Лука 2 - Анкълова Лука

2 къаьм Иса авараг ахъийо водо

¹ Гьогло водла̄ъ Август къайсарила амролакьа дуниялликьа гаьгьийа къацӀцӀа̄ аьдамла ча̄хал нуцӀос зукъона гей.

² Вагьли аьдамла ча̄хийолъи зукъона гей аьᵸйдда̄ш, Квиринийли Шамлиъ наиблъи йогьцала замалла̄ъ.

³ МекьейолӀо къацӀцӀа̄ гьӣ-гьидела шагьарба̄ъ жуво̄л чахиллал.

⁴ Галилеялис Назарет шагьарбаъаш аьгъиъна Усупна Ягьудияллиъ БетлегьемлӀо нисойо Давудила шагьарбаъ кьодо эᵸкьейо жу чахиллал, судлӀо нисода гьули Давудила насло-зуриятлисна билӀосна сукӀо зукъойо.

⁵ Гьолцогъой къацӀо зукъойо гьолцол магьар гулло оᵸх гаьгьийо ахъо Мариянна.

⁶ Гьулиъ гьоддо̄л мокъолъ, гьоглӀол къова ахъал мех мокъойо.

⁷ Марияни о̄йо аьᵸйдда̄ш къова, оьжо. Бета къӣла̄ъна оьлӀна голло гьолълъо гьули синакӀбаъ, жуво̄л бецал билӀоъ маьче михъаъалъ.

Малаиклана века̄на

⁸ ГьоглӀо мицаъ зувакъона гей авлахълиъ нише гьидеш боцӀи богъоцас века̄.

⁹ Гьоглодой Бичаслис малаик оᵸкъойо, БетӀергьаллила Нурли гангъизи бо̄йо гьолло̄л, гьолълъохъа века̄на йилӀа гьийабачӀейо.

¹⁰ Малаикли нисос века̄хъа: – ГьийабацӀа̄къа, до мизол бакъойо къацӀцӀола аьламлил бахъцас букъо рохел.

¹¹ Жейса Давудила шагьарбаъ ахъна гей Аллагьли аьдамла тиса ба̄гъал э̄ᵸйо Кьодда̄с Масигь.

¹² Гьуна, миже вагьалълъокьа боьважаллъийо аьламат: мизол иᵸхъос синакӀбаъ оьлӀна голло къова.

¹³ Гелокьасзу малаиклигъой къацӀо йоᵸкъос гьаᵸсаъла агьлолас йукъо гьаз. Аллагьлил тасбигьна йогьна гьолло нисос:

¹⁴ – Гьаᵸсаъла Аллагьлил рецна, ЛӀийо дуниялликьа Аллагьли цӀоб гулла̄л – рекъелна!

¹⁵ Малаикла гьаᵸсаъ мекьена муьгъатта̄, века̄ сидхъа гьоᵸсо нисос: – БетӀергьалли илол тухъал битӀилло вагьдо хабарна, гьулиъ йахъийо жона йикъелал Бетлегьемлиъ иле мекьал.

¹⁶ Вагьаллиъисзу кьапӀун мекьейа̄ гьоллол, мийахъос Мариянна, Усупна, синакӀбаъ укилло къована.

¹⁷ Къова эга̄йоназу века̄ нисос, къова ахъийас хабар гьидел малаикли илгьам бо̄йолӀо.

¹⁸ Гьодлохъа энекзи бахъийа̄ къацӀцӀа̄ аьдамла аьжаиб ба̄хъна гьихбалъос века̄ нисойо жойлакьа.

¹⁹ Нисова жойлаш маънана богьна, Марияни шоваълечӀе йакӀкьа йовахийо гьолло шибаблис йаьжбо.

²⁰ Малаикли нисогъа гьидел тухъанна бега̄нна битӀилло хабар битӀун михъолъ, Аллагьлил рецна тасбигьна богьна века̄ кьа̄ь боьвачош.

Исал суннат бо̄йо

²¹ БелӀен водиъис къовал суннат бо̄слаъ, гьолцокьа Иса ца̄ᵸ гулца. Вагьли ца̄ᵸ зукъойо малаикли Мариян оᵸх гаьгьийо йахъал аьᵸйда̄ гулалӀо нисойо ца̄ᵸ.

Иса Аллагьлила билӀоъ акъойо

²² Мусала къанонликьа гьогго̄л ма̄цолцас водбо йоᵸвакъолъ, гьолло оьжо Иерусалимлиъ акъос БетӀергьаллил назро огьна нилӀал. (

²³ Аллагьлила амролакьа ийола сиᵸйаъас гисакийо шибаб абодда̄с насло БетӀергьаллил назролъилаъ икъелца зукъона.)

²⁴ Вагьалълъо динияб къанонликьа къурбаллил мухал нуцӀос зукъона гей къона ванаъас илба, йаги илбалис къона лӀапан.

²⁵ Гьуна вагьалълъо мехлаъ, Иерусалимлиъ зукъона гей СимеонлӀо нисойо сукӀо. Гьули зукъона динияб муъмин ва Израиллис халкъ БетӀергьалли тапшур боваллакьа йакӀо гаьгьийо сукӀо. Гьолцогъой зукъона Илагьияб Ругьна.

²⁶ Гьолцол Илагьияб Ругьли тухъал йитӀилло жу Бичаслис Масигь эгайчӀе угъаъцаслъи.

²⁷ ВагьаглӀо водиъ гьули Илагьияб Ругьли оᵸкъолло Аллагьлила билӀоъ. Ийо-абона акъос итӀино Иса гьулиъ, Гьолцол бовал нуцӀойо динияб аьдат бовал.

²⁸ Симеони окчиш Гьули ко̄ъ, бета Аллагьлил рецна богьна нисос:

Симеони муьгъалӀ йахъцас жо нисос

²⁹ – Йа̄ Рабби дие БетӀергьан, до Дибо лагъ, мокъола дил къадар до угъал, Ми нисова йаьжкьа рекъенна богьна.

^30-31 Ми къацӀцӀола халкъилал йикъалъгъа гьаьдур йо̄йо хъосарлъи йега̄йо диела гьаьйда̄л,

³² мажусла̄л канлъи-лъай, дибола Израил халкъилал рецна къадрона.

³³ Оьждикьас Симеони вагьла̄ нисолъ, ийо-або гьайран-гьикмат ба̄хъийо.

³⁴ Гьоллол доьъана богьна Симеони нисос Мариянхъа, оьждила ийохъа: – Гьуна, вагьацо оьждиъкьа̄ телида̄с Израил халкъилас аьдамла бейакца, телида̄с кьоддаба̄кца, вагьди къова ахъца Аллагьлис аьламатцой, амма тели аьдамла гьолцол данде бечеш,

³⁵ – дибона йакӀо балъаййахъа лъукъзи йахъца, – телилас йакӀиъ гаьгьийа̄ пикрована загьир йа̄хъалъгъа.

Гьаннати муьгъалӀ йахъцас жо нисос

³⁶ Зукъойо гьулиъ гьиниъ караматлъи гаьгьийо Гьаннат – Пенуэлис кид, Ашерила кьибиллиъис, йилӀа ицлолъийо аьдам. Гьинила бетӀергьаллигъой ахъо йеᵸкьена муьгъатта̄ алӀна лӀи йагъос.

³⁷ БелӀнайигна оьᵸкъона лӀи йеᵸкьецал къоролай нитоназу Аллагьлила билӀоъос йолъаъас зукъона гей нишена-хискьана БетӀергьаллил какна-кӀална йогьна, тӀаъат-ибадатликьа йечена.

³⁸ Вагьалълъо мехлаъ гьолълъо Аллагьлил рец-бакъ богьна ме̄ш зукъойо Исас хабар, Иерусалим тапшур боваллакьа йакӀо гаьгьийа къацӀола аьдамла̄л.

Кьа̄ь Назаретлиъ мекьейо

³⁹ Бета гьолло̄л, БетӀергьаллила къанонликьа бовал нуцӀойо аьдатна богьна, мекьена мокъос Галилеялиъ, гьидела шагьар Назаретлиъ.

⁴⁰ ИтӀино укълъис зукъойо, къуватабна аькъилабна ахъца зукъойо, Аллагьлис баркат зукъойо Гьолцоъ.

АцӀона къонлӀис Иса Аллагьлила билӀоъ

⁴¹ Шибаб лӀиъ Гьолцос ийо-або мекьа̄гьийо Иерусалимлиъ ПасхалӀо нисоцала ид-водил.

⁴² Гьолцол ацӀона къона лӀи йеᵸкьелъ, аьдатликьа ид-водил гьолло̄л мекьейо кьодо Иерусалимлиъ.

⁴³ Бета ид-водо йолъона муьгъатта̄ гьолло̄л кьа̄ь мекьейо, гьихлъос гьоллос насло Иса Иерусалимлиъ; гьули гьихлъо̄лъи икъаъас ийолна аболна.

⁴⁴ ГицӀийолӀо гьодлол Гьули го̄слӀона бадлогъой. ЙалӀокъе̄ш йагъойо гьино йолъона муьгъатта̄, муьхобалъийолӀо гьолло̄л гьули иᵸзал аьгарлъилаъна бега-бийакъейа̄ъна.

⁴⁵ Гьулина иᵸхъечӀе, кьа̄ь кӀаьймуьхона мекьейолӀо гьолло̄л Иерусалимлиъ гьолцогъойна миздабана.

⁴⁶ Лъанасла водиъ Гьули иᵸхъона гей Аллагьлила билӀоъ муалимла̄ъ алӀо къе̄на эчена, гьоглохъа энекзи ахъна гьоглол суалла нийаццас.

⁴⁷ КъацӀцӀа̄ энекзи бахъийа гьайран-гьикмат бовагьца зукъона гьолцола аᵸкълолана жавабла̄на.

⁴⁸ Гьули эгалъ, ийо-або гьикмат ба̄хъийо; гьолцола ийо оьждихъа нисос: – Йа̄ дие оьжо, сийод ми илол йо̄йо. Гьуна, дибо абона дона йукъа пашманлъилаъ ми иᵸзийо.

⁴⁹ Гьолцо гьоллохъа нисос: – Суд миже до иᵸзал нуцӀос? Мизол икъаъасди зукъойо до диела Абола билӀоъ ахъал нуцӀоцаслъи?

⁵⁰ Амма ийо-абол биджи йахъеэш гьолцо нисо̄ йаьжла̄ш маъна.

⁵¹ Бета Гьули аьгъиъна эᵸкьейо гьоллогъой лӀийо Назаретлиъ. Гьули ийо-або нисогъа уьᵸхо-аьᵸхейо. Ийона гьогцос йаьжбо шоваълечӀе йакӀкьа йовахийо.

⁵² Иса укълъийо, аьдамла̄ла аᵸкъло-пикролаъ оᵸкъойо, Аллагьлинна аьдамла̄нна Гьули йилӀа атӀийо.