Jonashi 4 - JONASHI

Ikisanakara Jonashi

¹ Yogari Jonashi ineakera tera intsatagero Tasorintsi ikantavetakarira inkisashiigakemparimera Ninivekunirira impogereaigakerira, irirori ineakero tera onkametitimoteri ovashi ikisanaka.

² Impo iniakeri Tasorintsi, ikantiri: «Nero, Notinkami, nokantasanotakeniroro okyara aiñokyara nonavetara anta nogipatsiteku. Irorotari nokogantavetakarira noshiganakemera noatakemera Tarisuku, nogotakempitari vinti Tasorintsi kametiri, aikiro pairo pitsarogakagantavageta, tera shintsi pinkisempa, pairotari pitasanotantavageta pikantavetaka nonkisashiigakempari impo ariokya pikantatigavairo.

³ Irorotari, nonkantantakempirira maika, Tasorintsi, atsi gamagena. Pairo okametitake nonkamakera avisakero nontimaera.»

⁴ Kantankicha yogari Tasorintsi ikantiri: «¿Pineakero viro kametitake pikañotakerora maika pikisanakara?»

⁵ Impo iatake Jonashi parikoti samani oatakara ikontetira poreatsiri; ario ipirinitake kara okoneatakera magatiro apatotara pankotsi, yovashitaka maani itikakotakara ganiri itagiri poreatsiri, kantaka ipirinitakera yogiakera ariorika intsatagakero ikantakeririra.

⁶ Yogari Tasorintsi ishivokakagakero oga shivitsa pamatsaniro atagumaitanake inakera Jonashi, otsimanpegakerira ganiri itagiri poreatsiri. Antari ineakerora Jonashi otsimanpegakerira ishinevagetakatyo kara.

⁷ Kantankicha impo ikantake Tasorintsi irogakemparora kashageto otsitiku pamatsaniro, nerotyo iroro okutagitevetanakara pairo shigirikake.

⁸ Impo iporeanakera poreatsiri ariokya ikantake Tasorintsi ontampiatakera omponiakempara ikontetira poreatsiri onkatsirinkaenkatanakera. Yogari poreatsiri kantinkasanotari ikatinkatagutakeri igitoku Jonashi nerotyo oga ikenake itaganakerira, ovashi ineavaka panikya intuanake inkamakera. Iniavagetanake ikanti: «¡Pairo okametitake nonkamakera avisakero nontimaera!»

⁹ Kantankicha Tasorintsi ikantiri: «¿Pineakero viro okametitimotakempi pikisanakara pikañotakerora maika pineakerora oshigirikapitsatanakempira shivitsa pamatsaniro?» Inianake Jonashi ikanti: «¡Jeje, noneakeroniroro kametitake nonkisakotakemparora! ¡Nokogantakarira maika nonkamakera pairotari nokisaka!»

¹⁰ Impo Tasorintsi ikantiri: «Pine maika tera viro pankivetemparone oga shivitsa pamatsaniro, aikiro tera viro gishivokerone; onti tsikyata oshivokanake irorori, impo okutagitevetanaka pa shigirikake, kantankicha viro pitsarogakagakarotyo pineaketari iroro pomanpegantaka.

¹¹ Naromparorokari pairo nontsarogakagaigakempari Ninivekunirira, karari kara apatotakara pankotsi aiñoegitari kara tovaini matsigenkaegi yavisaigakero 120,000 ananekiegi tekyarira irogoigero tyara ikantaigakempa kameti irogavisaakoigakempara aikiro aiño tovaini piratsipage.»