EKSODOS 14 - Khasi CL Bible (BSI)

Kaba jam lyngba ïa ka Duriaw Basaw

¹ Nangta U Trai u ong ha u Moses,

² “Ong ïa ki Israel ban phai dien bad ban sher dara ha khmat ka Pi Hahiroth, hapdeng ka Migdol bad ka Duriaw Basaw, hajan ka Baal Sephon.

³ U Pharaoh un sa tharai ba ki Israel ki la phet sakma bad ba ki la shah khang kut ha ka ri shyiap.

⁴ Ngan pynmutlop ïa u, bad un sa wan thwet nadien jong phi; bad kumta ka jingjop jong nga ïa u Pharaoh bad ka kynhun shipai jong u kan long ka burom ïa nga. Te ki nong Ijipt kin sa tip ba nga long U Trai.” Ki Israel ki leh kumba la hukum ïa ki.

⁵ Haba la ïathuh ha u Pharaoh ba uta u paidbah u la phet, ma u bad ki rangbah synshar jong u ki kylla ka jingmut jong ki, bad ki la ong, “Ngi la leh aïu? Ngi la shah ïa ki Israel ba kin phet noh, bad ngi la duh ïa ki kum ki mraw jong ngi!”

⁶ Kumta u Pharaoh u pynkhreh ïa la ka kali thma bad ïa ka kynhun ïapom jong u ruh.

⁷ U la mih lem bad ki kali ïapom jong u baroh, kynthup ïa ki hynriewspah tylli ki kali ïapom jong u kiba bha tam, ïa kiba la ai hukum da ki rangbah pynïaidkam jong ki.

⁸ U Trai u la pynmutlop ïa u Pharaoh, bad une u la beh kthong ïa ki Israel, kiba la mihnoh da ka jingjop.

⁹ Ka kynhun shipai Ijipt, lem bad ki kulai baroh, ki kali ïapom, bad ki nongñiah, ki la beh kthong ïa ki bad ki la lap ïa ki ha ka jaka ha kaba ki la sher dara harud ka Duriaw Basaw, hajan ka Pi Hahiroth bad ka Baal Sephon.

¹⁰ Haba ki Israel ki ïohi ïa u Pharaoh bad u paidïapom jong u ba ki tur sha ki, ki la sheptieng shikatdei eh, bad ki kyang jam sha U Trai ban ïoh jingïarap.

¹¹ Ki la ong ha u Moses, “Hato ym don jingtep mo ha Ijipt? Hato phin hap wan ïalam ïa ngi hangne ha ri shyiap ban ïap? Peit aïu phi la leh ïa ngi da kaba phi wan ïalam noh ïa ngi na ka ri Ijipt!

¹² Hato ngim shym la ong lypa ha phi shuwa ba ngin mih ba kane kan sa jia? Ngi la ong ïa phi ban ym pynsalia ïa ngi bad ban shah ïa ngi ban ïailong ki mraw jong ki nong Ijipt. Kan jin da la kham bha ban long ki mraw hangta ban ïa kaba ïap hangne ha ri shyiap.”

¹³ U Moses u la jubab, “Wat sheptieng! Ïeng skhem, bad phin sa ïohi aïu U Trai un leh mynta ka sngi ban pyllait im ïa phi; lano lano ruh phin ym ïohi shuh ïa kine ki nong Ijipt.

¹⁴ U Trai un ïaleh na ka bynta jong phi, bad phim donkam ban leh ei ei ruh em.”

¹⁵ U Trai u ong ha u Moses, “Balei me kyang jam ban ïoh jingïarap? Ong ïa ki paidbah ba kin nang ïaid shaphrang.

¹⁶ Rah ïa la u diengduh bad bat ïa u halor ka duriaw. Ka um kan sa kad arliang, bad ki Israel kin lah ban ïaid lyngba ïa kata ka duriaw halor ka khyndew kaba rkhiang.

¹⁷ Ngan pynmutlop haduh katta katta ïa ki nong Ijipt ba kin beh nadien jong ki, bad ngan ïoh ka jingpyndonburom da ka jingjop jong nga ïa u Pharaoh, ïa ka kynhun shipai jong u, ïa ki kali ïapom jong u, bad ïa ki nongñiah jong u.

¹⁸ Ynda nga la jop ïa ki, ki nong Ijipt kin tip ba nga long U Trai.”

¹⁹ U Angel jong U Blei uba la ju don ha khmat jong ki paid Israel u la kynriah bad u la leit shadien. U rishot lyoh ruh u kynriah noh tad haduh ba u la don hapdeng ki nong Ijipt bad ki Israel.

²⁰ U lyoh u wanrah jingdum ïa ki nong Ijipt, hynrei u ai jingshai ïa ki Israel, bad kumta baroh shi miet ki paidïapom kim shym ïawan jan para ma ki.

²¹ U Moses u kner ïa la ka kti halor ka duriaw, bad U Trai u kyndat ïa kata ka duriaw da ka lyer mihngi kaba jur. Kata ka lyer ka beh jur baroh shi miet bad ka pynlong dewryngkhiang ïa ka duriaw.

²² Ïa ki um la kad arliang, bad ki Israel ki ïaid lyngba ïa kata ka duriaw ha ka khyndew kaba rkhiang, katba kita ki um ki long kum ki kynroh ha baroh arliang.

²³ Ki nong Ijipt ruh ki la beh kthong ïa ki bad ki la leit nadien jong ki sha ka duriaw lem bad ki kulai, ki kali ïapom bad ki nongñiah.

²⁴ Ha shuwa ban kynjat shai, U Trai u la khmih ïa ka kynhun shipai Ijipt na u rishot ding bad u rishot lyoh bad u pynkulmar thlim ïa ki.

²⁵ U la pynsahkut ïa ki shalyntem jong ki kali ïapom jong ki, bad kumta ki la ïaid da kaba shitom eh. Ki nong Ijipt ki la ong, “U Trai u ïaleh pyrshah ïa ngi na ka liang ki Israel. Ïa ngin ïaphet noh nangne.”

²⁶ U Trai u la ong ha u Moses, “Kner ïa la ka kti halor ka duriaw khnang ba ki um kin ïadait biang bad tyllep ïa ki nong Ijipt bad ïa ki kali ïapom jong ki, bad ïa ki nongñiah.”

²⁷ Kumta u Moses u kner ïa la ka kti halor ka duriaw, bad haba ka la kynjat shai ka duriaw ka dap biang kumba mynshuwa. Ki nong Ijipt ki la pyrshang ban lait im na ka um, hynrei U Trai u la bret ïa ki sha ka duriaw.

²⁸ Ki um ki ïadait biang bad ki la tyllep ïa ki kali ïapom, ïa ki nongñiah, bad ïa ka kynhun shipai baroh jong u Pharaoh kaba la buddien ïa ki Israel sha duriaw, ym don kawei ruh na ki ïa kaba la iehnoh.

²⁹ Hynrei ki Israel ki ïaid lyngba ïa ka duriaw ha ka khyndew kaba rkhiang, katba ki um ki ïeng kum ki kynroh na baroh arliang.

³⁰ Ha kata ka sngi U Trai u pyllait im ïa ki Israel na ki Ijipt, bad ki Israel ki ïohi ïa ki ba ki thiah ïap harud duriaw.

³¹ Haba ki Israel ki ïohi ïa ka borbah da kaba U Trai u jop ïa ki Ijipt, ki la ïeng da kaba tiengburom ïa U Trai; bad kumta ki la shaniah ha U Trai bad ha u Moses u shakri jong u.