Лука 3 - Анкълова Лука

3 къаьм Ягья авараг халкъиладой аьᵸйда̄ аьгъиъца

¹ Тиберий къайсарлъилаъ ахънас ацӀона лъинас лӀи зукъойо; Ягьудиялиъ наиблъилаъ Понтий Пилат зукъойо; Галилеялиъ ханлъилаъ Гьерод зукъойо; гьолцос ис Филипп зукъойо Итурейлилана Трахонитлилана вилаятлис хан; Лисаний Абиленаллиъ ханлъилаъ зукъойо;

² Гьаннана Кайафана бишшун букъа̄ кашишлалъилаъ гаьгьийа мехлаъ, Закарияла оьждил – Ягьял боьчӀчӀа авлахълиъ Аллагьлис йаьже тухъийо.

³ Гьолцо Иордан эᵸхедой гьица гаьгьийа мица̄ъ кӀаьйлӀона лъӣд ма̄цоллолъи тӀибитӀизи йо̄йо, мизос мунагьла тавба богьда чурзи йа̄хъцалӀо нисойо.

⁴ Вагьаддийа йаьжбо ча̄хна гей Ишая авараглила ТӀекликьа: «Гьоᵸс гьокӀ тухъца боьчӀчӀа авлахълиъ: Гьуги оᵸкъолъол гьино къачӀази йова, Кьодда̄лал гьино йаᵸкъойцӀойо йова,

⁵ Шибаб куво-аьракъ йолъала, шибаб ма̄ь-бизова йеᵸйалъала, ЧӀикӀ-чӀекӀдийо жо йаᵸкъойцӀала, хир-хоькӀила̄ маьче мелъала,

⁶ Шибаб ругь-чӀаголъилал Аллагьлис хъосарлъи йега̄ла».

⁷ Гьолцодой ма̄цолал мокъова халкъилала аьламлихъа Ягья ниса̄гьийо: – Гьай миже, цӀодола бекелалис насло! Лъод миже тӀамзи бо̄йо кьодо мокъоцала Аллагьлила симолдойс боьвачал?

⁸ Миже бо̄ва тавбалас пихъ йегала. Иле Ирбагьинила наслолас къова̄ гейлӀо нисона бикълабаша̄къа. Гьуна До мизохъа нисос, Аллагьлил йадда вагьаддо̄л кьала̄на Ирбагьинила къова̄л Гьогцохъа йуьᵸвахонна йа̄хъца.

⁹ Хоьхила хемухадой оᵸг гуллолъи мизол йикъе. КӀетӀо пихъ кьодо йахъаъцас хоьхо буьчӀна цӀоъ гулцаслъи йикъе.

¹⁰ Гьиде сийод йовал нуцӀослӀо нисос зукъойо аьдамла̄.

¹¹ Ягья жаваб ницца зукъойо: – Къона мухун гаьгьийа гьоᵸсцойс гаьччал нилӀа, кен гаьгьийана вагьалла̄ йова.

¹² Мунагьла чурзи йовагьиллал мокъова̄ гьаькъ бокӀолал бечелла̄ аьдамла̄на нисолло гьолцохъа: – Йа̄ Муалим, иле сийод йовал нуцӀос?

¹³ Гьоллол жаваб нилӀийо Ягья: – Мизол бегаллагъа кьодда̄с багъа̄къа гьаькъ.

¹⁴ Вагьалла̄зу рагъухъалла̄на мокъона нисолло: – Илена сийод йовал нуцӀос? Гьоллохъана нисойо: – Гьоᵸссидихъасна гьичӀегонна окко йагъа̄къа, гьоᵸссидикьана гаьччо аьйиб гула̄къа, мизол ниццала харжликьа рази бахъна бече.

¹⁵ Масигь оᵸкъаллахъа гувабацӀона бечейаъ, халкъилал пикро бахъца зукъойо Ягья Масигь зогъаллӀона.

¹⁶ Ягья къацӀцӀолал жаваб нилӀийо: – До мизос мунагьла лъӣд йа̄ᵸцолца, амма оᵸкъос дӣгъана йилӀа къудратаб СукӀо. До гей гьолцола гьалалъцола̄с кьохъа̄ йа̄ᵸкал мустагьикъаб гаьччо сукӀо. Гьогцо мизос мунагьла йа̄ᵸцолас Илагьиябли ругьлидна цӀойидна.

¹⁷ Гьогцола каъ аьᵸко гей, нахоъос хъибо мацонна гьинила баькьиъ гулца, нахо гьоᵸсна йедаъцала цӀоъна гунна Гьолцо йекӀелца.

¹⁸ Рохеллис Хабар нисона вагьалла̄зу тели баддо̄нна насигьатла Ягья аьдамла̄л йовагьийо.

¹⁹ Гьерод ханли гьинила истӀис ахъо Гьеродиада йоᵸкъойолъина, бади гьокцос чороклъина Ягья мотӀолиъ йакьеллъо,

²⁰ Гьероди Ягья тӀусагъийаъ голло, ханли йовагьийа бадло кешлъила̄кьа кьодо вагьли кешлъина телилъийо.

Исана лъӣд ацолца

²¹ КъацӀцӀо гаьлъда-гаьгьийо аьламна мокъона лъӣд мунагьла йа̄ᵸцолцалаъ, Исана лъӣъна эᵸдокна доьъа бо̄слаъ, гьаᵸса йеᵸйагьейо.

²² Илбалила суратбакьа Илагьияб Ругь мокъойо гьолцодой. Бета гьаᵸсаъкьа̄ гьокӀ тухъийо: – Ми гей дил аццас дие Оьжо. Дӯкьа До рази гей!

Исала умумаллис кьибил

²³ Иса Аллагьлил хъуллухъ бовал уьᵸхолъийаъ, гьолцос зукъойо лъанайиглъийо лӀи. Гьолцола умумаллис вагьаддийо кьибил гейлӀо нисос зукъойо: гьолцос або Усуп, гьолцосна або Эли, бета

²⁴ Маттат, Леви, Малки, Яннай, Усуп,

²⁵ Матитя, Амос, Нагьум, Гьесли, Наггай,

²⁶ Магьат, Маттати, Шимъи, Йосех, Йода,

²⁷ Йогьанан, Реса, Зеруббабел, Шеалтиэл, Нер,

²⁸ Малки, Адди, Къасам, Алмодам, Эр,

²⁹ Ешуа, Элиэзер, Йорим, Маттат, Леви,

³⁰ Шимъон, Ягьуда, Усуп, Йонан, Элякъим,

³¹ Мелеа, Менна, Маттата, Натан, Давуд,

³² Йишай, Йобед, Боаз, Шалмон, Нагьшон,

³³ Аминадаб, Админ, Арам, Гьецрон, Перец, Ягьуда,

³⁴ Якъуб, Исгьакъ, Ирбагьин, Терагь, Нагьор,

³⁵ Серуг, Реу, Пелег, Эбер, Шелагь,

³⁶ Къейнан, Арпакшад, Шем, Нуьгь, Ламек,

³⁷ Метушелагь, Гьенок, Яред, Магьалалеэл, Къейнан,

³⁸ Энош, Шит, Адам, Аллагь.