Лука 5 - Анкълова Лука

5 къаьм Иса авараглис а̄ьᵸйдда̄ш асгьабла

¹ Аллагьлис калам тухъал батӀийа̄ аьдамла̄ со̄ᵸгъой къацӀобакна гаьгьийа мехлаъ, Гьули зукъойо ГеннисаретлӀо нисоцала ралъадбадой.

² Ралъадбаъ къона гама бегас Исал. Биса̄хъла, гамалиъис гисана гугьна, гьидеш биса̄ йовахцас къӣла низабас зувакъойо гьулиъ.

³ Иса Симонила гамалкьа кьодокийо. – Раъалликьас даьгьаб ралъадбаъ эᵸдда̄ гама беза, – лӀо нисона гьарзи йо̄йо Гьолцо Симонхъа. Гамалкьа къе̄на эчена Гьолцо аьдамла̄л ваъза-насигьат бо̄с зукъойо.

⁴ Ваъза-хабар болъолъ, Симонхъа нисос: – Ралъадбала гилъилла мицаъ гамана мокъонна, тӀутӀа дибо биса̄ йовахцас къӣ.

⁵ Симони Гьолцол жаваб нилӀийо: – Йа̄ НасигьатсукӀо! Гьуᵸлъ нише-хишей ла тӀутӀдана илол гьоᵸсна биса михъеэш. Амма Ми нисойо йаьже йугъолечӀе до гьаᵸкъкъаса̄за къӣ тӀутӀал.

⁶ Вагьла̄ нисогъа тӀулӀлӀо, гьоллол тели биса михъойо. Биса̄ла йаькъкъолъилахъа къӣ йа̄ьхал йуьᵸхолъийо.

⁷ БалӀо гамалкьа гаьгьийа̄ гьалмагъла̄хъа ишан богьна комаклил ийалӀейо. Мокъона гьоллона къацӀо комак богьна, къонана гама̄ бисалис йовацӀилло. Давлалила йаькъкъолъилахъа къонана гама̄ ралъадбаъ гъанкъизи йа̄хъал йуьᵸхоьбалъийо.

⁸ Вагьли йегалъ, Симон-Петри Исала мицна̄дой аьᵸйда̄ суждалкьана эчена нисойо: – Йа̄ БетӀерчӀахъаяв, олъо дидойс Ми! До гей мунагьла̄с оцӀийо сукӀо!

⁹ Вагьла̄ нисаъасди, гьулина гьолцогъой къацӀо гаьгьийа̄на котакалда гьийабачӀена зувакъойо тели бохийо биса бегалъ.

¹⁰ Вагьла̄зу, Симонил гьалмагълъилаъ гаьгьийа̄ Зебедайис оьждаь, Якъубна Иоанна, гьийабачӀейо. Бета Иса Симонхъа нисойо: – ГьицӀа̄къа! Желагъа муьгъатта̄ ми аьдамла бисацой бовахца.

¹¹ Гама̄на мицакьана кьисабана, гаьлъгъа къацӀцӀо жона йечаннегьна, гьолло̄л Исагъой къацӀо мекьейо.

Барас унтилаъ кӀокӀойо сукӀо сагъ ахъилло

¹² Гьуна Исал, сид шагьарбаъ оᵸкъолъ, къацӀцӀо магъокьа барас унти чӀалӀейо гьоᵸс кӀокӀойо сукӀо эгас. Иса эгалъ, гьули сукӀо Гьоцодой аьᵸйда̄ мотӀо лӀийода̄ къе̄на экна гьардизи ахъал уьᵸхолъча: – Йа̄ БетӀерчӀахъаяв! Дул адда, до Дӯхъа аᵸцонна сагъ огьна ахъца!

¹³ КӀокӀовал ко̄на йеᵸхенна Иса нисойо: – Дил атӀна гей: ми аᵸцо, сагъна ахъ! Нисослаъзу чӀалӀейо жона магъокьа кьодос йекна, гьули сукӀо аᵸцона сагъ ахъийо.

¹⁴ – Гьоᵸссидихъана хабар мейчӀе, эᵸкьена бегала дибо магъо кашишлил, аьдамла̄л ми ахъийолъи икъалъгъа Мусала къанонликьа къурбан муха, – лӀо нисона лъази йо̄йо Иса гьогцохъа.

¹⁵ Амма Исас хабар халкъилаъ гьех митемекьейо. Гьолцохъа энекзи бахъална, унтилаъас сагъ бахъална тели аьдамла мовакъос зувакъойо.

¹⁶ ГьулилӀо нисода, аьдамла гаьчӀела мицаъ эᵸкьена тӀаъатлиъ ахъца зукъойо.

Магъо хъохъойо сукӀо ахъилло

¹⁷ Гьоᵸс водолалъ Иса ваъза-насигьат бо̄слаъ, Гьолцохъа энекзи бахъийа аьдамла̄ъ эᵸдо зувакъойо Галилеялила шибаб аьлӀаъашна, Ягьудиялиъисна, Иерусалимлиъисна мокъова̄ фарисейлана динияб аьлимлана. БетӀергьаллис къудратлъи зукъойо Гьолцоъ кӀовакӀова ба̄хълал.

¹⁸ Гьуна гьоᵸс аьдамла̄ лӀоᵸвакьана гонна акъойо магъо хъохъойо сукӀо. КӀокӀо̄ сукӀо Исадой аьᵸйда̄ оᵸкъолална голална гьаьракат багъос зукъойо гьолло.

¹⁹ Амма тели халкъ бахъийахъа, эзал гьино йиᵸхъеэш. Кьамакьас кӀараматӀина йолъонна, лӀоᵸвакьа голгъа Исадой аьᵸйда̄ алӀлӀода̄ лӀийо э̄ᵸйо.

²⁰ Гьули сукӀо акъона мокъова̄ сукӀоба̄с божи бегалъ, Иса нисойо: – Аьдам, ми мунагьла̄ъас аᵸцойо!

²¹ Диниябла аьлимлана фарисейлана сидхъа-гьоᵸсо бикълабашал муьхобалъийо: – СукӀо сукӀод ахъал нуцӀос вагьди вагьаллийо инжитаб-гьаькъираб жо йекӀцас? Аллагьлихъа̄ъ инсаллис мунагьла чурзи йовагьна йа̄хъаъас, – лӀо нисойо гьогло.

²² Гьоглола йакӀиъ гаьгьийо жона йикъена, Иса нисолца: – Суд мизола йакӀиъ вагьаллийа пикрова йа̄хъийо?

²³ Сийод нисал пигьаяб гей: «Ми мунагьла̄ъас аᵸцойолӀод» йаги «Аьгъиъна эᵸкье-гогьлӀод»?

²⁴ Амма мизол йикъе, Аьдамлила Оьждисна ихтияр гей аьдамла̄ш мунагьла чурзи йовагьал... – Иса кӀокӀовахъа нисойо: – До дӯхъа нисос, аьгъиъна лӀоᵸна бежена билӀогъа эᵸкье!

²⁵ Вагьаллиъисзу аьгъиъна, жу акъойо лӀоᵸна бокчина, Аллагьлил рецна богьгъа, гьинила билӀогъа эᵸкьейо.

²⁶ Гьайран-гьикмат бахъийа̄ гьолло къацӀцӀола Аллагьлил рец бо̄йо. ЙилӀа гьийабачӀейахъа гьолло йекӀийо: – Гьикматаб жо йега̄йо илол жейса, – лӀо нисона.

Иса аварагли Левий асгьаблъилаъ охца

²⁷ Гьолълъогъа муьгъатта̄ Иса билӀоъос гисакийо. Гьинолис гьаькъ бокӀолцала билӀодой Гьолцол къе̄ эчена эга̄йо Левий ца̄ᵸ гаьгьийо гьоᵸс гьаькъ бокӀолцас сукӀо. – Дӣгъой муьгъалӀ тос, – лӀо нисос гьолцохъа Иса.

²⁸ КъацӀцӀо жона гаьлълъа̄чо йечаннегьна, аьгъиъна Гьолцогъой муьгъалӀ эᵸкьейо Левий.

²⁹ Гьинила билӀоъ мокъолъ, Левий йукъо гьоболлъи йо̄йо Исал. Гьулиъ зукъойо гьаькъ бокӀолцасана, гьула̄зу гьоллогъой къацӀо гагьийа̄ баддо̄л аьдамлана.

³⁰ Фарисейла̄на гьоглола диниябла аьлимла̄на Исала асгьабла̄хъа морлӀона нисолло: – Суд миже гьаькъ бокӀолцала сукӀоба̄гъойна, мунагьла̄с бовацӀийа̄ аьдамла̄гъойна къацӀо бес-хулӀос?

³¹ Иса гьоллол жаваб богьна нисос: – КӀовакӀовалла̄ъ, сахаб сукӀоба̄л дохтурлис комак батӀаъас.

³² До гогьна гей муъмилла гаьчӀел, муна̄пикъла ийабалӀал, гьолло тавба бовал балӀлӀо.

КӀаллис суал

³³ Гьогло нисолло Исахъа: – Ягьяла асгьабла̄на фарисейла̄ла мутаъалимла̄на дӣсда̄с как-кӀалла йовагьцала мехлаъ, гьоддо̄л Дибо асгьабла суд бес-хулӀона ба̄хъца? – лӀо нисона.

³⁴ Иса гьоллохъа нисойо: – Къимако шеблаъ гаьгьийа мехлаъ, гьолцо бейтелликьа ийабалӀейа аьдамла̄хъа, бес-хулӀечӀе кӀал йохна бечелӀо нисона йахъцади мизохъа?

³⁵ Къимако гьоллодойс агъойо водбо йоᵸвакъас, вагьалло водла̄ъ кӀал йохна гьолло̄нна ба̄хъас.

³⁶ Бета Иса гьоллол вагьаддийо хабар ме̄йо: – Лъона ицӀцӀо лъицӀона йаьхенна келла лъицӀокьа гъечӀе гуцӀаъас. ИцӀцӀо лъицӀона йугъос, келла лъицӀокьа ицӀцӀо гъечӀе гуцӀийолъина кьухъаъас.

³⁷ Лъона гитӀаъас ицӀцӀо гъино йугъал йоᵸкъова тӀикӀилаъ. Бетана ицӀцӀо гъинона къе̄ мекьас, йаьхена тӀикӀина йугъас.

³⁸ ИцӀцӀо гъино гитӀал нуцӀос ицӀцӀа тӀикӀилаъ.

³⁹ Келло гъино хулӀона муьгъатта̄, лъо̄нна кьодо ицӀцӀо гъино хулӀал батӀаъас, судлӀо нисода келлозу гъино кӀетӀо гейлӀо нисос.