Лука 12 - Анкълова Лука

12 къаьм Иса асгьабла̄л аᵸкълова нийацца

¹ Вагьалълъо мехлаъ гьаза-гьазайла̄д аьдамла къацӀобакна йукъо къолӀолаба̄лъи зукъойо. Сидил гьоᵸсо бовацилло гьаьллъилакьа зукъойо гьоллос иш. Иса гьакъкъа Гьинила асгьабла̄хъа икълашал уьᵸхолъийо: – Вере миже цӀуми ба̄хъ фарисейла̄ла хашилакьас, гьай гьоллола къонда̄ моькьоколъи йо̄вакьас.

² Гьоᵸсна йуᵸцойо жо йикъечӀе гьихлъаъас, вагьла̄зу гьоᵸсна балъгояб жона загьир йахъечӀе гьихлъаъас.

³ Вагьалълъобза нише колӀлӀаъ нисойо жо, качелълъол тухъцаслъи йикъе; эᵸдда̄ла билӀоъкьа̄ лъо̄лади аьᵸгъалагъа нисойо йаьже, кьама̄кьалкьа̄ нисона лъо̄нназу тухъцаслъи йикъе.

⁴ Мизохъа, Диела гьалмагъла̄хъа, нисос: магъо бикьецала̄хъа гьийабацӀа̄къа, тӀокӀаб гьоллохъа мизол гьоьшшона йогьна йахъаъас.

⁵ Амма нисал мизохъа, лъо̄хъа гьийабацӀал нуцӀоцасна. Миже гьийабачӀе, бийакьена муьгъатта̄ журжагьлиъ тӀуватӀиллина ба̄хъийахъа. Гьула мизохъа нисос – гьоллохъа гьийабачӀе.

⁶ Къон ассарийаъ гаьъад бохал михъос лъина мигьна. Амма гьолло мигьна̄сна тӀалаб-агъаз бо̄с, Аллагьлил гьоᵸсна мигьнана шоъанна шоъаъаш.

⁷ Мизола къаьмкьа гаьгьийо гьули кеᵸйана хъогьна гей. Пал гьаьсил, миже гьийабацӀа̄къа: телила мигьна̄гъа хириябла гей миже.

⁸ Гьуна мизохъа нисос: Аьдамла̄дой аьᵸйда̄ дие рахъ бохийо сукӀос, Аллагьлила малаикла̄дой аьᵸйда̄ Аьдамлила Оьждина рахъ бохца.

⁹ Аьдамла̄дой аьᵸйда̄кьа Дӣкьас инкар бо̄йо сукӀокьас, Аллагьлила малаикла̄дой аьᵸйда̄ гьолцокьас Дона инкар бо̄с.

¹⁰ Аьдамлила Оьждихъа данде йаьже нисойо сукӀокьас Аллагь кьодос тилӀкис, амма Илагьияб Ругьликьа калӀ йиᵸхъо̄йо жо йекӀийакьас кьодос тилӀкаъас.

¹¹ Синагоглиъна бейажена, халла̄дойна гьаькимла̄дойна аьᵸйда̄ баьгъбаъинна беченна муьгъатта̄, миже гьоллокьас цӀуми ба̄хъалъгъа сийоди нисалласна, йаги нӣйо жаваб нилӀалласна ургъел боха̄къа.

¹² СудлӀо нисода Илагьияб Ругьли малъзи йовас вагьаклӀо саъатбаъ мизол нисал нуцӀоцас жо.

Аьнтаб бечедаб сукӀокьас хабар

¹³ Сидцойсола халкъилаъ алӀолакьа̄ нисойо Гьолцохъа: – Йа̄ Муалим! Ниса диела истӀихъа ирслис дил мехецас бутӀа нилӀалӀо нисона!

¹⁴ Иса гьолцохъа нисойо: – Йе аьдам, мизос даьъба-диван болъолална ирс битӀанна голло сукӀод гей До?

¹⁵ Бета Гьолцо къацӀцӀолахъа нисойо: – Вере миже хъантӀлъилакьас цӀуми ба̄хъ, судлӀо нисода дуниялликьа тели бахъийа боцӀи-ризкъилакьа бараб гаьъа аьдамлис оьмро.

¹⁶ Вагьла̄на нисона, Гьолцо ме̄йо гьоᵸс хабар. – Гьоᵸс бечедабли сукӀола мицалъ йахъна гей йокӀонна гьаьл мокъойхъеэш тели муькъо.

¹⁷ Гьинис гьинил пикро богьна гей: «Сийод до йовал, муькъо гулал оьлло маьче гаьъа̄ъ?»

¹⁸ НисойолӀо: «Гьуна до вагьда̄ йовал: келла̄ баькьлана кейашена гьоллогъа йукъа̄на ицӀцӀа̄на баькьла йовагьал, бета бахъийо хъибона гаьгьийо бечелъина эᵸдо йуьᵸхолал.

¹⁹ Бета до диела ругьлихъа нисал: „Йа̄ дие ругь! Гьуна дул лади лӀӣйаъ оьлло кен-оᵸхна бечелъина гей. Раьгьат бокча: беш, хулӀа, кеп бокча гьаᵸже ми“».

²⁰ Вагьлиъис Аллагьли нисона гей гьолцохъа: «Йа̄ аьнтаб инсан! Жейса нише дибо ругь багъас. Лъо̄лди гьихлъос ми йокӀолло бечелъи?»

²¹ Вагьаллийо бахъца дуниялликьа бечелъи йокӀолло сукӀос къисмат. Аллагьлидой аьᵸйда̄ гьули бечедаб гаьъа.

Иса асгьабла̄хъа ургъел боха̄къалӀо нисос

²² Бета Иса Гьинила асгьабла̄хъа нисойо: – Вагьалълъобза мизохъа нисос: сийоле йакӀил йуьᵸхъал йатӀалла̄лӀона оᵸхасна, сийоле магъокьа лъицӀал йатӀалла̄лӀона лъицӀосна ургъел боха̄къа.

²³ СудлӀо нисода кенлигъа аьᵸйда̄ш гей ругь, лъицӀогъа аьᵸйда̄ш гей магъо.

²⁴ Гъаьдла̄хъа гуцӀобахъ миже: гьолло йа муькъо йиᵸзаъас, йа йуьᵸваъаш, йа гьоллос амбар-баькьна гаьъа, амма Аллагьли гьолло̄л йегъабакӀца. Амма мигьна̄гъа ласо хирияблад зогъал миже!

²⁵ Лади миже бикье-баькьедана лъо̄хъана бахъалди мизос оьмро гьоᵸс водо бихалокӀна?

²⁶ ИтӀино жо йогьна йахъаъцаса миже, йукъо йовал суд бикье-баькьеш?

²⁷ Мицалъ гаьгьийа цӀикла-диъила̄хъа гуцӀобахъ: гьолло йа йоьхош йоваъас, йа гъечӀе йоваъас. Амма гьуна мизохъа До нисос: гьинила машгьурлъилаъ гьакъкъана Сулайман аварагли лъичӀеэш вагьалло диъила̄ лъичӀейа лъицӀогъа кьухъийо лъицӀо.

²⁸ Йа̄ миже, йакӀиъ даьгьаб божи гаьгьийо уммат! Жейса мицалъ гаьгьийа, хиса цӀоъ гулцала диъи-бохална Аллагьли вагьаллийо кьухъийо лъицӀо лъичӀеллъо, ла кӀетӀо лъицӀод мизол лъичӀелал.

²⁹ Вагьалълъобза мижена, сийоле йуьᵸхъаллӀона келлисна, сийоле хулӀаллӀона хулӀоцала жойласна, ургъел бова̄къа.

³⁰ Дуниялликьа гаьгьийа аьламли вагьли жо йиᵸзца. Амма мизола Абол йикъеш мизол вагьли йаццаслъи.

³¹ Миже аьмал бова Аллагьлила Парчагьлиъ кези бахъал, бади гьихлъо̄ шинаб Гьолцо мизол кьодона ницца.

³² Миже гьийабацӀа̄къа, итӀино рехъен! СудлӀо нисода илла Абос мизол Парчагьлъи нилӀал хийал гей.

³³ Мизосзу боцӀи-ризкъина мисона садакъа̄ йовагьа. Йа̄ьхаъчаш-йоьᵸшойбацӀаъцас боьъована йовагьа, гьаᵸсаъ гаьгьийо бугъаъцас, къокъаъцас хазинана бокӀола. Гьоло хазина гьаᵸсаъ йа гигьлагийа муцаъас, йа сидала муьхъаъаш.

³⁴ Мизос хазина гаьлълъа̄чо мизос йакӀона йахъца.

Нитоназу гьаьдурса бецал нуцӀоцалас насигьат

³⁵ Нитоназу тицӀийа оᵸхакьа йеᵸйахенна къачӀази бахъна бече, гувахъинна кана йечабаннейа.

³⁶ Бейтелликьа эᵸкьейо билӀос бетӀергьан оᵸкъаллахъа гувабацӀона бечейа̄ нукарлалъийа ба̄хъ мижена – Гьогцо оᵸкъона, къоьпӀлӀоллоназу аᵸц йеᵸгьалъгъа.

³⁷ Гьардарабла гей бетӀергьан оᵸкъоцал буьчаба̄хечӀе мийахъова̄ лагъла. Гьаькъкъаб жо нисос мизохъа: гьолцо бетӀергьалли вагьаллийа нукарла̄л оьло лагъла̄с лъицӀона лъичӀеш, истӀолийагъа къе̄на беченна гьолло̄л хъуллухъна бо̄с.

³⁸ Гьардарабла гей нито оᵸкъодана: йалӀохъовадда̄, йаги хиссакьа вагьалла̄ оᵸкъаллахъа гувабацӀона бечейа̄ лагъла.

³⁹ Амма мизол йикъеш: билӀола бетӀергьаллил гигьлаги оᵸкъоцас мех бикъешкъода̄, гьолцо гигьлагийад йоᵸсо йоьᵸтӀоллаъаш га̄ь.

⁴⁰ Мижена гьаьдурлъилаъ бече нитоназу, судлӀо нисода Аьдамлис Оьжо мизол икъаъцала мехлаъ оᵸкъас.

Божи бовал бахъцасна хиянатабна

⁴¹ Вагьалълъо мехлаъ Петери Исахъа нисойо: – Йа̄ БетӀерчӀахъаяв! Илолди Ми вагьло мисал бакъос, йаги къацӀцӀо халкъилалнади?

⁴² Кьодда̄ла Иса жаваб нилӀийо: – Гьоᵸс пуланабли сукӀол, къацӀцӀа̄ лагъла̄с тӀалабна бовалӀо гьоллол боглаъ кен-оᵸхна нилӀалӀо нисона эчаннейо лагъ, бетӀергьан оᵸкъоцал ахо уьᵸхо-аьᵸхена огьдацас иᵸхъода, гьули аᵸкълояб лагъ ахъца.

⁴³ БетӀергьалли гьини нисогъа йогьна иᵸхъойо лагъ гьардараб гей.

⁴⁴ Гьаькъкъаб жоцой нисос мизохъа: бетӀергьалли гьолцохъа нилӀас къацӀцӀо гьинила билӀо-аᵸхас ханлъи.

⁴⁵ Амма нагагь вагьла̄ эчаннейа лагъли, гьинис бетӀергьан гьех-мех оᵸкъаъаслӀо нисона лагълана гъарабашлана ба̄ькьелал уьᵸхолъда, гьула̄зу эс-хулӀовакьа водбона йеᵸйагьда, цихназуна ахъда,

⁴⁶ гьолцол бетӀергьан оᵸкъаллӀо йакӀкьа гаьчӀеэшла водиъ, гьолцол бикъаъцала мехлаъ оᵸкъас; бета гьули алӀлӀода̄ аьхелас, капурабла̄л бо̄йо тамбигь бовас.

⁴⁷ Гьинкьа тӀаддаб иш бовал нуцӀоцаслъи йикъедана, бетӀергьалли нисогъана йоваъалъ, ахона уьᵸхо-аьᵸхаъалъ, лагълил тели чурукь йеᵸхас.

⁴⁸ Гьинил йикъечӀе йахъийа такъсирлъилал йоькькьа чурукь йеᵸхас. Лъо̄хъасназу, тели нилӀийахъас дӣс тӀалаб йовас, букъо божи бо̄вахъас дӣс нисолас.

ЦӀона къонда̄ бийатӀийолъина

⁴⁹ ЦӀона йоᵸкъолал гогьна гей До дуниялликьа. Дил вагьга̄ йилӀа йатӀна гей же цӀойс бибидаро бахъал!

⁵⁰ До йукъо эᵸхе йагъал нуцӀос. Букъа ургъелликьа гей До нитоле вагьли йахъалла̄лӀона.

⁵¹ Мизол гицца зогъас До дуниялликьа рекъел бовал гогьналӀона? ГаьъалӀо нисос мизохъа, къонда̄ бийатӀал гогьна.

⁵² Вагьалълъобза желагъа муьгъатта̄ гьоᵸс хъизаллиъ лъин сукӀос къонда̄ бийатӀийолъи йахъца: лъана къонил данде эцас, къона лъанил данде эцас.

⁵³ Къонда̄ бийатӀна або оьждил данде, оьжо абол данде, ийо киббал данде, кид ийол данде, йукъо ийо гьинила оьждила ахъхъал данде, ахъо йукъа ийол данде бейацас.

«Же заман нӣйо гаьгьийона суд мизол бикъаъас?»

⁵⁴ Иса халкъилал хитӀаб богьна нисойо: – Бохъ тӀика̄цода̄кьа гьаᵸс цӀодололъда, вагьаллиъисзу миже нисос водис гьаᵸс гейлӀо нисона. Вагьла̄ нисогъана йахъца.

⁵⁵ Къилмалиъда̄кьа залӀо йикьеда, боьгьи бахъцалӀо нисос. Вагьла̄ боьгьина бахъца.

⁵⁶ Къонда̄ моькьова̄ш миже! Гьаᵸса-мицас гьаьл батӀа йовал бикъеш мизол, суд вагьдо заман нӣйо гаьгьийона бикъаъас?

⁵⁷ Суд миже мизос мизокьа пикро богьна нисаъас – сийо битӀараб гаьгьийона?

⁵⁸ Масала, дӯлъ даьъба богьцас сукӀона мина къадидой диваллил мекьес зогъда, гьокцодой мекьешлаъ миже ба̄хъал йаьгь багъа. Бетана гьокцо сукӀо ми къадидой хъахъалӀолца; къади ми нилӀас эᵸдо гувалцала сукӀохъа, гьогцо ми тӀусагъийаъ тӀотӀас.

⁵⁹ Нисос дӯхъа, гисакаъас ми тӀусагъийаъас, мӯь-муьгъатта̄ гьихлъойо окко нилӀеэш.