Лука 9 - Анкълова Лука

9 къаьм АцӀона къона асгьаб ваъза-насигьатлил ме̄йо

¹ АцӀона къона асгьабна илӀена, гьоллол нилӀийо къацӀцӀа̄ зинналла̄кьа ихтиярна кӀовакӀова ба̄хълал къудратна.

² Ме̄йо Иса гьолло̄л Аллагьлис Парчагьлъи йоᵸкъоцалас хабар нисална кӀовакӀова ба̄хъланна.

³ Гьоллохъа нисойо гьоьшшона гьиногьид йеза̄къалӀо: йа кӀобала, йа хуржалла, йа баьба, йа окко, гьула̄зу къо̄-къона мухунна къацӀо йеза̄къалӀо.

⁴ Нӣйа билӀоъ мекьедана, гьолълъо аьлӀаъаш, йаги шагьарбаъаш кьа̄ь мекьецал, вагьалълъо билӀоъ лахбалӀечӀе бечелӀо.

⁵ Амма лъоди миже къабул боваъда, гьулиъис боьвачошлаъ, шагьарбала кавлидой мокъолъ, мизола гьалалъцола̄лъцо пах йолъола, гьоллол аьламатлъилаъ йахъалъгъа.

⁶ Мекьена Гьолло мо̄-мокъова̄ аьлӀа̄ъ на̄назу Рохеллис Хабарна ме̄йо, кӀовакӀова аьдамлана ба̄хъилло.

Гьерод гьаьгьелъна гьихлъойо

⁷ Гьерод ханлилна тухъийо къацӀцӀо караматлис хабар. Гьули гьаьгьелъна гьихлъойо, судлӀо нисода садло нисос зукъойо угъоваъас ахъна Ягья оᵸкъоналӀо.

⁸ Бадлосола нисос зукъойо Иляс авараг оᵸкъоналӀо, гьоᵸсо-гьоᵸсола – аьᵸйда̄ш гьоᵸс авараг угъоваъас ахъналӀо.

⁹ Гьероди нисойо: – Ягьяс до къаьм йуьчӀиллина зукъойо. СукӀод Гьули, вагьло хабар гьинис дил тухъилцас? Гьули эга̄л атӀна икье-аькьеш зукъойо Гьерод.

Лъина гьазайликьа оᵸкъова сукӀос бешна оᵸха йовацӀийо

¹⁰ Чапарла кьа̄ь мокъолъ, Исахъа йеᵸйагьийо гьиде йо̄-йо̄ва жойлас хабалла. Бета бадло аьдамла̄дойс гьолло̄лна бежеллина, Гьули эᵸкьейо БетсаидалӀо нисоцала шагьарлилъда̄.

¹¹ Амма халкъилал эᵸкьейас тухълъо, Гьолцогъой муьгъалӀ гьолло̄нна мекьейо. Иса гьолло̄л къабул богьна Аллагьлила Парчагьлис хабарна ме̄йо, бета сагъ бовал нуцӀова̄ аьдамлана ба̄хъилло.

¹² Водо нисда̄кийо. АцӀона къона асгьабла гьицана мекьена Гьолцохъа нисойо: – Халкъ меццабакӀа, гьицайцӀо гаьгьийа̄ аьлӀа̄ъна хъунна̄ъна гьидел буватӀанна бесанна маьче михъолас, судлӀо нисода иле гьолӀоъ аьдам-сукӀо гаьчча боьчӀчӀо авлахълиъ гей.

¹³ Амма Иса гьоллохъа нисойо: – Миже нилӀаъче гьоллол бесал кен! Гьогло нисойо: – Лъина баьбана къона бисана̄ъ бади кен-оᵸх гаьъа илохъа, къацӀцӀолал оьлло кен йохал мекьеда бахъас иле.

¹⁴ Гьулиъ зукъойо лъина гьазайликьа оᵸкъойо або. Амма Иса нисойо Гьинила асгьабла̄хъа: – Миже гьолло̄л, лъӣ-лъинайиг хъогьна мухъликьа къе̄ бечела!

¹⁵ Гьогцо нисогъа къацӀцӀа̄ гьолло̄л къе̄ бечелло.

¹⁶ Иса лъина баьбана къона бисана бокчина, гьаᵸсаъда̄на говацӀона, кенлил доьъа бо̄йо, бета бувакӀинна асгьабла̄хъа халкъилал битӀал нилӀийо.

¹⁷ КъацӀцӀа̄ оᵸха йоваццал бесийо. Муьгъатта̄ гьихлъойо роилла̄с ацӀона къона кедна боцӀийо.

Петерис Иса Масигь гаьгьийакьа йакӀо йоᵸкъос, Иса аварагли жу угъоцаласна кьа̄ь чӀаго ахъцаласна нисос

¹⁸ Гьоᵸс водолалъ аьдам-сукӀо гаьчча мицаъ тӀаъатлиъ гаьгьийа мехлаъ, Гьинила асгьабла̄хъа Гьолцо нисолло: – Халкъила До сукӀолъилаъад бикӀзи о̄с?

¹⁹ Гьолло жаваб нилӀийо: – Садло Ягья авараг, бадло Иляс авараг, гьоᵸсола бадо̄лъола аварагла̄ъас гьоᵸсцойс угъойо авараг аьгъиъна гейлӀо нисос.

²⁰ Иса гьоллохъа кьа̄ьна нисолло: – Миже сукӀолъилаъад До бикӀзи о̄с? Петерли жаваб нилӀийо: – Аллагьлис Масигь.

²¹ Амма Гьолцо асгьабла̄хъа лъази йо̄йо вагьалълъос гьоᵸссидихъана гьокӀ йагъа̄къалӀо нисона.

²² – Аьдамлила Оьждил тели азаб-акъуба бега̄л нуцӀос: букъа̄ кашишла̄на, гьаькимла̄на, вагьла̄зу диниябла аьлимла̄на гьинкьас инкар бо̄с, бета жу икьеш, лъанасла водиъ угъоваъас ахъца, – лӀо нисойо Гьолцо.

²³ Бетана Иса къацӀцӀолахъа нисойо: – Дӣгъой говал атӀийо сукӀо зогъда, гьинкьас ко̄на йагъала, шибаб водиъ гьинис хъанчна бохала, Дӣгъойна говала.

²⁴ СудлӀо нисода гьинис ругь цӀуми бовал батӀийо сукӀо, гьолълъо ругьлиъис маьгьрум ахъца. Дил оьло ругь нилӀийа сукӀос, ругь хъосар бахъца.

²⁵ Гьинизу жуна угъонна, йана гьинилзу гьини зарална богьна, вагьалӀо къацӀцӀо дуниялликьа ханлъилаъ аьдам ахъналӀона инсаллил сийона хайир гейди?

²⁶ Дона дие йаьжена бикӀзи йойэш сукӀо, Аьдамлила Оьждина бикӀзи оваъас, Гьинилана, Аболана, мукъадабла малаикла̄лана къудратликьа Гьули оᵸкъолъ.

²⁷ Гьаькъкъаб жо гейлӀо нисос мизохъа: вагьалӀоъ бечейа̄ла гьоᵸсолал хел мокъаъас Аллагьлис Парчагьлъи йегайчӀе.

Иса авараг бадизу ахъийо

²⁸ Вагьла̄ нисона муьгъатта̄ белӀналъийо водо йеᵸкьелъ, Петерна, Иоаннана, Якъубна къацӀо мокъона тӀаъат-ибадат бовал Иса эᵸкьейо ма̄ькьа.

²⁹ Гьуна вагьлиъ доьъа-гьари бо̄слаъ, Гьолцола мотӀолис куц хужойо, магъокьас лъицӀона бабалолъна гьаьлдолъийо.

³⁰ Гьуна вагьлиъ къона або Гьолцохъа икълашеш зукъойо. Гьолло̄л зувакъойо Мусана Илясна.

³¹ Гьогго̄л мовакъойо букъа рец-нурликьа. Гьогло нисойо Иерусалимлиъ оᵸкъолъ, Иса Аллагьлис амрона тӀубази богьна гьолӀо дунияликьас эᵸкьешлӀо.

³² Петерна къацӀо гаьгьийа̄на йуькьеэшла милӀаъ зувакъойо, амма лъуьъбалӀолъ, Иса букъа рец-нурликьа эга̄йо, эцокьа эчейо къона сукӀона эга̄йо.

³³ Гьогго̄л къонана сукӀоба бовачошлаъ, гьинил нисоцас йикъечӀе Петери Исахъа нисойо: – Йа̄ НасигьатсукӀо! Илол гьолӀоъ ахо гей. Лъана къай бовал: гьоᵸс Дул, гьоᵸс Мусал, гьоᵸс Илясил!

³⁴ Гьолцохъа вагьли нисослаъ, гьаᵸс-мусна йоᵸкъона, гьоллол гьидоци йахъийо. Вагьалълъо гьаᵸса-мусаъ гьогго̄л эᵸдобаклъо, асгьабла̄с йилӀа гьицӀода йейакийо.

³⁵ Бета гьаᵸса-мусаъкьа̄ гьодлол гьоᵸс гьокӀ тухъийо: – Гьули гей до гьакӀийо Дие оьжо. Гьолцохъа миже энекзи ба̄хъ!

³⁶ Вагьли гьокӀ тухъийаъ, Иса гьоᵸсцо гьихлъойо. Гьоглос гьокӀа йоваъийо, гьидел йега̄йо жо асгьабла̄ вагьагло водла̄ъ гьоᵸссидихъана нисеэш.

Иса зиннала̄ охийо гьоᵸс оьжо сагъ о̄йо

³⁷ Бета хиса ма̄ькьаш лӀийо мокъолъ, Исал данде тели аьлам мекьейо.

³⁸ Гьуна вагьлиъ, халкъилаъ эᵸдо гаьгьийо гьоᵸс сукӀо илӀела̄йо: – Йа̄ Муалим! Гьарзи йо̄с Дӯхъа, диела гьоᵸс гаьгьийа оьждихъа гоцӀохъ.

³⁹ Гьуна зама-замаллиъ зинналли охца гьули: гелокьас гьолцо хъаьлӀеш, илӀелас, муьшо мокъонна сикӀаъ поьп чӀалӀеллис. Тели азаб-акъобана нилӀна гьаьлалъ эццакӀца зинналли гьули.

⁴⁰ Дибола асгьабла̄хъа гьарзи йо̄йо зиннал боцӀалӀо нисона, амма гьоллохъа боцӀна бахъеэш.

⁴¹ Иса жаваб нилӀна нисойо: – Йа̄ иман гаьччо мекъаб агьло! Нитокцалди До мизогъой ахъал, нитокцалди миже гьекези бовал? Бета гьолцо сукӀохъа нисойо: – Акъа гьолӀоъ дибо оьжо, – лӀо.

⁴² Акъона го̄сла̄ъна, зиннал оьждикьа богицӀийо, къе̄на экинна гьолцол вагьго унти мокъолло. Иса зинналлихъа оьлиллалӀо нисойо, бета сагъ огьна оьжо абохъа нилӀийо.

⁴³ Аллагьлис гьаьлкӀолъи йегасдилӀо нисона къацӀцӀа̄ гьикмат ба̄хъийо. Йо̄ва муъжизатли къацӀцӀа̄ гьайран бовагьна гаьгьийа мехлаъ, Гьолцо асгьабла̄хъа нисойо:

Иса жу угъоцаласна кьа̄ь ахъцаласна бетана нисойо

⁴⁴ – Вагьаддо̄л Дие йаьжбо миже йакӀкьа йоваха: Аьдамлис Оьжо гьаколъечӀе аьдамла̄ла каъ ницца.

⁴⁵ Амма асгьабла̄л нисойо жойлас маъна биджи бахъеэш. Гьулина нисона зукъойо гьоллол йикъаъалъгъа. Гьолълъос нисолал гьолло̄лна гьийабачӀейо.

МутӀиъ бахъал нуцӀоцалас малъи

⁴⁶ Гьоᵸс водолалъ бахъийолӀо асгьабла̄ъ эᵸдо даьъба, сукӀод гьидеъ эᵸдо биссун укъо гейлӀо нисона.

⁴⁷ Гьоллола йакӀиъ гаьгьийо пикрона бикъена, Иса окчина гьоᵸс итӀино къова голца Гьиндой шеблаъ.

⁴⁸ Бета гьоллохъа нисос: – Диллабза вагьди къова охийо сукӀо Дона охийо сукӀо ахъца. До къабул о̄ва До мизодой э̄ᵸйо Аллагьна къабул о̄с. Вагьалълъобза мизоъ эᵸдос бишшун итӀино бишшун укъо ахъца.

⁴⁹ Вагьалълъол Иоанни нисойо: – Йа̄ НасигьатсукӀо! Илол иᵸхъойо Дибо ца̄на йагъона аьдамла̄ъаш зинналла йоваццас гьоᵸс сукӀо. Иле гьукъзи йо̄йо гьолцол, судлӀо нисода илогъой муьгъалӀ говаъцас сукӀо гаьлълъо.

⁵⁰ Иса гьолцохъа нисойо: – Гьукъзи йова̄къа, мизол данде эчеэш сукӀо мизос рахъ бохийо сукӀо ахъца.

Самариялила сид аьлӀа Исал гьоболлъи йойэш

⁵¹ Жу гьаᵸсаъ эᵸкьал нуцӀойо водбо кьодо йоᵸвакъалъе̄лъ, Иса Иерусалимлиъ эᵸкьал гьоькмо бо̄йо.

⁵² Жу оᵸкъолъол гьаьдурлъилал Гьинис асгьабла ме̄йо. Мекьена Самариялила сид аьлӀаъ бечейо гьолло̄л, Иса оᵸкъолъол гьаьдурлъина йогьна.

⁵³ Амма гьулиъ Иса къабул ойэш, Гьули Иерусалимлиъ эᵸкьецас икъелъ.

⁵⁴ Вагьли йикъелъ, асгьабла̄ Якъубина Иоаннина нисойо: – Йа̄ БетӀерчӀахъаяв! Дул йадда иле нисал, Иляс авараглицой, гьолло аьдамла̄л гьаᵸсаъкьа̄ цӀойис балагь мокъонна бувагъолалӀо.

⁵⁵ Амма, кӀаьйна уьᵸхона, гьоллос гьокӀа йоваъиллийо:

⁵⁶ – Мизол бийакъаъас миже нӣйа Ругьлис гаьгьийа̄на. Аьдамлис Оьжо дуниялликьа оᵸкъона гей аьдамла хъосар бовал, бувагъолал гаьъа Гьули дуниялликьа ахъна. Бета гьулиъис Исана асгьаблана балӀо аьлӀаъ мекьейо.

Иса авараглигъой муьгъалӀ мекьейо

⁵⁷ Гьид мекьешлаъ, сид сукӀо Исахъа нисойо: – До го̄с Дӯгъой, Ми на̄ эᵸкьедана.

⁵⁸ Иса гьолцохъа нисойо: – Сора̄с йецал къоьчӀова гей, гьаᵸсаъла мигьна̄с сӣᵸбо гей, амма Аьдамлила Оьждис къаьм гулал маьче гаьъа.

⁵⁹ Иса бацохъана нисойо: – Тос Дӣгъой. Гьолцо жаваб нилӀийо: – Йа̄ БетӀерчӀахъаяв! Гьакъкъа дил изно нилӀа дие угъойо або иᵸхъолал.

⁶⁰ Амма Иса гьолцохъа нисойо: – Бувагъова̄ аьдамла̄ гьидес бувагъова̄ мийахъолала, ми эᵸкье Аллагьлила Парчагьлис хабар мейал.

⁶¹ Бацосола Гьолцохъа нисолло: – До Дӯгъой къацӀо говал, БетӀерчӀахъаяв! Амма агьло-хъизаллихъа ахо бечелӀо нисал изно нилӀа дил.

⁶² Гьолцохъана Иса нисойо: – Маьче болӀослаъ боъосбас мигъна йохна, муьгъатта̄ говацӀоцас сукӀо Аллагьлила Парчагьлиъ кьухъаъас.