh ïa ki Israel ha Rephidim.

⁹ U Moses u la ong ha u Joshua, “Jied katto katne ngut ki rangbah ki ban leit ïaleh ïa ki Amalek lashai ka sngi. Ngan ïeng ha kliar u lum da kaba bat ïa u diengduh ba U Blei u la ong ïa nga ban rah.”

¹⁰ U Joshua u la leh kumba u Moses u la hukum ïa u, bad u la leit ban ïaleh ïa ki Amalek, katba u Moses, u Aaron, bad u Hur ki la leit kiew sha kliar u lum.

¹¹ Katba u Moses u dang rah shajrong ïa la ki kti, ki Israel ki jop, hynrei haba u pynhiar shapoh ïa la ki kti, ki Amalek ki jop.

¹² Haba ki kti u Moses ki la sakhrai, u Aaron bad u Hur ki rah uwei u maw ba un shong, katba ma ki pat ki ïeng ha syndah jong u, uwei sha kadiang bad uwei pat sha kamon, bad ki kyrshan ïa ki kti jong u, ki da kyrshan skhem ïa ki kumta haduh ban da sep ka sngi.

¹³ Da kumta keiñ u Joshua u jop thiaw ïa ki Amalek.

¹⁴ Nangta U Trai u ong ha u Moses, “Buh ha ka jingthoh shaphang kane ka jingjop ban pynsah jingkynmaw. Ïathuh ruh ha u Joshua ba ngan pynjot thiaw ïa ki Amalek.”

¹⁵ U Moses u la tei ïa ka duwan bad u ai kyrteng ïa ka “U Trai u long ka Lama jong nga.”

¹⁶ U ong ruh, “Rah shajrong ïa ka lama U Trai! U Trai un ïai ïaleh ïa ki Amalek junom!”