EKLESIASTIS 6 - Khasi CL Bible (BSI)

¹ Nga la ïohi ba ha kane ka pyrthei la leh ïa ka jingbymlehhok kaba shyrkhei.

² U Blei un ai ha ngi ka spah, ka burom bad ka jingdon jingem, ho-oid baroh kaba ngi kwah, hynrei un ym shah ïa ngi ban ïoh lehkmen ïa ka. Pynban uwei pat u nongwei un ïoh lehkmen ïa ka. Ka long ka bymmyntoi, bad ka shu long ka bym dei.

³ Ngi lah ban don shispah ngut ki khun bad ban im slem, hynrei kam pher haduh katno ngi im, lada ngim ïoh ïa la ka bynta jong ka jingsngewkmen bad ïohpdiang ïa ka jingontep kaba donburom, te nga ong ba kham bha u khunlung uba la kha ïap.

⁴ Kam wanrah jingbha ïa ita i khunlung i ban sa kha, i jah noh sha ka jingdum, ha kaba la klet noh ïa i.

⁵ Im ïohi da lei lei ïa ka jingshai jong ka sngi lane tip kumno ka jingim ka long, hynrei la kumno kumno i la shem ka jingjahthait —

⁶ kham palat ban ïa u briew u bym ïoh lehkmen ha ka jingim, la u lah ban im ar hajar snem. Nalorkata, baroh ar ki leit sha kajuh ka jaka.

⁷ Ngi trei ïa ki kam jong ngi baroh tang ban ïoh ei ei ban bam, hynrei ngim ju dap.

⁸ Kumno kiba stad ki kham bit kham biang ban ïa ki bieit? Kaba bha aïu ïa uba duk ban tip kumno ban ïaksaid ha ka jingim?

⁹ Ka long ka bymmyntoi, ka long kum ka jingbeh ïa ka lyer. Ka kham bha shibun ban sngewhun bad kaei kaba phi don ban ïa kaba ïai kwah ïa kawei pat kaei kaei.

¹⁰ Kaei kaei kaba jia ka dei kaba la rai lypa slem bah mynshuwa, bad ngi baroh ngi tip ba phim lah ban ïania bad uno uno uba kham khlaiñ ban ïa phi.

¹¹ Katba phi dang ïania slem, katta ka dang long ka bymmyntoi, bad phim shym long uba kham bit kham biang.

¹² Kumno uno uno u lah ban tip kaei kaba bha ïa ngi ha kane ka jingim jong ngi kaba lyngkot bad ka bymmyntoi — ka jingim kaba ïaid kum ka syrngiew? Kumno ngi lah ban tip aïu kan jia ha ka pyrthei hadien ba ngi la ïap?