Лука 13 - Анкълова Лука

13 къаьм Тавба бовал нуцӀоцалас аьгьи

¹ Вагьалълъо мехлаъ мовакъова̄ гьоᵸсо аьдамла̄ Исахъа нисойо Пилати Галилеялиъис аьдамлана бийакьена гьоллос гьеᵸ Аллагьлила билӀоъ къурбаллил мухова боцӀилала гьеᵸйагъой лъицӀхоьчӀиллолӀо нисона.

² Иса гьоллохъа вагьалълъол жаваб богьна нисойо: – Мизол гицца зогъас вагьалло̄л аьдамла вагьла̄ бувагъолъ, Галилеялила бадло аьдамла̄гъа мунагь-гьаькъ тели гаьгьийа̄ гейлӀона?

³ ГаьъалӀо нисос До мизохъа: амма къацӀцӀола мижена тавба боваъда, вагьла̄ мижена бувагъас.

⁴ Йаги гього Силоамлис хъала бекна лӀийо мийахъова̄ ацӀона белӀна сукӀо Иерусалимлила аьдамла̄гъа мунагь-гьаькъла тели зувакъова̄лӀонад мизол гицца?

⁵ ЗукъеэшлӀо нисос До мизохъа: амма тавба боваъда, къацӀцӀа̄ мижена вагьла̄ бувагъас.

Пихъ нилӀаъцала легъилала хоьхис хабар

⁶ Бета Иса вагьаддийо хабар ме̄йо: – Гьоᵸс сукӀола венахийаъ зукъона гей легъилас хоьхо. Гьули оᵸкъойолӀо легъи йокӀолал, амма гьолцол хоьхкьа легъи йиᵸхъона гаьъа.

⁷ Нисона гей венахи богьцала сукӀохъа: «Гьуна до лъана лӀи го̄йо, амма гьоᵸсна легъи гуцӀона йикъеэш вагьалӀо хоьхкьа. БуьчӀна болъола гьоло, наьгьакъда маьче бохиллечӀе».

⁸ Амма гьолцо нисона гей: «Йа̄ БетӀерчӀахъаяв! Беччаннейа желӀбасса̄за. До со̄ᵸгъой баьхал, гьолълъол йаᵸко гулал.

⁹ Бета гизилалдана йахъассаъад гьолълъо хоьхкьа легъи. Нагагь йахъаъда, буьчӀна болъолал».

Шамат водиъ михъа̄ гъоддо аьдам йахъилло

¹⁰ Шамат водла̄ъ Иса ваъза-насигьат бо̄с зукъона гей сид синагоглиъ.

¹¹ Гьулиъ зукъона гей ацӀон белӀен лӀиъ кьодос болъаъцала унтилаъ кӀокӀойо, гъоддо, билъахъа къаьм йохна йахъаъцас гьоᵸс аьдам.

¹² Гьоло йегалъ, Иса гьиндойда̄на илӀена нисос: – Йе аьдам! Ми дибола узролаъас хъосар йахъийо!

¹³ Гьолълъолъ ко̄ йеᵸхелло. Вагьаллиъисзу михъа̄ъ йаᵸкъойцӀойо, бета гьоло Аллагьлил рец бовал йуьᵸхолъийо.

¹⁴ Иса шамат водиъ вагьло аьдам йахъиллъо, Гьолцокьа симахъова синагоглила гьаькимли халкъилахъа вагьда̄ нисойо: – Илъна водо гей анкьилаъ батӀтӀийо гьаьлтӀи бовал бахъцас. Шамат водиъ гуйчӀе, вагьагло водла̄ъ гугь миже сагъ бовагьал.

¹⁵ Гьолцол жаваб богьна Кьодда̄ла Иса нисойо: – Йа̄ къонда̄ моькьош аьдамла! Гейд мизоъ эᵸдо гьоᵸсдана сукӀо сийаъас макна мизосзу оᵸс йаги аᵸу шамат водиъ лъи хулӀал бежеллаъцас?

¹⁶ Вагьдо, Ирбагьинила умматлис кид, ацӀона белӀна лӀи илбисли йиᵸцона йохна зукъойо, шамат водиъ гьоло йаᵸкал йахъаъасди?

¹⁷ Иса вагьла̄ нисолъ, Гьолцол данде бечейа̄ аьдамла ниц-ламус ба̄хъийо. Амма къацӀцӀо халкъ Гьолцо йовагьийа къацӀца̄ гьикматаб жойлакьа рази бахъийо.

Генилала кӀаькӀалкьаш хабар

¹⁸ Бета Иса нисолло: – Аллагьлис Парчагьлъи лъинилъ йеᵸлъейод гей? Лъинилъди До гьули йеᵸлъелал йахъца?

¹⁹ Гьули йеᵸлъейо гей генилала кӀаькӀалилъ. Инсалли вагьло кӀаькӀа бокчина аьгьбаъ мижейо, гьолълъоъкьа̄ букъо хоьхо бахъийо. Мигьна̄на хоьхила аьᵸлейа̄кьа гьидел сӣᵸбо йовагьийо.

Хашилакьас хабар

²⁰ Бетана кьа̄ьна нисойо: – Лъинилъди До Аллагьлис Парчагьлъи йеᵸлъелал йахъца?

²¹ Гьули йеᵸлъейо гей хашилалъ: ийо лъана билӀей гьаьтӀтӀала йоьᵸтобаъ жу гунна муьгъатта̄, къацӀцӀо йӣйа йийакьалалъ.

Хъусса̄ кавла

²² Шагьарба̄ъана аьлӀа̄ъана халкъилал ваъза-насигьатна богьна Иса эᵸкьес зукъойо Иерусалимлиъда̄.

²³ Сидцойсола Гьолцохъа нисолло: – Йа̄ БетӀерчӀахъаяв! Йоькькьа аьдамла тиса муьвахошлӀо нисоцас хабар битӀарабди гей? Гьолцо жаваб нилӀийо:

²⁴ – Хъусса аᵸциъкьа̄ эᵸдобакал гъаза бова миже, судлӀо нисода, мизохъа нисос, телида̄с бикьебакьеш эᵸдобакал, амма эᵸдобакна бахъаъас.

²⁵ БетӀергьалли аьгъиъна гьинис кав гъешена муьгъатта̄, гисда̄ гьихбалъова̄ миже къоьпӀлӀолдабана илӀелаба̄с: «Йа̄ БетӀерчӀахъаяв! Илол аᵸц йеᵸгьалӀо!» Гьолцо жаваб нилӀас мизол: «Миже на̄с ба̄хъцасна сукӀо гаьгьийа̄на Дил бийакъаъас», – лӀо нисона.

²⁶ Бета миже нисал муьхобалъаш: «Иле Дӯгъой къацӀо бес-хулӀойо, гьула̄зу илла шагьарба̄ла къатӀла̄ъ Ми илол ваъза-насигьатла йовагьийо».

²⁷ Гьолцо бета мизохъа нисас: «Дил миже на̄с ба̄хъцасна бийакъаъас, болъо дидойс ата̄ къацӀцӀа̄ мекъаб жо йогьцаса аьдамла!»

²⁸ Бета мизол гьулиъ, Аллагьлила Парчагьлиъ, бегаба̄с Ирбагьинна, Исакъна, Якъубна, баддо̄л авараглана. МижелӀо нисода гиса тӀуватӀлъо бийабацасна сила̄ къисбалӀолцасна ба̄хъас.

²⁹ Аллагьлила Парчагьлиъ гьидела мицаъ бес-хулӀал къе̄ бецал мокъас магъриблиъисна машрикълиъисна, гьула̄зу бихъхъаъда̄лана оᵸкъкъаъда̄лана мица̄ъас аьдамла.

³⁰ Гьуна, гьоᵸсо аьᵸйда̄ гаьгьийа̄ муьгъатта̄ бейакца, муьгъалӀ гаьгьийа̄ сад аьᵸйдаба̄кча.

Иса ме̄ш Иерусалимлис хабар

³¹ Вагьалълъо водиъ Исадой мокъова гьоᵸсо фарисейла̄ нисойо: – Гисакна эᵸкье дибола гьид, Гьеродил Ми икьал атӀна гей.

³² Исана гьоллохъа нисойо: – Мекьанна мекьена гьолцо соралхъа ниса: гьуна До зинналла̄ бовахийа̄на, унти-узрола азаб ниццасана аьдамла ба̄хъилца жейсана хисана, бета лъанасла водиъ До богьцас иш лъикъолца.

³³ Амма авараг Иерусалимлиъ оᵸкъеэш угъаъас, вагьалълъобза жейсана, хисана, хисалалъна До гьид ахъал нуцӀос.

³⁴ Вай Иерусалим, Иерусалим! Аварагла бийакьецасна дӯдой Аллагьли мейагьийа расулла кьала̄д бийакьецасна шагьар! Ла̄хди Дил йатӀна зукъойо гуьди чӀучӀулийацой дибо аьдамла Диела гьаба̄лӀ ба̄гъал, амма мизол гьули йатӀеэш.

³⁵ Гьуна же мизос Аллагьлис билӀо йоьчӀчӀо гьихлъас. До нисос мизохъа: «БетӀергьаллила Къудратликьа эᵸгьна оᵸкъоцалал баркат гулала», – лӀо миже нисойо заман мокъеэш, До мизол эга̄ъас.