Лука 22 - Анкълова Лука

22 къаьм Иса авараг мунагьла̄д бовацӀийа сукӀоба̄ла каъ ницца 1. Ягьудиялис къотӀина гьоькмона

¹ Гьинкьа ПасхалӀо нисона ца̄ᵸ гулло йӣэшла йоьᵸтоба̄ш баьба̄ йовагьцас ид-водо гьицакца зукъойо.

² Букъа̄ кашишла̄на диниябла аьлимла̄на вагьалло водла̄ъна аьмал бо̄с зукъойо Иса икьал санаъат михъолал, амма гьолло̄л халкъилахъа гьийабачӀена зувакъойо.

³ АцӀон къониъ эᵸдос Искариот тӀокӀца̄ᵸ гаьгьийо Ягьуда асгьаблила йакӀиъ илбис эᵸдокийо.

⁴ Букъа̄ кашишла̄дойна Аллагьлис билӀо цӀуми йо̄ва рагъухъаллидойна эᵸкьена, гьолцо асгьабли Иса нигъа гьоллохъа нилӀалсо къотӀи бо̄йо.

⁵ Гьолло̄л йилӀа рази бахъийо, гьолцол окко нилӀал къотӀина бо̄йо.

⁶ Гьини вагьли жо тӀубази йо̄слӀо нисона гьолцона йаьже нилӀийо. Аьдамла гаьччо къулаяб маьче мизца зукъойо гьолцо гьоглохъа Иса нилӀал.

2. Пасха ид-водил гьаьдурлъи

⁷ Йӣэшла йоьᵸтоба̄ш баьба̄ йовагьцасна къурбаллил лӀиле мухоцасна Пасхалис водо кьодо йоᵸкъойо.

⁸ Иса Петерлихъана Иоаннхъана нисойо: – Мекьена ид-водис кен гьаьдур йовалӀо.

⁹ – На̄д Дул гьули йовал йатӀна гей? – лӀо нисолло гьолло.

¹⁰ Иса нисойо: – Шагьарбаъ эᵸдобака̄цо мизол иᵸхъос лъӣс билӀейна боцӀинна эᵸкьецас гьоᵸс сукӀо, гьули эᵸкьейа билӀоъ мижена мекье.

¹¹ Бета миже билӀола бетӀергьаллихъа вагьда̄ ниса: «Муалимли дӯхъа нисолло, на̄д гей ид-водиъ Жуна Гьинис асгьаблана нише бесал къачӀази йо̄йо билӀо?»

¹² Гьолцо сукӀо мизол йегалас кьодола билӀоъ бекӀейа говатойо гьоᵸс йукъо отахи. Вагьлиъ йова миже гьаьдурлъи.

¹³ Гьулиъ мокъолъ, гьоллол Иса нисогъа къацӀцӀо жо йиᵸхъо̄йо. Ид-водис кенна йогьна гьолло̄л гувабацӀона бечейо.

3. МарчӀокӀолъ бахъийо балъгояб хабар

¹⁴ МарчӀокӀолъ бесалцо мех мокъолъ, Исана чапарлана бесал къе̄ бечейо. Иса гьоллохъа нисойо:

¹⁵ – Дие букъо гъира гей азаб-акъубалиъ кези ахъал аьᵸйда̄ мизогъой къацӀо вагьалӀо ид-водиъ эсал.

¹⁶ СудлӀо нисода тӀокӀаб мизогъой ид-водиъ къацӀо эсал Дие рес бахъаъас, Аллагьлила Парчагьлиъ кӀетӀо ид-водис бесийолъи йахъцал.

¹⁷ Бета Иса, гъинолис боцӀийо дончана бокчина, рец-бакълис доьъана богьна, нисойо:

¹⁸ – Гьаᵸъа, бокчина къацӀцӀола хулӀа. До мизохъа нисос: Аллагьлис Парчагьлъи йоᵸкъоцал До желагъа муьгъатта̄ тӀокӀаб кӀодас бо̄йо жа хулӀаъас.

¹⁹ Баьбана бокчина, рец-бакълис доьъана богьна, Гьолцо бувакӀинна гьоллол нилӀийо: – Вагьло гей мизол къурбанлъилаъ бечецас Дие магъо. Дона акӀкьа оᵸкъонна мижена вагьда̄ йова.

²⁰ Бета бесна муьгъатта̄, гъинолис боцӀийо дончана бокчина, Иса нисос: – Вагьдо гей мизодда̄ла гиса мегьцас гьеᵸ – ицӀцӀо къотӀилас гьеᵸ.

²¹ Гьуна, гувабацӀона бече! До жейса тушмалла̄хъа ниццас ко̄ гей Диела ко̄гъой сид истӀолийакьа.

²² Вагьла̄ Аьдамлис Оьжо эᵸкьал нуцӀос Аллагьли аьᵸйда̄жу йегалло гьиногьид, амма гьолцол хилип бахъийа̄л балагь мокъос.

²³ Гьолло̄л муьхобалъийо сидхъа-гьоᵸсо нисолал: сукӀоле гьиᵸдеъ эᵸдо вагьли жо йовал йакӀиъ хиял гаьгьийо сукӀо гейлӀо нисона.

4. «Бишшун укъо сукӀод гей?»

²⁴ Асгьабла̄с бахъна гей даьъба: сукӀод гьиᵸдеъ эᵸдо бишшун укъо ахъал нуцӀослӀо нисона.

²⁵ Иса гьоллохъа нисойо: – Мажусла̄ла парчагьла̄ ханлъи йо̄с, халкъилакьа ханлъи гаьгьийа̄на бикӀзи бо̄с тӀалаб-агъаз богьцаса аьдамлалъилаъ.

²⁶ Амма миже гьула̄ бахъал нуцӀаъас. Мизос бишшун укъо эче бишшун итӀиноцой, ханлъилаъ жу бикӀзи о̄йо лагъцой ахъ!

²⁷ СукӀод гей укъо: раьгьатликьа эсцас сукӀод, йаги бесцала̄л хъуллухъ богьцас сукӀод? Гьай-гьай, эсцас сукӀо гаьъад! Гьуна до мизол гьолӀоъ хъуллухълил эчена гей.

²⁸ Дил йегаба̄ балагь-азабла̄ъ миже Дӣгъой къацӀо ба̄хъийо.

²⁹ Диела Або Дил ирслиъ нилӀийо Парчагьлъи До мизонна ирслиъ йечанне̄ш.

³⁰ Диела Парчагьлиъ Дӣгъой истӀолийагъа миже бесцасна хулӀоцасна ба̄хъца. Гьула̄зу тахла̄кьана къе̄ бечеш Израиллила наслолас ацӀона къона тухумла̄л гьоькмова йуьвачӀал.

5. «Ми Дӣкьас инкар бовас, Симон!»

³¹ – Симон, Симон! Энекзи ахъ! Илбисли гьарзи йо̄йо, хъибо бох-нахоъос иᵸззаъ исийаъийаъцой миже исибаъалӀо нисона.

³² Амма До дул доьъа-гьари бо̄йо, дибо божи-иман мукъсан бахъечӀе гьихлъалъгъа. Кьа̄ь бета Дидой оᵸкъолъ, динлила исна̄сна йакӀода йилӀабакъола.

³³ – Йа̄ БетӀерчӀахъаяв! – лӀо нисос Петерли Исахъа. – До гьаьдураб гей Дӯгъой къацӀо тӀусагъийаъ эᵸкьанна, угъал нуцӀода угъанна.

³⁴ – Нисос дӯхъа Петер, – лӀо нисойо Иса, – хисалдайлил мамали уьᵸъудалъол, лъахна инкар бовас Дӣкьас, До икъаъаслӀо нисона эцас.

6. Иса гьаьдур бахъна бечелӀо нисос

³⁵ – Йа окко-месед гаьчӀел, йа моьшокӀи-къацӀиццо йоькчечӀе, йа гьалалъцова гийахечӀе До Дие чапарлацой мегьна муьгъатта̄ мизол нӣйона къарилъи йахъийоди? – лӀо нисолло гьоллохъа Иса. – Йахъеэш, – лӀо нисона жаваб нилӀийо гьолло.

³⁶ Иса гьоллохъа нисойо: – Амма же окко гаьгьийа̄ гьулина къацӀо йеза, гьиногьидил санаъатлъилал моьшокӀи-къацӀиццона йоькча. Балъаййа гаьчча̄, кьодо лъичӀейо чухъа-гужгатна йиᵸсона, балъаййа йовахал санаъат бова.

³⁷ До мизохъа нисос: «Гьули такъсирчилъилаъ бикӀзи овас», – лӀо Дӣкьас ТӀекликьа чахийо жо тӀубази йахъалълъегьна гей. Дӣкьас чахийо жо же йахъца.

³⁸ Асгьабла̄ нисолца: – Йа̄ БетӀерчӀахъаяв, вагьалӀоъ къона балъай гей. – Оьлилла, – лӀо нисойо Иса.

6. Иса авараг Гетсеманияъ а) Гетсеманияъ гаьгьийо къеркьей

³⁹ Бета гьулиъис гисакна, воддиъ эᵸкьецала Зайтун ма̄ькьа эᵸкьейо. Гьолцогъой муьгъалӀ асгьаблана мекьейо.

⁴⁰ Ма̄ькьа мокъолъ, Иса гьоллохъа нисойо: – Мизос гьаьл бикъелцалаъ, сабру-ягь бахъалъгъа, доьъа̄ йовагьа.

⁴¹ Йикьейо кьало йоᵸкъова манзиллиъ гьоллодойс ата̄на эᵸкьена, суждалкьана эчена, Иса доьъа бовал уьᵸхолъийо.

⁴² Гьолцо нисос зукъойо: – Йа̄ Дие Або! Дибо амро зогъда, хеллис гьино Дӣдойс ата̄кӀа! Амма Дил йатӀгъа гаьъа, Дул йатӀгъа йахъала.

⁴³ Гьаᵸсаъкьа̄ оᵸкъона, малаикли Гьолцос йакӀо йилӀакъолло.

⁴⁴ Вагьлиъис йакӀиъ гаьгьийа букъа гьаьлчейликьа, Гьули кьодона тели Аллагьлихъа гьардизи ахъал уьᵸхолъийо. Гьолцоъкьа̄ гугьцас гьад гьеᵸйас кӀаькӀачой мицакьа тӀаьлӀеш зукъойо.

⁴⁵ Доьъана лъикъона, Гьинила чапарладой кьа̄ь оᵸкьолъ, Исал гьолло̄л пашманлъилахъа буьчаба̄хена мийахъос.

⁴⁶ – Суд миже буьчаба̄хена? – лӀо нисолца Иса. – Баьгъбаъ, мизос гьаьлла йийакъелцалаъ, сабруна ягьна бугъечӀе гьихлъалъгъа, гьари-доьъа̄ йовагьа.

б) Ягьуда баъда̄лъи, бета Иса авараг охийолъи

⁴⁷ Вагьла̄ гьоллохъа икълашешлаъ, тели халкъ кьодо мокъойо. Халкъилагъа аьᵸйда̄ зукъойо Исас ацӀон къониъис ЯгьудалӀо нисоцас гьоᵸсцойс асгьаб. Гьуги баъда̄л Исадой гьиᵸцакийо.

⁴⁸ Иса Ягьудахъа нисойо: – БаълӀонад ми Аьдамлис Оьжо тушмалла̄л икъал о̄с, – лӀо.

⁴⁹ Гьулиъ йахъцас жо йегалъ, со̄ᵸ гаьгьийа асгьабла̄ Исахъа нисос: – Йа̄ БетӀерчӀахъаяв! Балъаййа йа̄гъалди?

⁵⁰ Асгьабла̄ъ эᵸдо гаьгьийа сидцойсола балъай йакьенна сид укъа кашишлила лагълис кӀетӀакьас аьᵸгъа йуьчӀийо.

⁵¹ – Оьлилла, беченувацӀ! – лӀо нисойо гьоллохъа, кьодо ко̄на йеᵸхенна, Иса лагълис аьᵸгъа сагъ йо̄йо.

⁵² Гьингъой муьгъалӀ мокъова̄ букъа̄ кашишла̄хъана, Аллагьлис билӀо цӀуми йогьна бечейа̄ рагъухъалла̄хъана, гьаькимла̄хъана Иса нисойо: – Балъаййана хечлана йа̄къона, къачагъ охал гӯваъцой, мокъона гей миже До охал.

⁵³ Воддиъ До мизогъой, къацӀо Аллагьлила билӀоъ ахъца зукъо̄ваъ, гьугиъ, миже Дил ко̄ йеᵸхелеэш. Амма же мизос саъат мокъона гей, нишела ханлъилас мех мокъона гей.

7. Петерли Иса авараг икъаъаслӀо нисона инкар бо̄йо

⁵⁴ Охна эжейо гьолло Иса укъа кашишлила билӀоъ. Гьоллогъой муьгъалӀ гьаьтеэчена эᵸкьеш зукъойо Петерна.

⁵⁵ Гьогцо кашишлила билӀола бежиъ йалӀода̄, цӀона йекӀенна, гьогго̄л со̄ᵸ къе̄ бечейо. Гьоллоъ алӀо цӀо̄дой Петерна къе̄ эчейо.

⁵⁶ Сид гъарабашли цӀо̄дой шеблаъ Петер эгалъ, ахо гьогцохъана гийачӀена нисос: – Вагьли сукӀона Гьокцогъой къацӀо зукъойо.

⁵⁷ Амма Петерли инкар бо̄йо: – Йе аьдам, дил Гьули икъаъас.

⁵⁸ Гьолълъогъа муьгъатта̄ тели мех мекьечӀе бацо сукӀона нисос: – Мина гьоглос сукӀо гей, – лӀо нисона. Петерли жаваб нилӀийо: – Гаьъа гьалмагъ.

⁵⁹ Саъатлъийо заман мекьелъ, бацосола сукӀона йилӀа йакӀона йоᵸкъонна нисос: – БитӀараб гей, вагьди сукӀо Гьокцогъой къацӀо зукъойо. Гьулина Галилеялиъис ахъца. Амма Петерли нисос:

⁶⁰ – Энекзи ахъ, ми сийод йекӀца, гьалмагъ! Гьолцо вагьли нисослаъ, мамали уьᵸъуда̄л муьхолъийо.

⁶¹ Кьодда̄с Иса, кӀаьйна уьᵸхона, Петерлихъа говацӀойо. Петерлил йакӀкьа йоᵸкъойо Кьодда̄ла Иса гьинхъа нисова̄ йаьжбо: «Хиссалдайлил мамали уьᵸъудалъол, ми лъахна Дӣкьас инкар бо̄слӀо».

⁶² Гьулиъисна гисакна, Петер йилӀа ийа̄йо.

Иса диваллил аьᵸйда̄ эчелло

⁶³ Иса охийа аьдамла̄ Гьули, нуькучӀна огьна, а̄ькьелло.

⁶⁴ Гьаьйдана йиᵸйацона гьолло нисолца зукъойо: – Авараг зогъда, лъод Дул бакьелло йикъелалӀо нисона.

⁶⁵ Бадина лади инжитаб жо йекӀийо гьолло Исахъа.

⁶⁶ Хискьаклъо, Ягьудиялис гьаькимлана, букъа̄ кашишлана, динияб аьлимлана гьулиъ къацӀобакийо, бета Иса эжейо бишшун кьодда̄с диван богьцала мицаъ.

⁶⁷ Гьогло нисолло: – Ми Масигьди гей? Ниса илохъа. – Нагагь До нисода, миже боьважаъаш.

⁶⁸ До мизол суал нилӀда, гьолълъонна миже жаваб Гьинил нилӀаъас.

⁶⁹ Амма желагъа муьгъатта̄ Аьдамлис Оьжо Къудратаб Аллагьлила кӀетӀакьала рахълиъда̄ къе̄ эчена ахъца.

⁷⁰ КъацӀцӀола нисолло: – Вагьла̄ зогъда, Ми Аллагьлис Оьжод гей? – Миже нисос До гей, – лӀо нисона жаваб нилӀийо Иса.

⁷¹ Гьолло нисойо: – Бадина нӣйо нуьълъид йатӀна илол. Гьолцола сикӀаъкьа̄ гиса гӯйо илол тухъал йатӀийо жо.