Лука 6 - Анкълова Лука

6 къаьм Шамат водо

¹ Шамат водиъ хъибола майдалла̄ъкьа̄ мекьал нуцӀойо Исана Гьолцос асгьаблана. Асгьабла̄ хъибос кьоᵸва̄ ко̄ъна йуьвашинна мугьла йуьᵸвахъча зувакъойо.

² Садло фарисейла̄ гьодлохъа нисолло: – Шамат водла̄ъ йовал йахъаъцас жо суд миже йо̄с? – лӀо.

³ Иса гьоллол жаваб нилӀийо: – Хъойэшди миже, жуна къацӀо гаьгьийа̄на нувабакона гьихбалъолъ, Давуди йо̄ва жойлас?

⁴ Аллагьлила билӀоъна эᵸдокна Давуди бокчина гей Аллагьлил бакъойо, кашишла̄йаъ муьхъал бахъаъцас баьба. Гьинина муьхъна гей, къацӀо гаьгьийа̄нна нилӀна гей.

⁵ Бетана нисойо гьоглохъа: – Шамат водис ихтияр Аьдамлила Оьждихъа гей!

Шамат водиъ ко̄ хъохъойо сукӀо ахъилло

⁶ БалӀосола шамат водиъ Иса ваъза-насигьатлил синагоглиъ эᵸкьал нуцӀойо. Гьулиъ зукъона гей кӀетӀакьас ко̄ хъохъойо гьоᵸс сукӀо.

⁷ Диниябла аьлимлана, фарисейлана Гьолцохъа гуцӀобахъна бечена зукъойо сагъ овалла̄лӀона, шамат водиъ вагьли кӀокӀо̄ ахъинналӀо нисона Исакьа аьйиб мокъолалъгъа.

⁸ Амма гьоглола йакӀиъ гаьгьийо жона йикъена, Иса ко̄ хъохъова сукӀохъа нисойо: – Аьгъиъна алӀлӀода̄ эче! – лӀо. Гьуги аьгъиъна алӀлӀода̄ эᵸкьейо.

⁹ Бета Иса гьоллохъа нисойо: – До мизохъа гьоᵸс жо нисолал: шамат водиъ сийод йовал йахъца – кӀетӀолъид йаги кешлъид? Аьдам ахълалди йаги угъолалди нуцӀос?

¹⁰ Гьогло къацӀцӀолахъана говацӀона, Иса гьолцо сукӀохъа нисойо: – Ко̄ йаᵸкъойцӀола, – лӀо. Иса нисогъа йо̄йо гьолцо сукӀо. Хъохъойо ко̄ сагъ йахъийо.

¹¹ Гьогго̄л йилӀа гьалаг ба̄хъийо, Исал сийоди йовал нуцӀослӀо нисона сидхъа-гьоᵸсо дандибази йовал муьхобалъийо.

АцӀона къона чапар гьакӀийо

¹² Вагьалло водла̄ъ Иса гьари-доьъалил сид ма̄ькьана эᵸкьена нише-хишей Аллагьлил тӀаъат богьна эчейо.

¹³ Хискьа Иса Гьинис асгьаблана ийалӀена, гьоллоъ эᵸдос ацӀона къона сукӀона гьакӀна, гьоллокьа чапарлалӀо нисона ца̄ᵸда гувалло. Гьолло̄нна зувакъойо:

¹⁴ ПетерлӀо нисона тӀокӀца̄ᵸ гаьгьийо Симон, гьолцос ис Андрей; Якъуб, Иоанн, Филипп, Бартоломей;

¹⁵ Маттей, Тома, Алфайлис оьжо Якъуб, Зелот ца̄ᵸ гаьгьийо Симон,

¹⁶ Якъубис оьжо Ягьуда ва бета Исал хиянат ахъийо Ягьуда Искариот.

Майдалликьа Иса букъо ваъза-насигьат бо̄йо

¹⁷ Гьинила асгьабла̄гъой къацӀо Иса, ма̄ькьаш лӀийона гогьна, авлахълиъ эчеш. Гьулиъ мокъос Гьолцос тели асгьаблана, къацӀцӀо Ягьудиялиъисна, Иерусалимлиъисна, гьула̄зу ралъадбадой шеблаъ гаьгьийа̄ Тирна Сидонна шагьарба̄ъаш букъо аьламна.

¹⁸ Гьулиъ мокъойо Исала ваъза-насигьатлихъа энекзи бахъална, гьула̄зу унтилаъас ба̄хълаллакьа йакӀо йоᵸкъова̄на, чикейа зинналла̄ азаб ниццаса аьдамлана; гьолло̄л Иса сагъ бовагьийо.

¹⁹ КъацӀцӀола халкъилал йатӀна зукъойо Исалъ ко̄ йеᵸхелал, судлӀо нисода Гьолцоъкьа̄ гугьцала букъа къудратлихъа къацӀцӀа̄ ба̄хъца зувакъойо.

²⁰ Бета асгьабла̄хъа гьаьйна йеᵸхенна Иса нисос: – Гьардарабла гей миже мискин-пакъирла, Аллагьлис Парчагьлъи мизол йиᵸхъолъ.

²¹ Гьардарабла гей миже, же нуко-аᵸхъаба̄, Аллагьли мизос оᵸха йовацӀлас. Гьардарабла гей миже, же бийабацаса, бета миже лъоᵸваба̄с.

²² Гьардарабла гей миже, аьдамла̄л ба̄тӀеэса, гьогло атаба̄кӀийа, мизокьа цӀокьдаба̄йа, мизос чикейа ца̄ᵸда гейлӀо нисона гиса тӀуватӀас мизос ца̄ᵸда, Аьдамлила Оьждидда̄ла.

²³ Рази ба̄хъ, рази ба̄хъна богба̄цӀ миже, судлӀо нисода гьаᵸсаъ мизол букъо шапаъат гей. Вагьалла̄зу гьоглола наслола̄ла абола̄на аварагла̄л йо̄йо.

²⁴ Амма балагь-азаб мизол бечедлъилаъ гаьгьийа̄л, кӀетӀо оьмро же мизол нилӀийо.

²⁵ Балагь-азаб мизол, же оᵸх йовацӀна гаьгьийа̄л, бета миже нувабакас. Балагь-азаб мизол, же лъоᵸваба̄йал, бета миже бийабана макъо йагъас.

²⁶ Балагь-азаб мизол, кӀетӀа̄ аьдамла гейлӀо нисона сикӀалъ къацӀцӀола ба̄гъова̄л. Гьоллола умумаллина вагьалла̄ йилӀа рец-бакъ бова̄гьийо аьйдла̄ гьересиаварагла̄л.

Рокьилас амро

²⁷ Дӣхъа энекзи бахъцала мизохъа нисоцас гей: мизос тушмалла ба̄тӀ, миже ба̄тӀаъцала̄л кӀетӀослъи йова.

²⁸ Мизол наьъана богьцала̄л баркат гулала, миже нуькучӀ бовагьийа̄ доьъалиъ ба̄гъа.

²⁹ Дул гога̄кьа баькьеллал, бадона гога̄ гуцӀола; дӯхъас чохъа-гужгат йагъовал, кьодос мухунна йагъона нилӀа.

³⁰ Шибабли гьарзи йо̄вал гьарзи йо̄йо жо нилӀа, нилӀийахъасна кьа̄ь йокӀа̄къа.

³¹ Бадло дул йовакъо̄йо жо ми гьоллонна йова.

³² Миже ба̄ццала̄л мизол ба̄тӀийа̄с нӣйо кирид бахъал? Мунагьла̄д бовацӀийа̄лна ба̄цца жуво̄л ба̄ццаса аьдамла.

³³ Мизол кӀетӀослъи йо̄вал кьа̄ь йоцӀона йо̄ва кӀетӀослъилас нӣйо кирид бахъал? Мунагьла̄д бовацӀийа̄на вагьлизу жо йо̄с.

³⁴ Кьа̄ь нилӀаллакьа кул бахъна боцӀи сукӀол къарзалаъ нилӀийа сукӀол нӣйо кирид бахъал? Мунагьла̄д бовацӀийа̄на сидил гьоᵸсо ницца йоцӀол, кьа̄ь кьодос камийойчӀе, йоᵸкъаллакьа йакӀона йоᵸкъонна.

³⁵ Амма мизол мизосзу тушмалла ба̄тӀ ва садакъа̄ йовагьа; йоцӀол нилӀийакьа кьа̄ь йоᵸкъаллакьа кул бова̄къа; бета мизол тели кири бахъца, бета миже Кьодда̄ла Аллагьлис къовалъилаъ ба̄хъца. Баркалла нилӀаъцала̄нна, кешлъи йо̄вална цӀоб гулцас гаьлълъо Гьуги.

³⁶ Мизос Аболъийозу гургьел-раьгьмо гаьгьийа ба̄хъ мижена.

Гьицаса какзи бова̄къа

³⁷ Миже сукӀокьа аьйиб бова̄къа, Аллагьли мизокьана боваъас; миже аьдам какзи ова̄къа, мижена какзи боваъас; миже кьодос тилӀбак, мизокьасна тилӀбакас.

³⁸ Мижена нилӀа – мизонна нилӀас. ЙилӀа лахлӀо-къуькъона гъоьдо богьна боцӀийо моьгьоре ницца мизол. Нӣйа моьгьорейад мизол масадана, вагьаллийа моьгьорейад мизонна масас.

³⁹ Вагьаддийона мисал бакъойо Иса гьоллол: – Боцдийа сукӀохъа бадисо боцдийо сукӀо эжеллина ахъцади? Гьолло̄л къонана хъарандийаъ бейакассаъди?

⁴⁰ Гьинила муалимлигъа лъай кьодда̄с ахъаъас мутаъалим. Амма жузу, къацӀцӀо жо йикъенна, камиллъилаъ оᵸкъода, шибаб мутаъалим муалимлъийо ахъца.

⁴¹ Суд дибола гьаьъ гаьгьийо михъо бегайчӀе истӀила гьаьъ гаьгьийо цӀих йегас?

⁴² Йана дӯхъа дибола истӀихъа нигъад нисона йахъца: Верейа ис, дибола гьаьъаш цӀих йагъоллаъче дӣд. Дибола гьаьъаш михъо бега̄ъас. Йе къона мотӀо гаьгьийо инсан, гьакъкъа ми дибола гьаьъаш михъо болъола, бета йагъал йахъца истӀила гьаьъаш цӀих.

⁴³ КӀетӀа хоьхкьа нӣйоди пихъ гуцӀаъас, бахъеэшла хоьхкьа кьодо кӀетӀо пихъна гуцӀаъас.

⁴⁴ Шибаб хоьхо бикъеш пихълихъа гуцӀобахъна, судлӀо нисода тӀитӀакьа легъи йахъаъас, зазликьас кӀодо бокӀолаъас.

⁴⁵ КӀетӀа сукӀо гьинила йакӀила кӀетӀа гъамасбаъас кӀетӀослъи гиса йагъос. ЙакӀо чикейа сукӀо гьинила йакӀила чикейа гъамасбаъас кешлъи гиса йагъос, судлӀо нисода сикӀа нисос йакӀиъ гаьгьийо жо дӣслъилъ.

Къона бигъа

⁴⁶ – Йа̄ БетӀерчӀахъаяв, йа̄ БетӀерчӀахъаяв! – лӀо нисона суд Дӣхъа илӀелабас, До нисогъана йойчӀе.

⁴⁷ Дӣгъой гугьцаса, Дӣхъа энекзи бахъцаса, Дие йаьже тӀубази йогьцаса – лъо̄лъ мелъейа̄д ба̄хъцасна нисал До мизохъа:

⁴⁸ гьули эᵸлъейо ахъца билӀо йогьцала сукӀолъ. Гьолцо эᵸдда̄с маьчена моьтӀона шедкьа кьодо бигъа гулло. Водбо тели гувагьлъо, эᵸхе билӀокьа йогицӀийо, гьолълъохъа гьули лахлӀонна йахъеэш, билӀо ахо кьучӀликьа йоᵸкъонна йо̄лъ.

⁴⁹ Дӣхъа энекзи ахъдана, До нисогъа йоваъцас сукӀо эᵸлъейо ахъца мицаъ бигъа гулечӀе билӀо йо̄ва сукӀолъ; эᵸхе йогицӀийоназу гьолцос билӀо йекна йугъос. БилӀос гьоьшшона гьихлъаъас.