EKSODOS 16 - Khasi CL Bible (BSI)

Ka manna na bneng bad ki 'iar khlaw

¹ Ka kynhun Israel baroh ka la mihnoh na Elim, bad ha ka sngi kaba khatsan jong u bnai uba ar naduh ba ki mihnoh na ka ri Ijipt, ki la wan poi ha ka ri shyiap Sin, kaba don hapdeng ka Elim bad ka Sinai.

² Hangta ha ka ri shyiap baroh ki la ïakhñium ïa u Moses bad u Aaron bad ki la ong ha ki,

³ “Kan jin da la bha ba U Trai u shoh ïap ïa ngi ha ri Ijipt. Hangta, la kumno kumno, ngi dang ïoh ban shong bad bam doh bad kyrhai ka jingbam kat kaba ngi kwah. Hynrei phi la wan ïalam ïa ngi sha kane ka ri shyiap ban pynïapthngan ïa ngi baroh.”

⁴ U Trai u ong ha u Moses, “Mynta ngan pynhap bam na bneng ïa phi baroh. Ki briew ki dei ban mih shabar man ka sngi ban lum kat ban biang na ka bynta kata ka sngi. Da kumta nga lah ban tynjuh ïa ki ban shem la kin kohnguh ne em ïa ki jingbthah jong nga.

⁵ Ha ka sngi kaba hynriew, ki dei ban lum ar shah ban ïa kaba ki ju lum man ka sngi bad pynkhreh ïa ka.”

⁶ Kumta u Moses bad u Aaron ki la ong ha ki Israel baroh, “Ha kane ka janmiet, phin tip ba dei U Trai uba la wallam ïa phi na ka ri Ijipt.

⁷ Ha ka por mynstep phin ïohi ïa ka jingshai baphyrnai jong ka jingdon ryngkat U Trai. U la ïohsngew ïa ki jingkhñium jong phi pyrshah ïa u — ho-oid, pyrshah ïa u, namar ngi te ngi shu kohnguh ïa ki jingbthah jong u.”

⁸ Nangta u Moses u la ong, “Dei U Trai u ban ai ïa phi ka doh ban bam ha ka por janmiet bad kyrhai u kpu ha ka por mynstep, namar ba u la ïohsngew haduh katno phi la ïakhñium pyrshah ïa u. Haba phi khñium pyrshah ïa ngi, phi ïakhñium shisha keiñ pyrshah ïa U Trai.”

⁹ U Moses u ong ha u Aaron, “Ong ïa ka kynhun Israel baroh ban wan bad ïeng ha khmat U Trai, naba u la ïohsngew ïa ki jingkhñium jong ki.”

¹⁰ Katba u Aaron u dang kren ha ka kynhun baroh kawei, ki phai shaphang ka ri shyiap, bad kynsan ka jingshai baphyrnai jong U Trai ka la paw ha u lyoh.

¹¹ Te U Trai u ong ha u Moses,

¹² “Nga la ïohsngew ïa ki jingkhñium jong ki Israel. Ïathuh ïa ki ba ynda la kem ïongreiñ kin sa ïoh ka doh ban bam, bad ha ka por mynstep kin sa ïoh u kpu uba ki kwah. Te kin tip ba ma nga, U Trai nga long U Blei jong ki.”

¹³ Ha ka por janmiet, shi kynhun bah ki 'iar khlaw ki la wan her, kat ban dap ïa ka jaka sher dara, bad ha ka por mynstep la don ka umjer ha kylleng ka jaka sher dara.

¹⁴ Ynda kata ka umjer ka la rkhiang, la don kaei re kaei kaba stang bad ni phup phup, kum u thah halor ka khyndew.

¹⁵ Haba ki Israel ki ïohi ïa ka, kim tip ka dei kaei, bad kumta ki ïakylli para ma ki, “Kaei mo kane?” Te u Moses u ong ha ki, “Une u dei u kpu ba U Trai u la ai ha phi ban bam.

¹⁶ U Trai u la hukum ba uwei pa uwei na phi un lum katba u lah ban bam, ar kilo ïa uwei uwei u briew ha ka ïing jong u.”

¹⁷ Ki Israel ki ïaleh kumta, don kiba lum kham bun, kiwei pat ki lum kham khyndiat.

¹⁸ Hynrei haba ki la thew ïa ka, kito kiba lum kham bun kim shym ïoh tam, bad kito kiba lum kham khyndiat kim shym ïoh duna; man la u briew u lum tang katba u lah ban bam.

¹⁹ U Moses u la ong ha ki, “Uno uno ruh um dei ban pynsah ïa ka wat tang khyndiat ruh na ka bynta kaba la shai.”

²⁰ Hynrei don ki bym shym shahshkor ïa u Moses, bad ki la tyngkai khyndiat. Ha ka step kaba bud kata kaba sah ka la boi ksaiñ bad ka sma iwjit, bad u Moses u la bitar ïa ki.

²¹ Man ka step, uwei pa uwei u lum katba u lah ban bam, bad ynda ka la shit ka sngi, kaba sah baroh ha madan ka la um noh.

²² Ha ka sngi kaba hynriew, ki ïalum ar shah, saw kilo ïa uwei uwei u briew. Ki nongïalam baroh jong ka kynhun ki wan ïathuh shaphang kata ha u Moses,

²³ bad u la ong ha ki, “U Trai u la hukum ba lashai ka dei ka sngi shongthait ïa kaba la pynkyrpang sha u. Shet mynta kat ïa kaba phi dei ban shet, bad pynthnam kat ïa kaba phi dei ban pynthnam. Sa buh kyrpang kat ïa kaba tam bad tyngkai ïa ka na ka bynta lashai.”

²⁴ Kumba u Moses u la hukum, kumta ruh ki buh ïa kaba tam haduh kawei pat ka sngi. Te kam shym la sniew, bad kam shym la boi ksaiñ.

²⁵ U Moses u la ong, “Bam ïa ka mynta ka sngi, naba mynta ka dei ka Sabbaton, ka sngi shongthait ba la pynkyntang sha U Trai, bad phin ym shem jingbam ei ei shabar.

²⁶ Hynriew sngi phin ïalum jingbam, hynrei ha ka sngi kaba hynñiew, ka sngi shongthait, yn ym don ei ei.”

²⁷ Ha ka sngi kaba hynñiew, don katto kane ngut ki briew kiba leit ban lum jingbam, hynrei kim shym shem ei ei ruh em.

²⁸ Nangta U Trai u ong ha u Moses, “Sa katno shuh phi ki briew phin dang kyntait ban kohnguh ïa ki hukum jong nga?

²⁹ Kynmaw ba ma nga, U Trai nga la ai ha phi ïa ka sngi shongthait, bad dei namar kata ba ha ka sngi kaba hynriew nga ai jingbam ïa phi kat ban biang na ka bynta ar sngi. Baroh phin ïashong ha ka jaka ba phi don ha ka sngi kaba hynñiew, bad phim dei ban mih na la ïing.”

³⁰ Kumta u paidbah um shym leh kano kano ka kam ha ka sngi kaba hynñiew.

³¹ Ki paid Israel ki khot ïa kata ka jingbam, “ka manna”. Ka long kum u symbai balieh uba rit, bad ka shngiam kum u kpu lyngkniap ba la shet bad ka ngap.

³² U Moses u ong, “U Trai u la hukum ba ngin tyngkai ïa ka manna na ka bynta ki khun ki ksiew jong ngi, ba ki lah ban ïohi ïa kata ka jingbam ba u ai ha ngi ha ri shyiap ban bam, mynba u wan ïalam noh ïa ngi na ka ri Ijipt.”

³³ U Moses u la ong ha u Aaron, “Shim uwei u khiew, thep ar kilo ka manna ha u, nangta buh ïa u ha khmat U Trai, na ka bynta ki khun ki ksiew jong ngi.”

³⁴ Kumba U Trai u la hukum ïa u Moses, u Aaron u buh ïa uta u khiew ha khmat ka Synduk ka Jutang ba yn ïoh sumar ïa u.

³⁵ Ki Israel ki la bam ïa ka manna sawphew snem lynter, haduh ba kin da poi ha ka ri Kanaan, ha kaba ki la shongduh.

³⁶ (Ka jingthew ha kata ka por ka ïaryngkat bad arphew kilo.)