1 SAMUEL 27 - Khasi CL Bible (BSI)

U Dabid hapdeng ki Philistia

¹ U Dabid u ong ha lade, “Ha kawei na kine ka sngi, u Saul un sa pynïap ïa nga. Kaba bha tam eh ïa nga ban leh ka long ban phet noh sha ka ri ki Philistia. Te u Saul un sa sangeh ban wad ïa nga ha Israel, bad ngan sa lait na ka kti jong u.”

² Kumta u Dabid bad ki rangbah jong u hynriewspah ngut ki leit sha u Akhish u khun jong u Maokh, u syiem ka Gath.

³ U Dabid bad ki rangbah jong u ki sah ha Gath ryngkat bad ki ba-ha-ïing ha-sem jong ki. U Dabid u don ar ngut ki tnga lem bad u, ka Ahinoam na Jesreel, bad ka Abigail, ka tnga u Nabal uba la ïap, kaba na Karmel.

⁴ Haba u Saul u ïohsngew ba u Dabid u la phet ïap sha Gath, u sangeh noh ban wad ïa u.

⁵ U Dabid u ong ha u Akhish, “Lada phi long u paralok jong nga, ai jaka ïa nga ha kawei ka shnongrit ba ngan ïoh shong hangta. Bah, kam donkam ïa nga ba ngan sah ryngkat bad phi ha kane ka nongbah.”

⁶ Kumta u Akhish u ai ha u ïa ka shnong Siklag, bad na kane ka daw ka Siklag ka long noh ka jong ki syiem Judah naduh kata ka por.

⁷ U Dabid u sah ha ri Philistia khathynriew bnai.

⁸ Ha kata ka por u Dabid bad ki rangbah jong u ki ju leit hiarthma ïa ki briew jong ka Geshur, ki Girsi, bad ki Amalek, kiba la ju shong ha kata ka thain naduh mynhyndai. U ju leit lute ïa ka ri jong ki haduh Shur, baroh shi lynter lynti haduh ka ri Ijipt,

⁹ ki da pynïap lut ïa ki shynrang bad ki kynthei baroh, bad rah noh ïa ki langbrot, ki masi, ki kada, ki ut, bad wat ïa ki jaiñkup jaiñsem ruh.

¹⁰ Nangta u wan phai pat sha u Akhish, uba ju kylli ïa u, “Phi la leit lute shano ha kane ka kynti?” bad u Dabid ruh u ju ïathuh ïa u ba u la leit sha ka ri Judah kaba shathie, lane sha ka ri ki Jerahmeel, lane sha ka ri bashong ki Ken.

¹¹ U Dabid u ju pynïap lut, shynrang bad kynthei, khnang ba yn ym don uba leit rah khubor sha Gath bad ïathuh aïu ma u bad ki briew jong u ki la leh. Kane ka long kaba u Dabid u la ju leh katba u dang sah ha ri Philistia.

¹² Hynrei u Akhish u shaniah ïa u Dabid, u da ong ha lade, “U la long uba la isih haduh katta katta da ki briew jong u hi ki Israel ba kumta un hap long u shakri ïa nga baroh shi rta.”