2 SAMUEL 14 - Khasi CL Bible (BSI)

U Joab u pynbit pynbiang ïa ka jingwanphai u Absalom

¹ U Joab u tip ba u Syiem Dabid u kynmaw ieit haduh katta katta ïa u Absalom,

² kumta u phah khot ïa ka kynthei kaba sian kaba shong ha Tekoa. Haba ka la wan poi, u ong ha ka, “Leh mynleh kumba phi don ha kaba ïambriew; kup ïa ki jaiñ ïambriew, bad wat sad ïa la u shñiuh. Leh kum ka briew kaba la ïambriew la slem bah.

³ Nangta leit sha u syiem bad ong ha u ïa kaei kaba nga bthah ïa phi ban ong.” Nangta u Joab u la ïathuh ha ka ïa kaei ban ong.

⁴ Kata ka briew ka leit sha u syiem, ka dem ngon haduh khyndew ha ka jingñiewburom bad ka ong, “Ïarap ïa nga, ko Syiem Kynrad!”

⁵ “Kaei pha kwah?” u la kylli ïa ka. “Kynrad, nga dei ka riewkynthei kaba duk,” ka la jubab. “U tnga jong nga u la ïap.

⁶ Kynrad, nga don ar ngut ki khun shynrang. Bad ha kawei ka sngi ki poi sha ka jingïakajia ha bri; ha kaba ym don mano mano ban pynïakhlad ïa ki, bad uwei na ki u la pynïap ïa uwei pat.

⁷ Bad mynta, ko kynrad, baroh ki ba-ha-ïing ha-sem jong nga ki la phai pyrshah ïa nga bad ki dawa ba ngan ai ha ki ïa u khun shynrang jong nga, khnang ba ki lah ban pynïap ïa u namar ba u la pynïap ïa uba shi para bad u. Lada ki leh ïa kane, ngan shah iehnoh khlem u khun. Kin pynjot ïa ka jingkyrmen bakhatduh jong nga bad kin iehnoh ïa u tnga jong nga khlem u khun jong u ban ri pynim ïa ka kyrteng jong u.”

⁸ “Khie leit noh sha ïing,” u syiem u la jubab, “bad ngan sa khmih ïa ka kam.”

⁹ “Syiem Kynrad,” ka ong, “ïa kano kano kaba phi leh, ma nga bad la ka longïing ngin shim ïa ka jingshah kynnoh; ma phi bad la ka longïing syiem phi lait.”

¹⁰ U Syiem u jubab, “Lada uno uno u byrngem ïa pha, wan ïalam ïa u sha nga, bad un ym pynwit shuh ïa pha lano lano.”

¹¹ Ka ong, “Ko Syiem Kynrad, sngewbha duwai ha U Trai U Blei jong phi, khnang ba u ba-ha-ïing jong nga uba kitkhlieh ban wad kput na ka bynta ka jingïap jong u khun jong nga un ym leh ïa ka kam sniew kaba kham khraw da kaba pynïap ïa uwei pat u khun jong nga.” “Nga kular ha U Trai uba im,” u Dabid u jubab, “ba ïa u khun jong pha yn ym pynmynsaw da lei lei ruh.”

¹² “Sngewbha, ko Syiem Kynrad, shah ïa nga ban ong sa tang kawei,” ka briew ka ong. “To ong” u jubab.

¹³ Ka ong ha u, “Balei ba phi la leh kum kane ka jingbakla ha ki briew jong U Blei? Phim shym la shah ïa la u jong u khun ban wan phai noh na ka jingphet wir, bad kumta phi la pynrem ïa lade da kaei kaba phi dang shu dep ong.

¹⁴ Ngi baroh ngin ïap; ngi long kum ka um kaba hoit ha khyndew, ïa kaba ym lah shuh ban tong biang. Wat U Blei um ju wallam ïa kiba la ïap ban im pat, hynrei u syiem u lah la kumno kumno ban shem lynti ban wallam pat ïa u briew na ka jingphet wir.

¹⁵ Mynta, ko Syiem Kynrad, ka daw ba nga la wan ban kren ïa phi ka long ba ki paidbah ki la byrngem ïa nga, bad kumta nga la ong ha lade ba nga dei ban kren ha phi da ka jingkyrmen ba phin leh ïa kaei kaba nga kyrpad.

¹⁶ Nga la pyrkhat ba phin shahshkor bad pyllait im ïa nga na uta uba pyrshang ban pynïap ïa nga bad ïa u khun jong nga, bad kumta ban weng noh ïa ngi na ka ri kaba U Blei u la ai ha ki briew jong u.

¹⁷ Nga la ong ha lade ba ki kular jong phi, ko Kynrad, kin pynshngain ïa nga, namar ba u syiem u long kum u angel jong U Blei bad u lah ban pynïapher ïa kaba bha na kaba sniew. To U Trai U Blei jong phi un long lem bad phi!”

¹⁸ U syiem u jubab, “Ngan kylli ei ei na pha, bad pha dei ban ïathuh ha nga ïa ka jingshisha baroh.” “Kylli ïa kano kano na nga, ko Syiem Kynrad,” ka la jubab.

¹⁹ “Hato dei u Joab uba la ai buit ïa pha ha kane baroh?” u la kylli ïa ka. Ka jubab, “Nga smai da kata baroh kaba kyntang, ko Syiem Kynrad, ba ym don kano kano ka lad ban kiar na kaba jubab ïa ka jingkylli jong phi. Ka dei kaba shisha ba u Joab, u rangbah pynïaidkam jong phi uba la bthah ïa nga ïa kaei ngan leh bad ïa kaei ngan kren.

²⁰ Hynrei u la leh ïa ka khnang ban pynbeit ïa kane ka kam. U Syiem Kynrad u long uba stad kum u angel jong U Blei bad u tip ïa kaei kaei baroh kaba jia.”

²¹ Hadien nangta u syiem u ong ha u Joab, “Nga la rai ban leh ïa kata kaba me kwah. Khie leit bad wad ïa u samla Absalom bad wan ïalam pat ïa u hangne.”

²² U Joab u dem khrup haduh khyndew ha khmat u Dabid da ka jingburom bad u ong “U Blei un kyrkhu ïa phi, ko Syiem Kynrad! Mynta nga tip ba phi sngewbha ïa nga, namar phi la mynjur ïa ka jingkyrpad jong nga.”

²³ Nangta u la ïeng joit bad u leit sha Geshur, bad u wan ïalam pat ïa u Absalom sha Jerusalem.

²⁴ Pynban u syiem u la ai hukum ba u Absalom um dei ban sah hapoh ïingsyiem. “Ngam kwah ban ïohi ïa u!” u syiem u ong. Kumta u Absalom u sah ha ka ïing jong u hi bad um shym leit mih ha khmat u syiem.

La pynïasuk ïa u Absalom bad u Dabid

²⁵ Ym don mano mano ha Israel uba pawnam ha ka jingbhabriew kat u Absalom; um don kano kano ka jingduna naduh khlieh haduh sla'jat.

²⁶ U 'ñiuhkhlieh jong u, u long uba rben katta katta bad u hap ban khap ïa u shisien shisnem; haba u la jrong than bad khia. U ju khia palat ïa ar kilo kat kum ka jingthew ryntih ba kynja syiem.

²⁷ U Absalom u don lai ngut ki khun shynrang bad kawei ka khun kaba kyrteng ka Tamar, ka kynthei kaba bhabriew katta katta.

²⁸ U Absalom u la shong ar snem ha Jerusalem khlem ïohi ïa u syiem.

²⁹ Nangta u la phah khot ïa u Joab, ban kyrpad ïa u ban leit sha u syiem na ka bynta jong u; hynrei u Joab um wan. Sa shisien u Absalom u la phah khot ïa u; bad u Joab u kyntait biang ban wan.

³⁰ Kumta u Absalom u ong ha la ki shakri, “Ha khmih, ka lyngkha u Joab ka don markhap bad ka jong nga, bad ka don u barli uba mih ha ka. Khie leit bad wiang ding ïa ka.” Kumta ki la leit bad wiang ding ïa ka lyngkha.

³¹ U Joab u leit sha ka ïing jong u Absalom bad u la dawa, “Balei ki shakri jong phi ki wiang ding ïa ka lyngkha jong nga?”

³² U Absalom u jubab, “Namar ba phim wan haba nga la phah khot ïa phi. Nga la kwah ïa phi ban leit sha u syiem bad ban kylli na ka bynta jong nga: ‘Balei nga dei ban iehnoh ïa ka Geshur bad wan hangne? Kan jin da la kham bha ïa nga ban sah hangta.’ ” U Absalom u bteng, “nga kwah ïa phi ban pynbeit ïa nga ban ïohi ïa u syiem, bad lada nga la kit pop, te shah ïa u ban pynïap ïa nga.”

³³ Kumta u Joab u la leit sha u Syiem Dabid bad u ïathuh ha u ïa kaei kaba u Absalom u la ong. U syiem u la phah khot ïa u Absalom; uba la leit sha u bad u dem ngon ha khyndew ha khmat jong u. U syiem u la pdiang sngewbha ïa u da ka jingdoh.