Лука 24 - Анкълова Лука

24 къаьм Иса авараг шунаъ иᵸхъаъас

¹ Анкьилала аьᵸйда̄ла водиъ хискьа къайкьа, гьиде гьаьдур йо̄йо кӀетӀо маьгь гаьгьийо йеᵸлъна йежена, ийо̄л мекьейо шунакьа.

² Амма гьоллол шунакьа аьᵸйда̄ йецокьа гулло кьало ата̄кӀна йиᵸхъос.

³ Эᵸдобаклъо, Кьодда̄ла Исас жаназа шунаъ михъаъас.

⁴ Гьолълъокьа гьикмат бахъна сийона йовал йикъечӀе гьихбалъоваъ, гьоллодой аьᵸйда̄ эчеш кӀетӀо бабало лъицӀо лъичӀейа̄ къона сукӀо.

⁵ ГьийабачӀейахъа ийо̄л лӀийода̄ муьвакъона бечена бегабалъ, гьогло къонина гьоллохъа нисойо:

⁶ – Суд миже бувагъова̄ъ эᵸдо ЧӀагояб СукӀо иᵸзца? Гьули гьолӀоъ гаьъа. Гьули угъоваъас кьа̄ь чӀаго ахъна. ЙакӀкьа йоᵸкъола Галилеялиъ гаьгьийа мехлаъ, Гьокцо мизохъа нисойо жо:

⁷ Аьдамлис Оьжо гьакъкъа мунагьла̄д бовацӀийа аьдамла̄хъа ницца, бета гьолло Гьули хъанчлилъ охонна икьеш, амма угъона лъанасла водиъ Гьули кьа̄ь чӀаго ахъца, – лӀо.

⁸ Гьолло ийола̄л Иса нисойо жо йакӀкьа йоᵸкъойо.

⁹ Шунакьаш мокъолъ, ийола̄ вагьло хабар ме̄йо Исала ацӀон сид гьицала чапарлихъана, гьула̄зу бадло асгьабла̄хъана.

¹⁰ Гьолло̄л ийо̄л зувакъойо Мариян Магдаленана, Иоаннана, Якъубис ийо Мариянна, баддо̄нна. Ийола̄ чапарла̄хъа вагьлозу хабар ме̄йо.

¹¹ Асгьабла̄л гицӀийо вагьга̄зу хабар гейлӀона. Ийола̄ла хабалликьа гьолло̄л боьважеэш.

¹² Амма вагьаллиъисзу Петер аьгъиъна чӀалликьа эᵸкьейо шунакьа. Эᵸдона эᵸкьена говацӀолъ, мусрова̄ъ бади сийона жо йиᵸхъеэш гьулиъ. Гьикматна ахъна гьули кьа̄ь билӀогъа эᵸкьейо.

Угъоваъас ахъийо Иса авараг гьид кези ахъца

¹³ Вагьалълъозу водиъ Исас къона асгьаб Иерусалимлиъис ацӀона гьоᵸс киламетралаъ цӀихода̄ гаьгьийа ЭммауслӀо нисоцала аьлӀаъ эᵸкьеш зукъойо.

¹⁴ КъацӀцӀо йахъийа жойлала хабарликьа зукъойо гьолло̄л.

¹⁵ Йахъийо-йеᵸкьейо жо йакӀкьа йоᵸкъонна бикълабашена мекьешлаъ, Жу Иса гьоллодойна гьицакна къацӀо эᵸкьеш зукъойо.

¹⁶ Амма Аллагьли Иса гьоллол икъал ойэш, гьоллола гьаьйда̄ьгъа аьᵸйда̄ пардав гунна зукъойо.

¹⁷ Иса гьоллохъа нисолло: – Лъинисди миже бикълабашеш гьиногьид мекьешлаъ?

¹⁸ Пашманлъилаъ мекьецас гьолло̄л беченувацӀийо. Сидцойла, Клеопа ца̄ᵸ гаьгьийасола, Исахъа нисойо: – ВагьалӀо водла̄ъ Иерусалимлиъ мокъова̄ъ эᵸдо йахъийо жо йикъаъцас гьоᵸс мийа̄ъ зогъассаъ.

¹⁹ – Лъинис? – лӀо нисолло Иса. – Назаретлила Исас, – лӀо нисона жаваб нилӀийо гьолло, – Гьули зукъойо Аллагьлидойна къацӀцӀо халкъиладойна аьᵸйда̄ Гьини богьцала гьаьлтӀиласна, йаьжисна, гьаьлкӀолъи гаьгьийо авараг.

²⁰ Амма букъа̄ кашишла̄на гьаькимла̄на Гьули икьал гьоькмо бойиллийо, Гьули хъанчлилъ охолло.

²¹ Вай, илол гицӀна зукъойо Вагьаллисо Израиллис халкъ хъосар бовал оᵸкъойо сукӀо гейлӀона. Гьуна жейса лъанас водо гей вагьли жо йахънас.

²² Амма гьоᵸсо илла ийола̄ ме̄йа хабарли иле гьикмат бо̄йо. Жейса хискьа къайкьа мекьена зукъойо гьолло̄л Исала шунакьа.

²³ Гьогцос жаназана михъечӀе, Гьуги чӀаго гейлӀо нисоцас малаикла бегаба̄йолӀо нисона ийо̄л кьа̄ь мокъойо.

²⁴ Илоъ эᵸдос саддо̄л шунакьа мекьелъ, ийола̄ нисогъа шунаъ жу Иса иᵸхъеэш.

²⁵ Вагьлиъис Иса гьоллохъа нисойо: – Аварагла̄ аьᵸйда̄жу нисоцала жойлакьа боьважал баькъкъа̄ъ йакӀис аьгьмакъабла аьдамла гей миже!

²⁶ Масигьли азаб-акъуба гьекези бовал нуцӀаъасди, вагьла̄йаъ гьули Гьинила букъа рецлиъ оᵸкъал нуцӀос зукъойо.

²⁷ Мусакьалакьа̄ уьхолъна къацӀцӀа̄ авараглана бакӀкьа мокъонна, гьинис ТӀекла̄кьа чахийо шинаб жо биджи йо̄йо Иса гьоллол.

²⁸ Гьаᵸже гьолло̄л гьоглӀо аьлӀадой мокъаллъейо. Иса эченоцӀечӀе эᵸкьецас хел бо̄йо.

²⁹ Бохъна боъца, нишеш мехна мокъос, илогъой къацӀо вагьалӀо аьлӀаъ нише эчелӀо нисона гьарзи йо̄йо Гьолцохъа. Рази ахъна Исана гьоллогъой нише эцал билӀоъ эᵸдокийо.

³⁰ Бесал муьхобалълъо, Иса рец-бакълис доьъана богьна, букӀинна баьба нилӀийо гьоллохъа.

³¹ Вагьлиъис аьᵸйда̄ш пардавна йолъона гьоллос гьаьйда йеᵸйагьейо – Иса гаьгьийолъи икъейо. Амма Иса гьоллол эга̄ъцас ахъийо.

³² Бета гьолло сидхъа-гьоᵸсо нисойо: – Гьиногьид гьидехъа икълашена, ТӀекла̄кьа гаьгьийо хабар биджи бо̄слаъ, цӀоъцой зукъеэшди илос йакӀода?

³³ Вагьаллиъисзу гьолло̄л баьгъбаъна Иерусалимлиъ кьа̄ь мекьейо. Шагьарбаъ эᵸдобаклъо, гьоллол мийахъойо ацӀона гьоᵸс чапарна, гьула̄зу баддо̄л аьдамлана асгьаблана.

³⁴ Гьодло гьоллохъа нисойо: унгосалда Кьодда̄с Иса чӀаго ахъна гей. Шунаъас аьгъиъийо Гьули Симонил эгана.

³⁵ Гьодлона ме̄йо гьидегъой къацӀо Иса гьид зукъовас, бесцалаъ баьба букӀиллъо, гьидел Гьули Иса гаьгьийолъи икъейас хабар.

АцӀон сид чапарлидойна асгьабла̄дойна аьᵸйда̄ оᵸкъос

³⁶ Вагьла̄ гьолло̄л бикълабашешлаъ, салам алайкумлӀо нисона Иса гьоллокьа кьодо оᵸкъойо.

³⁷ ГьийабачӀена, гьаьл хуьжона гьихбалъова̄ гьодлол гицӀийо вагьло бувагъова̄с ругь зогъцалӀо гьидедой мокъона.

³⁸ Иса гьоллохъа нисойо: – Суд миже гьийабачӀена? Суд мизола йакӀиъ шаклъи гей?

³⁹ ГуцӀобахъ Дӣхъа: гьуна Дие ко̄да, гьуна Дие хаьба̄. До мизодой аьᵸйда̄ эцокьа эчена гей. Ко̄ йеᵸхенна хал бова мижезу. Бувагъова̄ла ругьлис лӀоьᵸва̄на лӀоьᵸва̄кьа хона йахъцади? Диела магъокьа вагьли гей.

⁴⁰ Вагьла̄на нисона, Иса гьинис ко̄дана хаьба̄на гьоллол йегабалло.

⁴¹ ЙилӀа разина гьайран-гьикматна бахъийахъа, боьважечӀецойна бегабалъ, Иса бесал кен гаьъадлӀо нисолло.

⁴² Гьолло Исахъа нилӀийо зиза̄ бисалис роъил.

⁴³ Гьоллодой аьᵸйда̄кьа бокчина муьхъийо Гьинил нилӀийо биса.

Ахирияб букъо тӀадкъай

⁴⁴ Бета Иса гьоллохъа нисойо: – Гьуна, До гьогго̄лъо нисова йаьжла̄ш маъна: Мусалана бадло аварагла̄ла ТӀекла̄кьана, забурла̄кьана Дӣкьас чахийо шинаб жо йахъал нуцӀослӀо нисона.

⁴⁵ Гьолцо гьоллос гьаьйда йеᵸйагьелло ТӀекликьа чахийо жо гьоллол биджи йахъалъгъа.

⁴⁶ Бетана Гьолцо нисойо гьоллохъа: – ТӀекликьа чахна гей Масигь азаб-акъуба нилӀна угъос, угъона лъанасла водиъ шунаъаш аьгъиъца.

⁴⁷ Иерусалимлиъкьа̄ муьхобалъна къацӀцӀола халкъилахъа, мунагьла чурзи йовагьцала Аллагьлилъда̄ муьвахолӀо, гьолцола ца̄ᵸйакьа гьулина нисослӀо.

⁴⁸ Мизол вагьли къацӀцӀо гьаькъкъаб гаьгьийолъи йега̄йо, миже нуьъла гей.

⁴⁹ Диела Або кьодо йохийо жо гьаколъечӀе До мизодой йе̄ᵸш. Вагьли гьаьлкӀолъи кьодда̄с мизодой йоᵸкъоцал, Иерусалим шагьарбаъ бече.

Иса авараг гьаᵸсаъ эᵸкьейо

⁵⁰ Иса гьолло̄л Иерусалимлиъис Бетанийалиъикцал бейажейо. Ко̄дана гувацӀонна баркат гулалӀо нисойо.

⁵¹ Иса гьоллол доьъана богьна, Гьули гьаьтеэчена гьаᵸсаъ эᵸкьена оъийо.

⁵² Гьолло̄л сикӀо лӀийода̄ бейакийо, бета йукъа разилъилакьа Иерусалимлиъ мекьейо.

⁵³ Гьолълъогъа муьгъатта̄ гьолло̄л Аллагьлила билӀоъ бечейо, Аллагьлил воддиъ тасбигьна йогьна. Амин!