Лука 4 - Анкълова Лука

4 къаьм Илбис Иса къосси овал муьхотухъийо

¹ Илагьияб Ругьлид оцӀийо Иса Иорданлиъис кӀаьй уьᵸхона го̄йо, бета Ругьли Гьули оᵸкъолло боьчӀчӀа авлахълиъ.

² Вагьлиъ йагъойо Иса оьᵸкъонайиг водо. Илбисли гьолцос гьаьлна бикъелло. Вагьлосинаб замаллиъ сикӀаъ лукӀма мейэш. Оьᵸкъонайиг водо йеᵸкьелъ, Гьули нукойо.

³ Вагьалълъо мехлаъ илбисли нисос Гьолцохъа: – Ми Аллагьлис Оьжо зогъда, вагьалӀо кьалхъа ниса баьбалал йуьᵸхолӀо.

⁴ Иса гьоглӀол жаваб нилӀийо: – ТӀекликьа чахна гей: «Сид баьбалакьа боваъас инсалли гьинис оьмро».

⁵ Бета илбисли ма̄ькьана оᵸкъонна, сид лагьзатлиъ дуниялликьа гаьгьийа̄ къацӀцӀа̄ пачалихъла йегабалло Гьолцол.

⁶ Бета гьоклӀо нисос: – Вагьадло къацӀцӀола пачалихъла̄с ихтиярна рецна до Дул нилӀал, судлӀо нисода гьолълъос ихтияр дӣхъа нилӀна гей, до дил атӀтӀийал вагьло ницца.

⁷ Ми дил сужда богьда, вагьли къацӀцӀо дибо йахъца.

⁸ Иса жаваб нилӀийо: – ТӀекликьа чахна гей: «Сид Аллагьлилла̄ъ сужда бова̄къа, БетӀергьаллилла̄ъ ибадат бова̄къа».

⁹ Бета илбисли Гьули Иерусалимлиъ эжена Аллагьлила билӀола кьохъкьана гонна, Гьолцохъа нисос: – Ми Аллагьлис Оьжо зогъда, вагьалӀоъла лӀийо огицӀ!

¹⁰ ТӀекликьа чахна гаьъад: «Аллагьли малаикла̄кьа амро бовас ми цӀуми овалӀо нисона».

¹¹ Бета: «Малаикла̄ каъ охна эзас кьалил дибо хаьба мехелечӀе».

¹² Иса жаваб бо̄йо: – «Ми БетӀергьан, дибола Аллагьлил гьаьлбики йова̄къа» – лӀо нисона чахна ТӀекликьа.

¹³ Гьолцол къацӀцӀо гьаьлбики йогьна лъикъолъ, илбис гьоᵸс санаъатаб мех мокъоцал боъийо Гьолцодойс.

Иса аварагли Галилеялиъ ваъза-насигьатла йовагьал уьᵸхолъийо

¹⁴ Иса оᵸкъойо Галилеялиъ Илагьияб Ругьна Гьиниъ бахъна. Гьолцос ца̄ᵸ на̄назу со̄ᵸгъой гаьгьийа̄ мица̄ъ йеᵸкьейо.

¹⁵ Синагогла̄ъ эᵸкьена Гьолцо ваъза-насигьатла йовагьийо, къацӀцӀола Гьолцол рец-бакъ бо̄с зукъойо.

Назаретлиъ Иса авараг къабул ойэш

¹⁶ Бета Иса тарбийа-лъай нилӀийа Назарет шагьарбаъ эᵸкьейо, гьинила аьдатликьа шамат водиъ синагоглиъна эᵸдокийо. Гьоллол ТӀек хъовал минбарликьа кьодокийо.

¹⁷ Ишая авараглис ТӀек нилӀийо Гьолцохъа. Вагьаддийо калима гаьгьийо мицаъ ТӀекна йеᵸгьена, хъо̄йо Гьолцо:

^18-19 – «Дӣъ БетӀергьаллис Ругь гей, гьолцо дил ихтияр нилӀийо Рохеллис Хабар мискилла̄хъа мейал, асирлъилаъ гаьгьийа̄ тиса ба̄гъоналӀо, боцдийа̄л канлъи йоᵸкъоналӀо, азаб-акъубалиъ гаьгьийа̄ гиса мегьналӀо. Аллагьлила раьгьматлис мех мокъоналӀо нисал эᵸгьна гей До».

²⁰ Бета Гьули ТӀекна йиᵸхъона, хъулухъчийахъана нилӀна, къе̄ эчейо. Синагоглиъ гаьгьийа̄ къацӀцӀолас гьаьй йеᵸхейо Гьолцокьа.

²¹ Иса гьоллохъа нисал уьᵸхотохъийо: – Жейса миже вагьалӀо калималихъа энекзи бахъцалаъ, чахийо жо тӀубази йахъийо.

²² Гьолцола каламли гьоллол букъо асар бо̄йо. Исала сикӀаъкьа̄ гугьцала вагьалълъо баркатаб каламли къацӀцӀа̄ аьжаиб бовагьийо. Бета гьолло нисойо: – Усупис оьжод гей Гьули?

²³ Иса нисойо гьоллохъа: – Гьай-гьай миже Дӣхъа кицина бакъона нисас: «Ми дохтур зогъда, гьакъкъа Мизу сагъ ахълӀо. Илол Капернаумлиъ йахъийо шинаб жо тухъийо, же вагьалӀо Дибола абола ракьликьана йова!» – лӀона нисас миже Дӣхъа.

²⁴ Амма Гьогцо гьоглохъа нисойо: – Гьаькъкъаб жо гей, гьоᵸсна авараг гьинила абола ракьликьа бикӀзи оваъас.

²⁵ Гьаькъкъаб жо нисос До мизохъа: Иляс авараглила замаллиъ лъана лӀина илъна боцо бахъийо мицакьа водо гуйчӀе къацӀцӀо дуниялликьа йукъо ракъи йоᵸкъона.

²⁶ Израиллиъна тели къоролла зувакъодана, Сидонлидой гьиᵸца гаьгьийа Царепатила сид къоролайдоййаъ эᵸйэш Аллагьли Иляс.

²⁷ Элиша авараглила замаллиъ Израиллиъна барас унтилаъ кӀовабакӀова тели аьдамла ба̄хъдана, Шамлиъис гьоᵸс НаъманлӀо нисоцас сукӀова̄ъ аᵸцолеэш гьолълъо унтилаъас.

²⁸ Вагьли тухъийоназу, синагоглиъ гаьгьийа̄ аьдамла гьалаг ба̄хъийо.

²⁹ Баьгъбаъна гьолло Гьули шагьарбаъаш гисана эжена бачилӀ тӀотӀаллӀо нисона, гьидес шагьар бо̄йо бизола раьъалликьа акъос зукъойо.

³⁰ Амма Иса халкъилаъас алӀос оьчона оъийо.

Капернаумлиъ Иса аварагли йегабалла̄ караматла 1. Чикейо зиннал гиса боцӀийо

³¹ Бета Галилеялила КапернаумлӀо нисоцала шагьарбаъна эᵸкьена, гьоллол шамат водла̄ъ Аллагьлис калам биджи бовал уьᵸхолъийо.

³² Гьолцола ваъзала̄кьа аьдамла аьжаиб ба̄хъна зувакъойо. Гьолцо нисоцас жо нисос зукъойо Гьиниъ гьаьлкӀолъи гаьгьийаъцой.

³³ Синагоглиъ зукъона гей зинналла̄ охийо гьоᵸс сукӀо.

³⁴ – ЭццакӀа! Сийод дул илоъкьа̄ йатӀна, Назаретлиъис Иса! – лӀо нисона йукъо илӀела̄л уьᵸхолъийо гьули сукӀо. – Иле пасад бовалди оᵸкъона Ми! Дил икъеш Ми Аллагьлис Илагьияб СукӀо ахъцаслъи!

³⁵ Иса гьокӀ йоъиллийо гьолълъос: – ГьокӀ йоъла, болъо Ми гьолцола магъоъос! Синагоглиъ алӀлӀода гьули сукӀона къе̄ икьена, гьоьшшона зарал бойчӀе гьолцола магъоъос зиннал гисакийо.

³⁶ КъацӀцӀа̄ гьайран бахъийо. Гьолло̄л сидхъа гьоᵸсо бикълабашал муьхобалъийо: – Сийо йаьжед гьули, гьинила къуватлидна къудратлидна амро богьцас зинналла̄л; гьолълъогъа муьгъатта̄ гьолло̄лна инсаллила магъоъос гисабакцас, – лӀо нисона.

³⁷ На̄назу со̄ᵸгъой гаьгьийа̄ мица̄ъ митемекьейо Исас хабар.

2. Петерлис йукъо ийо кӀокӀо̄ йахъилло

³⁸ Бета аьгъиъна, синагоглиъисна гисакна, Иса СимонлӀо нисоцала сукӀодой билӀогъа эᵸкьеш. Симонис йукъо ийо йаьчӀ-йиххала унтилаъ йилӀа кӀокӀона йиᵸхъос. Гьоло йахълалӀо нисона гьарзи йо̄с Гьолцохъа.

³⁹ КӀокӀовадой гьиᵸцана эᵸкьена, йаьжена нисона, гьолълъоъос унти болъолца. Вагьаллиъисзу йаьгъиъна, гьоллол кен-оᵸх гулал йуьᵸхолъча гьоло.

3. КӀовакӀова̄на ба̄хъилло, зинналлана аьдамла̄ъаш йовацӀийо

⁴⁰ Бохъ тӀикейа анталаъ тели кӀовакӀова̄ аьдамлана ба̄къона мокъойо Гьолцодой. Исана шибаблил ко̄ йеᵸхенна гьолло̄л ба̄хъилло.

⁴¹ Лади аьдамла̄ъаш зинналла йовацӀийо. – Ми Аллагьлис Оьжо гей! – лӀо нисона илӀелабас зувакъойо гьолло̄л йоьвачошлаъ. Амма жу Масигь гаьгьийолъи зинналла̄л икъелъ, Иса гьоллос гьокӀа йоваъиллис зукъойо.

⁴² Бета хиса водо хишейоназу гисакна Гьули боьчӀчӀа авлахълиъ эᵸкьейо. Халкъила Гьули иᵸзийо. Иᵸхъона муьгъатта̄, гьидедойс на̄на эᵸкьа̄къалӀо нисона гьардизи ба̄хъийо.

⁴³ Амма Иса гьоллохъа нисойо: – Аллагьлис Парчагьлъи йоᵸкъоцалас Рохеллис Хабар нисал До бадло шагьарба̄ъна эᵸкьал нуцӀос, вагьалълъол э̄ᵸйо гей До.

⁴⁴ Вагьла̄ Ягьудиялила синагогла̄ъ эᵸкьена, Гьолцо ваъза-насигьатла йовагьийо.