Лука 15 - Анкълова Лука

15 къаьм ЛъикӀлъилас лъана хабар

¹ Исахъа энекзи бахъал мокъос зукъойо гьаькъ бокӀолцаса сукӀобана мунагь-гьаькъ гаьгьийа̄ баддо̄л тели аьдамлана.

² Фарисейла̄на диниябла аьлимла̄на Исакьа мордабана нисос зукъойо: – Вагьди сукӀо мунагьла̄д бовацӀийа аьдамла̄гъой гьудуллъина йогьна гьоллогъой эᵸш-хулӀос, – лӀо нисона.

1. Боъийа бикькьас хабар

³ Иса вагьаддийо хабар ме̄йо гьоллол:

⁴ – ГьоᵸсчӀитӀ боцӀилаъас гьоᵸс боълъо, аьчӀенайигна аьчӀена боцӀина гаьлълъа̄чо авлахълиъна бечаннегьна, боъийо бикь мизал эᵸкьаъцас сукӀо гейди мизоъ эᵸдо?

⁵ Бикь михъона муьгъатта̄, разина ахъна гилакьа гунна бежеш гьолцо гьоло билӀогъа.

⁶ Бета билӀогъа оᵸкъона муьгъатта̄, гьалмагълана мадугьаллана ийалӀена гьоллохъа нисос: «Диела рохеллиъ мижена аькал ба̄хъ, дие боъийо бикь зогъна гей».

⁷ Вагьалълъобза До мизохъа нисос: гьинкьа мунагь-гьаькъ гаьччо аьчӀенайигна аьчӀена муъмин-сукӀолгъа гьоᵸс муна̄пикъ Аллагьлилъда̄ уьᵸхода, гьаᵸсаъла̄с йакӀо йилӀа рази йахъца.

2. Йоъийа окколакьас хабар

⁸ Йаги гьинис ацӀона окколаъас гьоᵸсцойс окко йоъда, гухъинна канлъина билӀона ахо лъаьлӀена гьуги-гьотта̄ йиᵸзечӀе йечаннегьцас гьоᵸсдана ийо зогъалди?

⁹ Окко зогълъо, гьинис цӀагьа̄на мадугьаллана ийабалӀена гьолълъо нисос: «Диела рохеллиъ мижена аькал ба̄хъ, дие йоъийо окко зогъна гей».

¹⁰ До мизохъа нисос: вагьла̄ Аллагьлис малаикла Аллагьлилъда̄ уьᵸхова муна̄пикъликьа йилӀа рази ба̄хъца.

3. Оьмролала гьидсо къоссиахъийа оьждикьас хабар

¹¹ Бетана Иса ме̄йо хабар: – Сид пуланаб сукӀос зукъона гей къона оьжо.

¹² ИтӀинасола оьжди нисона гей абохъа: «Або, дибола ирслис гьинил мехецас бутӀа нилӀа», – лӀо. Або гьоглол ирс битӀна гей.

¹³ Лади водла̄ъас итӀиносо оьжо, гьинил ирслиъ йиᵸхъо̄йо къацӀцӀо окко-меседна лъицӀо-къайна йоькчина, аьгъиъна эᵸкьейолӀо на̄ди цӀихо гаьгьийо улкалиъ. Оᵸкъа̄цо гьолцо, иᵸхъо-ахъхъа кӀаьйлӀона, гьинис гаьгьийо къацӀцӀо окко-месед йугъонна гей.

¹⁴ Гьолцохъас къацӀцӀо окко-месед йолъова замаллиъ, вагьалълъо улкалиъ йоᵸкъона гей йукъо ракъи. Гьули оьжона йилӀа йазихлъилаъ кези ахъна гей.

¹⁵ Ахирна сид сукӀодой гьаьлтӀи нисонна эᵸкьелъ, гьолцо гьули булӀлагъа эᵸгьна гей.

¹⁶ Чара бугъолъ, булӀлал ниццас жона йуьᵸхъал разияб зукъона гей, амма гьулина гьолцол нилӀаъас зукъона.

¹⁷ Аᵸкълолакьана оᵸкъона гьолцо пикро богьна гей: «Диела абола билӀоъ йоькькьад гей бовахийа̄ гьаьлтӀухъалла. Оьнна кьодона мекьейодолас баьбана гей. До гьолӀоъ нуковахъа угъос.

¹⁸ Аьгъиъна абодой эᵸкьал, бета гьогцохъа нисал: „Або, Аллагьлидойна дудойна аьᵸйда̄ до мунагьла̄ъ кези ахъийо.

¹⁹ До дибо оьжолъилаъ тӀокӀаб бикӀзи овал мустагьикъаб гаьъа, ахъда дудой гьаьлтӀилаъ оха“».

²⁰ Аьгъиъна эᵸкьена гей гьули гьинила абодой. Ата̄кьа̄зу эгана гей абол гогьцас оьжо. Абос гьолцокьа йилӀа йакӀо йугъона гей. Гьогцол дандена чӀанагъона, або оьждил алъона йоцӀна баъдана гей.

²¹ Оьжди абохъа нисона гей: «Аллагьлидойна дудойна аьᵸйда̄ до мунагьла̄ъ кези ахъийо, дибо оьжолӀо нисал до мустагьикъаб гаьъа».

²² АболӀо нисода, гьинила лагъла̄хъа нисона гей: «Биссун кӀетӀо лъицӀона йакъона гьолцохъа лъичӀела, гьолцола зокьилъ кӀоьййана мехела, хаьбала̄лъ гьалалъцована гийахела.

²³ Бакъоллина ахо бегъакӀийо бишена муха, оьжо оᵸкъова̄лас кӀетӀо бес-хулӀо̄лъи йовал,

²⁴ судлӀо нисода вагьди дие оьжо угъоваъас ахъна гей, оъийаъас зогъна гей». Гьолло̄л котакаб ихтилат-кеп бовал муьхобалъна гей.

²⁵ Гьолцо сукӀос укъосо оьжо вагьалълъо мехлаъ зукъона гей мицалъ. БилӀогъа го̄слаъ, гьолцол тухъна гей лъисо-кешлис гьокӀ.

²⁶ Гьицада̄на илӀена сидцойсола нукарлихъа нисонна гей, сийод вагьдо ихтилат-кеплӀо.

²⁷ «Дибо ис сагъ-саламатлъилаъ оᵸкъова̄лас або ахо бегъакӀийо бишена мухоллина ихтилат-кеп богьцас гей», – лӀо нисона жаваб нилӀийо нукарли.

²⁸ Вагьли тухълъо, укъа оьждис симо бигьна гей, билӀоъ эᵸкьал къабул ахъечӀе зукъона гей. Бета або гисакна гьардизи ахъийолӀо билӀоъ эᵸдо тослӀо нисона.

²⁹ Оьжди жаваб нилӀийолӀо: «Вагьдисинаб лӀӣйаъ до дул лагъцой огьда̄йо, ми нисова жойлакьас тилӀкеэш. Вагьлиъ эᵸдо ми дил итӀино чикӀена мухоллеэш диела гьалмагъла̄гъой ихтилат-кеп бовал.

³⁰ Амма дибо зукъойо бечелъина хъагьба̄гъой къацӀо эс-хулӀона йолъонна оᵸкъова вагьацо дибола оьждил ми ахо бегъакӀийо бише мухона гей».

³¹ Або гьолцохъа нисойолӀо: «Оьжо! Ми нитоназу дӣгъой къацӀо гей, къацӀцӀо дие бечелъина дибо гей.

³² Иле рази бахъна ихтилат-кеп бовал нуцӀос, судлӀо нисода вагьди дибо ис угъоваъас ахъна гей, оъийаъас зогъна гей».