Лука 21 - Анкълова Лука

21 къаьм Къоролайс садакъа

¹ Аллагьлила билӀоъ аьдамла̄ садакъа эᵸдо гулцала гъамасбаъ бечедабла сукӀоба̄ тели окко гулцас Исал йега̄йо.

² Гьула̄зу Гьолцол йега̄йо капикбас багьа гаьгьийо къона баклис окко гъамасбаъ гулцас гьоᵸс мискинаб къоролайна.

³ Вагьлиъис Иса нисойо: – Гьаькъкъаб жо гейлӀо нисос До мизохъа: вагьалӀо мискинабли къоролай садакъалал бадлогъа тели окко гъамасбаъ тӀутӀийо.

⁴ СудлӀо нисода бадло садакъалал нилӀийо гьинила маишат-яшавлис тӀокӀ йахъийо окко. Язихлъилаъ гаьгьийа вагьалӀо къоролай мӯь-муьгъатта̄ гьихлъойо окко садакъалал нилӀийо.

Зайтун ма̄ькьа муьгъалӀ йахъцала жойлас хабар ме̄ш 1. Аллагьлис билӀо йугъос

⁵ Лъосолади нисос зукъона: – Аллагьлис билӀо жавгьар-якъутлид къачӀази йогьна гей, гьула̄зу садакъалал нилӀийа бечелъилахъа йилӀа йоцӀна гей, – лӀо. Вагьлиъис Иса нисос:

⁶ – Мокъос кьодо мех вагьалӀоъ, кьалкьа гулло кьало гьихлъечӀе, къацӀцӀо илол йегацас жо къаьмлӀийода̄ йуьᵸхойо водбо.

⁷ Асгьабла̄ Гьолцохъа нисолло: – Йа̄ Муалим! Нитод вагьло мех мокъос? Вагьли кьодо йоᵸкъоцала водис аьламат ниса илохъа.

⁸ Исана жаваб ницца: – Вере, миже къосси бовагьилла̄къа, судлӀо нисода Диела ца̄ᵸйакьа мокъос гьогго̄л До гейлӀо нисона, ахирзаман гьицакналӀо нисона. Гьоллогъой муьгъалӀ миже мекьа̄къа.

⁹ Рагъ-кьаллис тухълъо, миже гьийабацӀа̄къа, судлӀо нисода гьули гьакъкъа аьᵸйдда̄ йахъал нуцӀоцас жо гей, амма вагьли жегун дунияллис ахир гаьъа.

¹⁰ Бетана Гьолцо нисос: – Рагъ лъази богьна гьоᵸс халкъ балӀо халкъилакьа, гьоᵸс пачалихъ балӀо пачалихъликьа кьодо богбацӀас.

¹¹ Вагьло̄лъо са̄-сала йилӀа маьче лахлӀос, батӀи-батӀияб мица̄ъ унтийа телибалъца, нуко-аᵸхъаба̄лъи кьодо йоᵸкъос, гьаᵸсаъкьа̄ йукъа̄ гьицӀабакъова̄ аьламатла йоᵸвакъос.

¹² Вагьли къацӀцӀо йахъал аьᵸйда̄ миже бовахна бейажеш, гьула̄зу азаб ницца. Дӣдда̄ла миже синагогла̄ъна бейазас, хъарандийаъна тӀуватӀас, парчагьла̄дойна наибла̄дойна аьᵸйда̄ бейачелас.

¹³ Вагьго̄лъо мизол рес бахъца дие асгьабла гейлӀо нисона нуьълъи йовал.

¹⁴ Амма нӣйо жаваб нилӀна гьоллодой аьᵸйда̄ бецаллӀо нисона, ургъеллиъ бейака̄къа,

¹⁵ судлӀо нисода До мизол сикӀо-бил нилӀал гьоᵸссукӀона мизол данде бечена бахъаллъеъгъа, йаги гьоᵸссидихъана гьоьᵸшшона нисона йахъеэлъгъа.

¹⁶ Ийо-абона, исна-исийана, мизола аьгарлъилана, гьалмагълъилана миже мийасос. Мизос гьоᵸсо бийакьанна бийакьеш.

¹⁷ Дӣдда̄ла миже къацӀцӀолал ба̄тӀаъас.

¹⁸ Амма мизола къаьмкьаш кеᵸйана йекаъас.

¹⁹ Мизола сабрула мизосзу ругьла тиса йа̄гъас.

2. Иерусалим бугъос

²⁰ Йукъа̄ аскарла йоᵸвакъона Иерусалим балӀо бохийолъи йега̄йа мехлаъ, мизол йикъеш вагьло шагьар бугъоцас заман гьицакийолъи.

²¹ Вагьло̄лъо Ягьудиялиъ гаьгьийо халкъ ма̄ьда̄кьа бовачала, шагьарбаъ гаьгьийа̄ гиса боьвачала, шагьарбаъаш гиса гаьгьийа эᵸдо кьа̄ь мекьа̄къала.

²² СудлӀо нисода вагьло̄лъо мокъос ТӀекла̄кьа чахийо къацӀцӀо жо йахъцас къисаслис мех.

²³ Вай, оᵸх гаьгьийа̄нна къова хагъолцала̄нна йега̄с къарилъи вагьло̄лъо замаллиъ, судлӀо нисода вагьалълъо халкъилакьа Аллагьлис йилӀа симо бӣйахъа йукъа̄ балагьла йоᵸвакъолца.

²⁴ Балъаййад бийакьейа̄ тели ба̄хъца, сад асирлъилаъ бейажеш къацӀцӀола мажус халкъиладой. Мажусияллис заман болъоцал, мажусиялли хаьбала̄лӀ Иерусалим боцлас.

3. КӀахнасна Масигь оᵸкъоцаслъи

²⁵ Бохъ-бицосна ца̄ᵸда̄сна муъжизатла аьдамла̄л йегаба̄с, бета ракьликьа халкъ йукъа̄ ралъадбала соййа̄ла хъуйлихъа гьийабачӀена йилӀа букъа ургъеллиъ бейакна бихзи ба̄хъца.

²⁶ Гьинкъилахъана, ракьлиъкьа̄ йоᵸвакъоцала балагьла̄хъана аьдамла бичӀлиъис бовалъос, судлӀо нисода гьаᵸсаъаса лахдабалъ.

²⁷ Бета гьаᵸса-мусаъкьа̄ къуватликьана букъа къадро-къиматликьана оᵸкъоцас эга̄с Аьдамлис Оьжо.

²⁸ Вагьалло̄л аьламатла йа̄хълӀо миже, бецокьана бечена, къаьма гьоъокьабакӀа, судлӀо нисода мизол хъосарлъи гьицакна гей.

4. Легъилала хоьхис хабар

²⁹ Иса гьоллол вагьаддийо мисална бакъойо: – Легъилала хоьххъа, йаги бадло хоьхла̄хъа гуцӀобахъ миже.

³⁰ Гьолло хоьхла̄ диъи йаьгъеллъо, мизол йикъеш мех эмеда̄кийолъи.

³¹ До гьолӀоъ нийасова̄ аьламатла йа̄хълӀо, мизол йикъе Аллагьлис Парчагьлъи гьицакийолъи.

5. «Вере миже буьчаба̄хечӀе бече!»

³² Гьаькъкъаб жо гейлӀо нисос До мизохъа: Дуниялликьа вагьдо уммат гаьгьийаъзу йахъца къацӀцӀо вагьли жо.

³³ Гьаᵸс-маьче йоъдана, До нисойо йаьже йахъечӀе гьихлъаъас.

³⁴ Вере, хувабана, маишатлис тӀалаб-агъаз богьна, йакӀо боцдолъал йеᵸйа̄къа, судлӀо нисода гелокьас гьули водо кьодо йоᵸкъос, биса̄ йовахцас къӣцой.

³⁵ Вагьли водо кьодо йоᵸкъос дуниялликьа гаьгьийа къацӀцӀо махлукъатликьа.

³⁶ Вагьалълъобза буьчаба̄хечӀе гьадурса бече. Гьолълъо балагьлиъис миже хъосар бахъалъгъа, гьула̄зу Аьдамлила Оьждидой аьᵸйда̄ бецалъгъа Аллагьлил гьари-доьъа̄ йовагьа.

³⁷ ЙалӀокъей Аллагьлила билӀоъ Иса ваъза-насигьатла йовагьа̄гьийо, нишелаъ Гьули Зайтун ма̄ькьа эᵸкьа̄гьийо.

³⁸ Воддиъ хискьа къацӀцӀо халкъ мокъа̄гьийо Аллагьлила билӀоъ Гьолцохъа энекзи ба̄хъал.