Лука 20 - Анкълова Лука

20 къаьм «Лъод Дул ихтияр нилӀийо?»

¹ Вагьагло водла̄ъ Иерусалимлиъ гаьгьийа Аллагьлила билӀоъ ваъза-насигьат богьна Рохеллис Хабар Иса мегьцалаъ, гьулиъ мокъойо букъа̄ кашишлана, диниябла аьлимлана, гьаькимлана.

² Гьолло Исахъа нисолло: – Лъо изно нилӀнад Ми аьдамла̄л вагьло ваъза-насигьатла йовагьца? Лъод Дул вагьалълъол ихтияр нилӀна?

³ Иса гьоллохъа нисос: – Гьаᵸкъкъа мизохъа До гьоᵸс жо нисолал.

⁴ Нисаъче, Ягья аварагли гьаᵸсаъкьа̄, йана аьдамла̄ш ихтияр михъонад лъӣд мунагьла чурзи йовагьца зукъойо?

⁵ Гьолло̄л сидхъа-гьоᵸсо бикълабашал муьхобалъийо: гьаᵸсаъкьа̄ изно зукъойолӀо нисода, суд миже Ягьякьа боьважеэшлӀо нисолас Гьолцо.

⁶ Нагагь иле нисода, аьдамла̄ш ихтияр зукъойолӀо нисона, къацӀцӀо халкъила кьала̄ йийакьена бийакьас иле, судлӀо нисода гьолло̄л аьдамла боьважча Ягья гьаькъаб авараг гаьгьийакьа.

⁷ – Илол на̄кьа изно михъойолъи йикъаъас, – лӀо нисона жаваб нилӀийо гьогло.

⁸ Исана гьоллохъа нисона гей: – Гьинина лъо изно нилӀийона нисаъас, – лӀо.

Чикейа̄ элла̄кьас хабар

⁹ Бета Гьолцо, мисална бакъона, халкъилал вагьаддийо хабар ме̄йал уьᵸхолъийо: – Гьоᵸс пуланаб сукӀо гунна гей кӀодас аьгь. Гьолона элла̄хъа нилӀна, гьули сукӀо эᵸкьена гей цӀихода̄ балӀо мицаъ тели мехлаъ эцал.

¹⁰ КӀодо бикъолъ, гьолцо сукӀо элла̄дой эᵸгьна гей гьоᵸс лагъ гьинил мехецас кӀодас бутӀа бокӀал. Амма гьолло гьули лагъ а̄ькьенна оьчӀчӀо кьа̄ь эᵸгьна гей.

¹¹ Гьогцо сукӀо бадина лагъ эᵸгьна гей элла̄дой, амма гьогло гьугина а̄ькьенна, инжит огьна, кьа̄ь оьчӀчӀо уьᵸхонна гей.

¹² Лъанас э̄ᵸйона, вагьалла̄зу а̄ькьенна, лаьхъла̄сна оцӀинна, тӀотӀна гей.

¹³ Ахирна аьгьбала бетӀергьалли нисона гей: «Сийод до йовал, до дил йилӀа аццас оьжо эᵸйал. Суд йикъал, гьули эгалъ, гьолцокьадана намус ба̄хъал гьогго̄л», – лӀо.

¹⁴ Амма оьжо эгалъ, элла̄ сидхъа гьоᵸсо бикълабашена пикро богьна гей: «Вагьди гей ирсилав, гьуди икьеда, илол ирс михъас».

¹⁵ Аьгьбаъаш гисана оцӀна, аькьенна икьена тӀотӀна гей элла̄ гьули оьжо. Гьаᵸже венахийала бетӀергьалли сийод гьоллол йовал?

¹⁶ Эᵸкьанна эᵸкьена гьогго̄лна бийакьена аьгь бадлохъа нилӀас. Энекзи бахъийа̄ нисона гей: – Йахъа̄къала вагьаллийо жо.

Йоᵸсоъ кьухъеэш кьало

¹⁷ Гьоллохъана говацӀона Иса нисойо: – «Йоᵸсоъ кьухъаъаслӀо нисона йоᵸсохъалла̄ йечаннейо кьало, ахирна кӀетӀа букьаъ рекъази йо̄с», – лӀо нисона ТӀекликьа чахийа калималис маъна сийо гаьгьийона бикъешди мизол?

¹⁸ СукӀо ахъдана гьолълъо кьалил эᵸхейо сукӀона галигзи ахъца, кьода̄кьа йекна йоᵸкъова гьолълъо кьалина гьули йеᵸхейо аьдамна наькъучӀа о̄с.

Къайсарлил ниццас гьаькъ

¹⁹ Букъа̄ кашишла̄лна диниябла аьлимла̄на Иса кьапӀун охна эᵸдо голал атӀна зукъойо. Амма халкъилахъа гьийабачӀелъ, гьолло̄л муьгъатта̄ буьвакьна бечейо. Вагьло гьидекьас хабар ме̄йолъи гьоллол бикъейо.

²⁰ Гьоглол йатӀна зукъойо Иса нисойо нӣйади йаьжкьа охна ихтияр гаьгьийона диван богьцалана наиблихъа Гьуги нилӀал. Вагьалълъол гьогло муьгъалӀ аьдамлана беченна, ме̄йолӀо гьидес сукӀоба жуво̄л мацова гаьгьийас хелна богьна.

²¹ Ме̄йа аьдамла̄ Исахъа нисолло: – Йа̄ Муалим! Илол йикъеш Дибола сикӀаъкьа̄ гӯйо йаьжена каламна нитоназу битӀараб бахъцас. МотӀолиъ говацӀона иш богьцас аьмална гаьъа дибо. Гьаькъкъаб жоцой малъзи йо̄с битӀараб Аллагьлила гьид эᵸкьал.

²² Ниса илохъа, илол йикъал йатӀна гей къайсарлил гьаькъ нилӀал бахъцади йаги бахъаъасди?

²³ Гьоллос гьилла-макро биджи бахъна Иса нисос:

²⁴ – Йегалаъче Дил динар. Лъойсди гьолълъокьа кьодо суратна ца̄на гей? – Къайсарлис гей, – лӀо нисойо гьолло.

²⁵ – Вагьла̄ зогъда къайсарлис къайсарлил нилӀа, Аллагьлис – Аллагьлил нилӀа, – лӀо нисойо Иса гьоллохъа.

²⁶ Вагьла̄ гьоллохъа йахъеэш гьидел йатӀийо йаьже Исад халкъ гаьгьийаъ нисоллина. Гьолцола жавабли гьикмат богьна гьокӀа йоваъинна гьихбалъойо гьолло̄л.

Къиямасаб водиъ бувагъова̄ баьгъбаъилцалакьас хабар

²⁷ Исадой мокъос гьоᵸсо саддукейлалӀо нисоцаса, къиямасаб водиъ бувагъова̄ баьгъбаъилцалакьа боьважаъцаса, диниябла аьдамла. Гьолло Исахъа нисолца:

²⁸ – Йа̄ Муалим! Мусала къанонликьа, масала, гьоᵸс пуланаб сукӀо ахъхъал къована ба̄хъечӀе угъона зогъда, гьолцола истӀи гьоло ахъо йоᵸкъал нуцӀос угъова истӀил насло бахъалъгъа.

²⁹ Масала, зукъона гей алӀна ис. Йоᵸкъова ахъхъал къова ахъечӀе угъона гей аьᵸйдда̄ш ис.

³⁰ Гьолцос ахъо йоᵸкъона гей бацосола истӀи, гьулина угъона гей къова ба̄хъечӀе.

³¹ Вагьалла̄ лъанасна ис угъона гей, бета гьоᵸссокун алӀнана ис къова ба̄хъечӀе бувагъона гей.

³² Ахир гьоллос ахъона йугъона гей.

³³ Гьаьсил, къиямасаб водиъ гьоло алӀон истӀис ахъо лъойс ахъод йахъца?

³⁴ Гьоллол жаваб богьна Иса нисос: – Дунияллила билӀоъ аьдамла ба̄хъна гей ахъхъа мовакъална, ахъхъа мейакьална.

³⁵ Амма ахиратлиъ, къиямасаб водиъ баьгъбаъинна муьгъатта̄, ахъо-бетӀергьалла ба̄хъаъас.

³⁶ Хел гаьччо абадияб малаиклислъийо оьмро бахъца ахиратлиъ аьдамла̄ш. Ахиратлила билӀоъ къацӀца̄ бувагъоваъас баьгъбаъилла̄ ба̄хъца Аллагьли Гьиндой ийабалӀейа Гьинис къовалъийа̄.

³⁷ Къиямасаб водиъ бувагъова̄ багъбаъилцалӀо Мусана нисос. ЙекӀецала тӀитӀас чаха̄чо калималиъ нисона гей Мусахъа, БетӀергьан «Ибрагьимисна, Исакъисна, Якъубисна Аллагь гей», – лӀо.

³⁸ Аллагь – бувагъова̄с Аллагь гаьъа, чӀагоябла̄с Аллагь гей. Гьолцол къацӀцӀа̄ чӀагоябла гей.

³⁹ Гьолълъогъа муьгъатта̄ гьоᵸсо диниябла аьлимла̄ нисойо: – Йа̄ илос Муалим! Ми йилӀа битӀун нисойо, – лӀо.

⁴⁰ ТӀокӀаб гьоᵸссукӀона гьоьшшона нисолал кӀези ахъеэш.

«Давудила умматлис оьжо гаьъа Масигь»

⁴¹ Гьолцо кьа̄ьна гьоллохъа нисолло: – Суд аьдамла̄ Масигь Давудила умматлис оьжо гейлӀо нисос?

⁴² Давуди гьинила забурлиъ нисона геййа̄ъ: «БетӀергьан Аллагьли диела Кьодда̄ла БетӀергьаллихъа нисона: „Диела кӀетӀакьала рахълиъда̄ къе̄ эче,

⁴³ до тушмалла Дибола хаьбала̄дой аьᵸйда̄ мицна̄кьа бейачелцал“».

⁴⁴ Вагьла̄ гьини Давуди Масигьлихъа гьинис Кьодда̄с БетӀергьанлӀо нисослаъ, нигъад Масигь Давудила умматлис оьжо ахъца?

«Гьоᵸсо диниябла аьлимла̄кьас цӀуми ба̄хъ миже!»

⁴⁵ КъацӀцӀо халкъ Гьолцохъа энекзи бахъна гаьгьийаъ, Гьинила асгьабла̄хъа Иса нисойо:

⁴⁶ – Вере, йихало лъицӀона лъичӀена мекье-гугьцаса, халкъ къацӀобака̄цо гьидел салам бовал баццаса, синагогла̄ъ кӀетӀа мица̄ъ къе̄ бецал баццаса, бес-хулӀа̄цо аьйдаба̄кчаша вагьадло диниябла аьлимла̄дойс атада̄ цӀуми ба̄хъна бече миже.

⁴⁷ Язихабла къоролла̄с боцӀи-ризкъина гьолло муьхъча, гьула̄зу аьдамла̄л йега̄лъгъа йихала̄ доьъа̄на йовагьца. Вагьли тели йо̄ваъан, гьоллол лъакъейа̄ъас тамбигь михъос.